Igitaramo cya Knowless na Bruce Melody cy’itabiriwe n’abafana mbarwa Alain Mukuralinda yagize icyo abivugaho

Share

Knowless Butera na Bruce Melody baherutse gukora igitaramo cyabereye muri Kigali Convention Centre haza abafana mbarwa ibintu Alain Mukuralinda ahamya ko ariko byagombaga kugenda.

Igitaramo cya Knowless na Bruce Melody bacyise ‘Holiday Cheer’ cyabaye mu ijoro ryo kuwa Gatandatu tariki ya 23 Ukuboza 2017 muri Kigali Convention Centre. Ugereranyije n’ubunini bwa sale cyabereyemo ukareba n’umubare w’abantu baje ntiwatinya kuvuga ko ‘abagiteguye bahuye n’akaga’, haje abafana babarirwa muri magana abiri mu gihe hari hitezwe abagera kuri 3000.

Alain Muku, umuhanzi akaba n’inzobere mu by’amategeko ariko ukunda kuvuga atarya iminwa ibitagenda muri muzika nyarwanda yahamije ko kuba Knowless na Bruce Melody bararirimbiye intebe ngo ni ikimenyetso cyerekana ko umuziki wabo “abantu bahaze kuwurebera ubuntu”.

Yagize ati “Ni kuki mwumva ko abantu bajya mu gitaramo cy’abahanzi barangije kurebera ubuntu mu gihugu hose, ikibazo si igiciro, ikibazo ni uko iyo wamenyereje abantu iby’ubuntu ni uko bagufata nyine n’iyo waca igihumbi.”

Yongeyeho ati “Igihe cyose ikibazo cy’abahanzi baharanira kujya mu marushanwa y’ubuntu kitarakemuka ndetse ngo banishyurwe n’abakina ibihangano byabo, ntaho bava ntaho bajya!”

“Nimumpe urugero rumwe gusa rw’umuhanzi wo mu Karere kacu ka Afurika y’Uburasirazuba wakwemera kuza gutaramira Abanyarwanda ku buntu. Ntawe! Kuki se kandi ntacyo baturusha? Kuki se nta muhanzi nyarwanda urenga umutaru kandi mu bihugu duturanye batangira guhanga tubareba ejo bakarinda baba ibyamamare dukanuye amaso gusa , harabura iki koko ngo twikosore ko ikibazo tukizi ?”

Alain Muku usigaye uba hanze y’u Rwanda yavuze ko ibyabaye kuri Knowless mu gitaramo cye yisunzemo Bruce Melody bikwiye kuba isomo by’umwihariko kuko ngo “abo byabayeho bari mu bazanye uwo muco”.

Yagize ati “Nizere ko ibyabaye noneho bitanze isomo kuko abo byabayeho bari mu bazanye uwo muco wo gushishikariza abanzi ibitaramo by’ubuntu mu gihugu hose none batangiye gusarura ingaruka zabyo.”

Knowless na Bruce Melody baherutse kubura abafana mu gitaramo cyabo

Mu bitaramo byateguwe muri iyi minsi mikuru, icya Knowless nicyo cyabuze abafana; mbere ye gato Kayirebwa na Kidum baririmbiye i Gikondo harakubita haruzura ndetse kwinjira byari uguhera ku bihumbi icumi; kuri uyu wa Mbere nabwo Riderman yujuje Petit Stade mu gitaramo cyo kumurika album ye.

Uretse kuba iki gitaramo cyaritabiriwe n’abafana mbarwa ku muryango abanyamakuru barakumiriwe ndetse hinjiye bake cyane nabwo hemererwa gusa abatoranyijwe na Kina Music iyobowe na Ishimwe Clement umugabo wa Knowless.

Kuba abanyamakuru barahejejwe hanze abandi bakangirwa kwisanzura mu cyumba cyabereyemo igitaramo byarijujutiwe cyane. Ibyo guheza abanyamakuru mu bikorwa bya Knowless byaherukaga muri 2016 mu bukwe bwe.

Abafana bari mbarwa mu cyumba cyabereyemo igitaramo

No mu myanya y’icyubahiro abafana bari mbarwa

ukeneye serevise zacu watwandikira kuri nkusiramesh@yahoo.com/whatsapp +250785026490


Share

Leave a Reply

Your email address will not be published. Required fields are marked *

Scroll Up