Thursday, July 2
Shadow

Rubavu:Abaturage babangamiwe n’abitwikira ijoro bakabatemera urutoki

Abaturage bo mu Kagari ka Basa mu Murenge wa Rugerero mu Karere ka Rubavu bavuga ko babangamiwe n’abagizi ba nabi biking amajoro bakirara mu myaka yabo irimo urutoki bakayitema.

Abatuye muri aka gace hari uwo twahisemo kwita ‘Kagabo’ bashyira mu majwi ko ariwe uri ku isonga y’ibyo bikorwa bibangiriza bakorerwa.

Hategekimana Jean Claude avuga ko Kagabo yamwatse isambu akayimwima kubera amafaranga make bigatuma ahora amutemera insina akanamurandurira imyaka.

Yagize ati “Njyewe yaraje arambwira ngo arashaka isambu yange kuri miliyoni imwe ndayanga nuko arambwira ngo niba wanze kungurisha aha hantu nta kintu uzongera gusaruramo. Nyuma y’iminsi itatu nasanze batemye insina zirenga 12. Kuva mu 2019 kugeza ubu ntabwo ndabona igitoki cyangwa ibishyimbo ndahinga bakarandura.’’

Uwimana Dieudonné we yavuze ko na we kubera urugomo yakorerwaga byatumye atanga isambu ye ku mafaranga make.

Yagize ati “Njye isambu yanjye yayitemagamo urubingo navuga agashaka kunkubita bituma mpamuhereza ntabiteguye kuko nasangaga intoki bazitemye. Nabonye ntazabivamo kuko nta bushobozi nari mfite bwo kuburana ndahamuhereza ampa amafaranga ibihumbi 500 Frw kandi hari hafite agaciro ka miliyoni n’ibihumbi 500 Frw.’’

Umunyamabanga Nshingwabikorwa w’Umurenge wa Rugerero, Nkurunziza Faustin, avuga ko iki kibazo kimaze iminsi ndetse cyashyikirijwe RIB ngo ikore iperereza.

Yagize ati “Twarabikurikiranye tubyohereza muri RIB kugira ngo hakorwe iperereza hamenyekane ukuri kuko twebwe twabuze ibimenyetso. Hari hashize amezi atanu byarahagaze kuko twari twaganirije abaturage mu nteko ariko ejo bundi byarongeye biragaruka. Twizeye ko RIB izabikurikirana bikarangira.’’

Yasabye abaturage kwirinda amakimbirane kuko ntacyo ashobora kubagezaho uretse ibihombo.

Mu murenge wa Rubavu hakunze kugaragara urugomo ndetse ku wa 29 Werurwe 2020 Niyonzima Salomon yitabye Imana nyuma y’iminsi akubiswe n’abaturage bari bamufashe bamushinja kwiba igitoki.

Abaturage babangamiwe n’abitwikira ijoro bakabatemera urutoki

Ibitoki bitemwa biba bigiye kwera

 10,960 total views,  1 views today

3 Comments

Leave a Reply

Your email address will not be published. Required fields are marked *

Scroll Up