Saturday, September 26
Shadow

RURA yibukije ibigo by’itangazamakuru ko bigomba kwita ku kwishyura amafaranga y’ibihangano bakoresha

Share

Urwego Ngenzuramikorere (RURA) rwibukije ibigo by’itangazamakuru ko bigomba kwita ku kwishyura amafaranga y’ibihangano bakoresha umunsi ku wundi.

 

Mu itangazo RURA iherutse kwandikira radiyo na za televiziyo zose zo mu Rwanda, yabibukije amategeko yose yashyizweho ngo arengere ibihangano by’abahanzi.

Nyuma yo kubibutsa amategeko yose uko yagiye ashyirwaho, RURA yanzuye isaba ubuyobozi bwa za Radiyo na Televiziyo ko bagomba kwegera ubuyobozi bwa RSAU, Sosiyete Nyarwanda y’Abahanzi [Rwanda Societey of Authors] ishinzwe kwishyuriza abahanzi, bakumvikana uburyo bwo kwishyura.

RURA muri iri tangazo yibukije ubuyobozi bwa za Radiyo na Televiziyo ko uzarenga ku mategeko azabiryozwa cyane ko mu bigenwa n’itegeko harimo n’ibihano.

RSAU yashinzwe muri 2010 itangira gukora mu mwaka wa 2016 ishyizweho n’itegeko rireberera abahanzi bose bafite ibihangano bigomba kurindwa ngo birengerwe ku nyungu za ba nyirabyo n’imiryango yabo.

Kuva mu mwaka wa 2017, iyi sosiyete yatangiye kwishyuza abantu batandukanye bakoresha ibihangano by’abahanzi mu buryo bunyuranyije n’itegeko kugira ngo bibyarire inyungu ba nyirabyo.

Ibi bibaye nyuma yuko mu 2017, RSAU yari iherutse kuvuga ko igiye gutangira kwishyuza za Radio na Televiziyo, ibintu byakuruye impaka zikomeye.

Ubuyobozi bw’ibitangazamakuru bikomeye hano mu Rwanda ntabwo bigeze bakira neza kumva ko bagiye gutangira gucibwa amafaranga kuko hacurangwaho indirimbo z’abahanzi bo bazi ko bari gufasha.

Iki gihe, RSAU yasabye abayobozi b’amaradiyo ko bakwicara bakaganira uburyo bw’imyishyurire.

RSAU isanzwe ifite abanyamuryango barenga 500 barimo abanyamuziki bagera ku 160, gusa mu kubaha amafaranga baragabanuka kuko nka korali cyangwa itsinda babarwa nk’umuntu umwe.

 

RURA yibukije radiyo na televiziyo ko zigomba kwishyura ibihangano by’abahanzi zikoresha

 

 5,150 total views,  1 views today

One Comment

Leave a Reply

Your email address will not be published. Required fields are marked *

Scroll Up