Perezida Kagame yababajwe bikomeye n’urupfu rwa Prof. Calestous Juma

Share

Perezida w’ u Rwanda Paul Kagame yihanganishije umuryango w’ Umunyakenya wigishaga muri Kaminuza ya Havard muri Leta zunze ubumwe z’ Amerika witabye Imana ubwo yari arimo kuvurirwa Boston, muri Leta ya Massachusetts.

Perezida Kagame mu butumwa yanyujije ku rubuga rwe rwa Twitter yagize ati “Tubabajwe no kumva ko Prof. Calestous Juma yatabarutse. Tubuze intiti yitangiraga guhanga udushya, uburezi n’ uburumbuke bw’ Afurika. Twihanganishije umuryango we n’ inshuti. Aruhukire mu mahoro”

Muri Kamena uyu mwaka Prof . Juma yashyizwe ku rutonde rw’ abantu bubashywe mu Isi. Yari azwi mu Isi mu bijyanye no gukoresha ubumenyi n’ ikoranabuhanga mu gushakira Isi iterambere rirambye.

Muri 2012, 2013 na 2014 ikinyamakuru New African magazine cyashyize Prof Juma ku rutonde rw’ rw’ abantu 100 bavugarikijyana muri Afurika.

Mu bandi babajwe n’urupfu rwe harimo Perezida wa Kenya Uhuru Kenyatta wagaragaje ko babuze umuhanga kandi wakundaga igihugu, aho yahamije ko yari umugwaneza waranzwe no kwitangira ibikorwa bigamije imibereho myiza y’abandi.

Uyu mugabo witabazwaga n’abakeneye inararibonye mu bijyanye n’ubumenyi, ikoranabuhanga no guhanga udushya hagamijwe iterambere rirambye haba mu bihugu byateye imbere n’ibikiri mu nzira y’amajyambere, yari azwiho gukoresha imbuga nkoranyambaga cyane, nyinshi mu nyandiko ze yazinyuzaga kuri Twitter.

Prof. Juma wavukiye mu gace ka Budalang’I, yabaye umwalimu w’amasomo ya Siyansi hagati ya 1974-1978, ndetse n’umunyamakuru ukora inkuru z’ibidukikije ku kinyamakuru Daily Nation kuva mu 1978 kugeza 1979.

Yakoze indi mirimo itandukanye, aho yayoboye Ikigo gishinzwe guteza imbere ikoranabuhanga muri Kenya, akaba apfuye yigishaga isomo rirebana n’iterambere mpuzamahanga muri Harvard Kennedy School (HKS).

Prof Calestous Juma yitabye Imana afite imyaka 64 y’ amavuko

ukeneye serevise zacu watwandikira kuri (nkusiramesh@yahoo.com)

 

Share

Leave a Reply

Your email address will not be published. Required fields are marked *

Scroll Up