Thursday, September 23
Shadow

Muhanga: Igice cy’Urusengero cyubakiweho imibiri y’abazize Jenoside kizasenywa

Ivomo:Umuseke.rw

Komisiyo ihuriweho n’Inzego zitandukanye z’Itorero (ADEPR), Ubuyobozi bw’Akarere ka Muhanga, IBUKA n’Inzego z’Umutekano bemeje ko igice cy’Urusengero gisenywa kuko ngo kirimo imibiri y’abazize Jenoside itarashyingurwa hakaba hashize imyaka 26 abari bafite amakuru batayavuga.

Ni Komisiyo yashyizweho nyuma y’uko hamenyekanye amakuru ko ku Rusengero rw’Abapantekote ruherereye i Gahogo mu Murenge wa Nyamabuye bahabonye imibiri y’abishwe muri Jenoside.

Icyo gihe nibwo iyo Komisiyo irimo Abayobozi ku rwego rw’Akarere ka Muhanga, ubugenzacyaha, Polisi na IBUKA yahise ijyaho itangira gucukumbura uko ikibazo giteye.

Bamwe mu barokotse Jenoside yakorewe Abatutsi mu 1994, bavuga ko batewe agahinda no kuba kugeza ubu iki cyemezo kitarashyirwa mu bikorwa kugira ngo imibiri y’abazize Jenoside iri mu Rusengero no ku mpande zarwo iboneke inashyingurwe mu cyubahiro.

Perezida w’Umuryango ushinzwe kurengera inyungu z’Abarokotse Jenoside (IBUKA) Rudasingwa Jean Bosco yabwiye Umuseke ko barambiwe ko inzitizi zihari zivaho,  kugira ngo ibyo banzuye nka Komisiyo bitangire gukurikizwa.

Rudasingwa yavuze ko bashima inzego z’ubutabera kuko zatangiye gukurikirana abari bahishe amakuru y’uko imwe mu mibiri yabonetse.

Yagize ati: ”Icyifuzo cyacu ni ukumenya ukuri, icya kabiri ni uko imibiri ishakishwa igashyingurwa mu cyubahiro kandi byashoboka bigakorwa mbere y’uko italiki isanzwe yo kwibuka igera.”

Rudasingwa avuga ko amakuru bahawe n’abatangabuhamya, yavugaga ko aho Urusengero ruteretse hari imibiri, indi ikaba iri mu rwinjiriro, aho hose hagomba gusenywa.

Umuyobozi Mukuru wungirije mu Itorero ADEPR, Past Rutagarama Eugène avuga ko raporo y’ibyo Komisiyo yemeje bayihaye inzego z’ibanze mu Karere ka Muhanga no mu buyobozi bukuru bwa ADEPR, kuyishyira mu bikorwa ni cyo gisigaye kandi bikaba byaraturutse ku mpamvu z’iki cyorezo cyugarije Isi n’u Rwanda rurimo cya Covid-19.

Yagize ati: ”Raporo y’ibyo twanzuye irahari, twazitiwe n’uko kuri ubu nta nama zihuza abantu benshi ziterana.”

Gusa uyu Muyobozi avuga ko ikiguzi bizasaba kizatangwa, kubera ko gushakisha imibiri y’abazize Jenoside babiha agaciro kanini.

Umuyobozi w’Akarere ka Muhanga Kayitare Jacqueline avuga ko bemeje ko ahari imibiri hose hasenywa, kandi ko byagombaga gukurikizwa mu mpera z’ukwezi kwa 12 umwaka ushize wa 2020.

Kayitare avuga ko igikorwa cyo gutangira imirimo cyakomwe mu nkokora na COVID-19, kuko ubwo biteguraga gutangira uwo murimo, inama y’Abaminisitiri yahise ishyira hanze itangazo ribuza abantu guhura ari benshi.

Yagize ati: ”Ahakekwa imibiri hose kuri urwo Rusengero hagomba gusenywa hagasanwa nyuma, imibiri yavanywemo.”

Ibice bimwe by’imibiri igera ku 8 niyo yari yavanywe ku biro, Ubuyobozi bw’iri Torero bukoreramo.

Icyo gihe kandi hafashwe abantu 3 bashinjwaga ko bahishe amakuru, barimo na Pasiteri w’urwo Rusengero.

Umuyobozi w’Akarere ka Muhanga Kayitare Jacqueline yijeje abarokotse Jenoside n’abandi baturage muri rusange ko umunsi gahunda ya Guma mu Karere na Guma mu rugo yavuyeho bazasubukura iki gikorwa.

Iyo Komisiyo kandi yari yatoye Ingengo y’Imali ya miliyoni zirenga 15  iki gikorwa cyose kizarangira gitwaye.

Bamwe mu bari bagize Komisiyo ihuriweho n’Inzego zitandukanye z’Itorero ADEPR Ubuyobozi bw’Akarere ka Muhanga IBUKA n’Inzego z’Umutekano

Leave a Reply

Your email address will not be published. Required fields are marked *