Wednesday, June 16
Shadow

Abagize imiryango igera ku munani bavuga ko batunguwe no gufungirwa inzira bari bamaze imyaka myinshi bakoresha

Abagize imiryango igera ku munani ituye mu Mudugudu wa Nyarucyamo ya II, Akagari ka Gahogo, Umurenge wa Nyamabuye, bavuga ko batunguwe no gufungirwa inzira bari bamaze imyaka myinshi banyuramo n’umuturanyi wayo.

Mu gitondo cyo kuri uyu wa Kabiri tarikiya 2 Gashyantare 2021, ni bwo bamwe mu bagize iyi miryango basanze inzira banyuramo yafunzwe.

Bamwe mu baganiriye na TV1, bavuga ko babangamiwe n’uburyo umuturanyi wabo yafunze inzira banyuragamo mu gihe bamaze imyaka myinshi ariyo bakoresha.

Umwe ati “ Ikibazo dufite hano ni ikibazo cy’inzira twacagamo, twasanze yafunzwe kandi twaraje dusanga iyo nzira ihari tukaba dufite ikibazo cy’aho tugomba guca. Ejo twarabyutse nk’ibisanzwe tujya mu kazi noneho mukuza dusanga aho twacaga baharunze igitaka ariko urumva igikorwa nyir’izina cyari kitaratangira. Mu kugaruka abagarutse mbere yanjye basanze bashyizeho igipangu.”

Undi muturage ati “ Ejo twarabyutse tujya mu kazi nta rugi ruriho hano tugarutse dusanga urugi yamaze kurukubitaho.”

Bavuga ko ubu kugira ngo bave cyangwa bagere mu ngo zabo bari kwifashisha inzira yahanzwe hepfo y’iyi yafunzwe, bakanashimangira ko nayo iramutse ifunzwe nta buryo bwo kuva no kugera mu rugo zabo bazaba bafite.

Uwafunze iyi nzira we yatangaje ko yabitewe n’uko abayicagamo bamuvogereraga umuharuro kandi batabuze aho banyura.

Umunyamabanga Nshingwabikorwa w’Umurenge wa Nyamabuye, Nshimiyimana Jean Claude, na we yemeza ko uyu mugabo wafunze inzira yari afite ukuri.

Ati “ Mu by’ukuri ni ikibanza cyari gisanzwe gifitemo inzira aho abaturage basohokera ndetse ikaba ari inzira yari imaze igihe kinini ikoreshwa n’abatuye aho ngaho. Twaganiriye na nyiri kuhafunga adusobanurira ko nawe hari ibikorwa bye bimwe byangirikaga bitewe n’inzira yanyuraga mu marembo ye, ku ruhande rwe twamumvise.”

Yongeyeho ko bafashe umwanzuro w’uko aba baturage bakomeza gukoresha iyo nzira ariko igihe abantu bafite ubutaka buhana imbibi n’iyo nzira bazaba batangiye kubaka ko buri wese agomba kuzasiga inzira bazajya banyuramo bataha cyangwa bajya mu miryango yabo.Umurenge wa Nyamabuye ubarizwamo umujyi wa Muhanga aho ibyavuzwe mu nkuru byabereye

Leave a Reply

Your email address will not be published. Required fields are marked *