Saturday, September 26
Shadow

Itariki ya 27 Kanama 2020 ni yo yemejwe nk’igihe icyiciro cya mbere cy’impunzi z’Abarundi kivazira mu Rwanda

Share
 Itariki ya 27 Kanama 2020 ni yo yemejwe nk’igihe icyiciro cya mbere cy’impunzi z’Abarundi kivazira mu Rwanda gisubiye mu gihugu cyazo nyuma y’ibiganiro bimaze iminsi bihuza impande zirebwa n’ikibazo cyazo.

Mu Cyumweru gishize nibwo habaye ibiganiro bihuza u Rwanda, u Burundi n’ishami ry’Umuryango w’Abibumbye ryita ku Mpunzi, HCR, byiga ku kibazo cyo gutaha kw’izi mpunzi.

Hari nyuma y’uko Leta y’u Burundi yari imaze iminsi ishinja u Rwanda gufata impunzi z’Abarundi zicumbikiwe mu nkambi ya Mahama nk’imbohe zikingiye ikibaba abagize uruhare mu byaha mu Burundi, bagahungira mu Rwanda.

Perezida Ndayishimiye yagize ati “Ni nayo mpamvu dusaba bose gutaha, niba ibyo bihugu bahungiyemo bibafashe nk’ingwate – kuko turabibona ko byabafashe nk’ingwate, kuko nta muntu ushaka gutaha mu gihugu cye ngo hagire igihugu kimwangira gutaha – ni ukuvuga ko babafashe nk’ingwate, babafata nk’imbohe. Turasabye rero ko icyo gihugu cyabarekura bakitahira mu gihugu cyabo cy’amavuko.”

Ibiganiro byabaye mu cyumweru gishize byasojwe Leta y’u Burundi igaragaje ko ikeneye ibyumweru bibiri byo kwitegura kwakira icyiciro cya mbere cy’impunzi zimaze imyaka itanu zihungiye mu Rwanda kubera impamvu za Politiki.

Umuvugizi wa HCR mu Rwanda, Elise Villechalane, yabwiye IGIHE ko impunzi zishaka gutaha mu gihugu cyazo zikomeje kwiyandikisha ku buryo icyiciro cya mbere kizava ku butaka bw’u Rwanda ku wa 27 Kanama.

Ati “Ku wa 27 Kanama nibwo icyiciro cya mbere kizagenda. Kugera ku wa Kabiri w’iki Cyumweru hari hamaze kwiyandikisha 694 kandi kwiyandikisha biracyakomeje.”

U Rwanda rucumbikiye impunzi z’Abarundi 71973, ni cyo gihugu cya gatatu gifite impunzi nyinshi z’Abarundi.

Minisitiri w’Ububanyi n’Amahanga, Dr Vincent Biruta, aherutse kubwira abanyamakuru ko nta mpunzi n’imwe yo mu Burundi yigeze ibuzwa gutaha ndetse ko mbere y’umwaduko wa Coronavirus, nibura 200 zatahaga buri munsi.

Ati “Kuvuga ko twafata impunzi bugwate keretse niba n’ibindi bihugu aho ziri hose ariko bimeze, nta n’inyungu twaba dufite yo kugumana ziriya mpunzi kuko kwakira impunzi ni igikorwa cy’ubutabazi abari mu kaga. Ni byo byakozwe mu gihe impunzi zazaga zigana mu bihugu bitandukanye harimo n’u Rwanda, ntabwo rero hari inyungu iyo ariyo yose yo kubuza impunzi gutaha iwazo.”

Biruta yashinje Leta y’u Burundi ubushake buke mu gukemura iki kibazo cy’abaturage bayo, avuga ko hari Abarundi bamaze igihe mu Rwanda, baje mu buryo bwemewe n’amategeko mu bikorwa bitandukanye birimo no kwivuza, ariko bashatse gutaha u Burundi burabangira.

Ati “Biratangaje kumva u Rwanda rushobora kuregwa ko rwafashe bugwate impunzi mu gihe hano hari Abarundi bahamaze iminsi bageze ku 136 baje mu buryo butandukanye, bamwe bari mu ngendo igihe imipaka yafungwaga, bamwe bari baraje kwivuza hano, basabye gutaha i Burundi barabangira.”

“Bamaze iminsi bari aha, ndetse na Ambasade yabo hano yaje muri Minisiteri y’Ububanyi n’Amahanga gusaba ko twabafasha ngo batahe turabikora ariko u Burundi bwanga kubakira. Rero uyu munsi ku ruhande rumwe ntibashaka kwakira abantu bari hano baje mu buryo buzwi bamwe ndetse baje bafite n’impushya basabiwe n’igihugu cyabo ariko barangije kwivuza, gutaha biba ikibazo.”

Kuva mu mpera za Werurwe 2015, impunzi z’Abarundi zatangiye kwinjira mu Rwanda, ruzishyiriraho inkambi z’agateganyo i Gashora n’i Nyanza mbere yo kwimurirwa i Mahama mu Karere ka Kirehe, izindi ziguma mu Mijyi ya Kigali na Huye.

Izi mpunzi ubwo zageraga mu Rwanda, zatujwe neza zihabwa ibikoresho nkenerwa byose

 16,386 total views,  1 views today

7 Comments

Leave a Reply

Your email address will not be published. Required fields are marked *

Scroll Up