Sunday, January 24
Shadow

Urwego rw’Abanyamakuru Bigenzura (RMC) rwatangaje ko rwasubitse igikorwa cyo kwandika imiyoboro ya YouTube

Urwego rw’Abanyamakuru Bigenzura (RMC) rwatangaje ko rwasubitse igikorwa cyo kwandika imiyoboro ya YouTube (channels) rwari rumaze iminsi rukora, ruvuga ko rugiye kongera kunonosora uburyo bwiza byakorwamo.

Ibi RMC yabitangaje mu itangazo yasohoye kuri uyu wa 29 Ugushyingo 2020. Ni nyuma y’uko iki gikorwa cyo kwandika imiyoboro ya YouTube kitari cyavuzweho rumwe n’abantu batandukanye, aho hari abavugaga ko bidakwiriye.

Iri tangazo ryashyizweho umukono n’umuyobozi wa RMC, Barore Cléophas, rigira riti “RMC yifuje gusobonura neza ko icyifuzo cyo kwandikisha imiyoboro ya YouTube cyatanzwe mbere na mbere n’abanyamakuru bakoresha YouTube mu kugeza amakuru ku babakurikira nk’abanyamakuru b’umwuga.”

“RMC yahisemo kubanza kongera gukora izindi nyigo zisumbuyeho mbere yo gukora iki gikorwa, ku bw’izo mpamvu igikorwa cyo kwandikisha [imiyoboro ya YouTube] kibaye gisubitswe.”

Ku wa 17 Ukuboza 2020 nibwo hatangiye gucicikana itangazo ryari ryasohowe na RMC ryibutsa abafite imiyoboro ya YouTube ikoreshwa mu gutangaza amakuru kwihutira kuyandikisha.

Iri tangazo rigisohoka abantu batandukanye ntibabivuzeho rumwe. Hari abagaragaje ko YouTube ari urubuga nkoranyambaga rutagendera ku mahame y’itangazamakuru ku buryo rwagenzurwa na RMC.

Umwe utarashatse ko amazina ye atangazwa yagize ati “YouTube channel ni urubuga nkoranyambaga, ntabwo umuntu azaba afite Instagram ngo ajye kuyandikisha, abe afite Facebook ajye kuyandikisha, kandi dushyiraho ibintu bitandukanye, kuyandikisha rero sinzi icyo byabamarira, kuko ni umutungo bwite w’umuntu yashyiraho icyo ashatse cyose.”

RMC yasobanuye ko imiyoboro ya YouTube yasabwaga kwiyandikisha ari ikora nk’ibitangazamakuru byigenga gusa, ni ukuvuga ibinyamakuru, bikora akazi ka buri munsi ko gutara inkuru mu baturage, kuzitunganya no kuzitangaza hakoreshejwe umuyoboro wa YouTube.

Ngo impamvu yo gutangira kugenzura za YouTube channels zikora nk’ibitangazamakuru byigenga, ni uko gutara inkuru no kuzitangaza bigomba gukorwa kinyamwuga, hisunzwe itegeko rigenga itangazamakuru mu Rwanda, itegeko ryo kubona amakuru, n’amahame y’umwuga w’itangazamakuru.

Urwo rwego kandi ngo rwafashe uwo mwanzuro bivuye ku birego by’abaturage RMC yagiye yakira, aho byinshi muri byo ngo ari ibyaregegaga abakora itangazamakuru ryo kuri murandasi, aho ngo bashinjwaga kwica zimwe mu ngingo z’amahame agenga umwuga w’itangazamakuru.

Mu byo ufite YouTube channel yasabwaga kugira ngo yiyandikishe muri RMC, hari ukwishyura amafaranga 50.000 Frw, hakaba kugaragaza umurongo igenderaho wayo (editorial line), kuba afite ikiranga ko ari umunyamakuru (ikarita ya RMC yemewe), mu gihe atari umunyamakuru asabwa kuba afite umunyamakuru wemewe uzajya uyikoraho bafitanye amasezerano y’akazi.

Leave a Reply

Your email address will not be published. Required fields are marked *