Saturday, October 23
Shadow

Barashinja abasirikare bo mu gisirikare cya Uganda, gusambanya ku gahato abagore bakora mu birombe.

Abacukuzi bo mu gace ka Karamoja, barashinja abasirikare bo mu gisirikare cya Uganda, gusambanya ku gahato abagore bakora mu birombe.

Inkuru dukesha Daily Monitor ivuga ko aba baturage basabye leta kubarenganura kuko igihe cyose batanze ibirego by’ababahohoteye bafatwa bagafungwa ariko nyuma y’igihe gito bakarekurwa.

Umwe mu bacukuzi bo muri ako gace Sandra Aleper, avuga ko abantu bose bafashwe ku ngufu ibirego byabo byashyikirijwe ubutabera ariko bikaba iby’ubusa.

Yagize ati “Ukwezi gushize hari umwana w’umukobwa w’imyaka 10 wo mu gace ka Nakabaat wasambanyijwe ariko uwamufashe yararekuwe. Aha ntiduhabwa ubutabera kandi ntitwahava kuko niho dukura imibereho.”

Ibi byashimangiwe n’undi wafashwe ku ngufu utifuje ko imyirondoro ye igaragagara, wavuze ko aba basirikare babasanga aho baryamye bakabasambanya ku gahato, ndetse ko yagerageje gutanga ikirego cye kuri sitasiyo ya polisi ya Moroto ntahabwe ubutabera.

Ati “Uwamafashe narareze arafatwa ajyanwa kuri polisi ya Moroto ariko nyuma y’icyumweru ararekurwa. Nagerageje gukomeza kubikurikirana ntacyo bamfashije.”

Umuvugizi w’igisirikare muri ako gace, Maj Peter Mugisha, yavuze ko ikibazo batari bakizi, gusa ngo bagiye kugikurikirana abaturage bahabwe ubutabera.

Ati “Ntabwo twari tubizi ariko tugiye kubikoraho iperereza. Abasirikare babereye hariya kurinda abacukura ndetse no kubarinda icyabahungabanya, ntibikwiye ko aribo babahungabanya.”

Muri aka gace kuri ubu hari abangavu benshi bamaze guterwa inda zimburagihe, bitewe nuko hari ababashukisha amafaranga barimo abasirikare, bakabatera inda.

Leave a Reply

Your email address will not be published. Required fields are marked *