Saturday, September 26
Shadow

Udupfukamunwa miliyoni 3.1 twabuze abaguzi, tugiye kugurirwa abatishoboye

Share

Umuyobozi uhagarariye inganda zikora udupfukamunwa, Andrew Kanyonya, yavuze ko hari ibiganiro hagati y’inganda n’abafatanyabikorwa b’Ikigo Gishinzwe Ubuzima, RBC, bigamije kugura udupfukamunwa turenga miliyoni eshatu turi mu bubiko, tugahabwa abatabasha kutwigurira.

Mu ntangiriro za Kamena 2020 abayobozi b’inganda zitandukanye batangarije IGIHE ko bari mu bihombo kubera udupfukamunwa bakoze, twaheze mu bubiko.

Ibyo ngo byatewe n’uko hari abandi bakoze ututemewe tugacuruzwa ku masoko hirya no hino mu gihugu, gutizanya ku bagize umuryango, abatuye mu byaro batigeze batugura n’ubushobozi buke kuri bamwe batabashije kutwigurira.

Umuyobozi Mukuru w’uruganda Ufaco & Vlisco, rwari rwariyemeje gukora udupfukamunwa ibihumbi 60 ku munsi, Hitimana Saidi, yavuze ko iyo ntego bari bihaye bayigendeyeho ukwezi n’igice, utwo bari barakoze tukagurwa hagasigara ibihumbi 100.

Icyakora yabwiye IGIHE ko kugeza ubu bahagaritse gukora udupfukamunwa, bakora gusa utwo basabwe n’abantu cyangwa ibigo runaka bidukeneye, mu rwego rwo kwirinda ibihombo.

Umuyobozi wa Kigali New Designers akaba n’uhagarariye inganda zikora udupfukamunwa, Andrew Kanyonya, yabwiye IGIHE ko isoko ry’udupfukamunwa bakoraga risa n’aho ryarangiye, ariyo mpamvu inganda n’ibigo bidukora byahisemo kujya bikora duke twasabwe n’abantu cyangwa ibigo bidukeneye.

Ati “Isoko ryaramanutse cyane urebye ni rike cyane, ni nk’iridahari. Abenshi baratuguze kubera ko tumeswa ntabwo basubirayo cyane kandi urebye abo mu cyaro bibereye mu mirima yabo ntatwo baguze.”

Yavuze ko kugeza ubu mu bubiko inganda zaduhurizagamo hakirimo udupfukamunwa miliyoni eshatu n’ibihumbi 100.

Mu rwego rwo kurinda abanyenganda ibyo bihombo no gufasha abanyarwanda batabasha kwigurira udupfukamunwa, yavuze ko hari ibiganiro hagati ya RBC n’abafatanyabikorwa bayo, bigamije kureba uko twagurwa tugahabwa abatabasha kutwigurira kubera ubushobozi buke.

Ati “Uduhari ni miliyoni eshatu n’ibihumbi 100. Turi kuganira n’abafanyabikorwa bafatanya na RBC kandi ngira ngo nabonye na leta yarabemereye kugira ngo duhabwe abadashobora kutwigurira.”

Ku wa 17 Mata 2020 nibwo kwambara agapfukamunwa byagizwe itegeko kuri buri muturarwanda. Hahise hashyirwaho ibigo n’inganda bigomba kudukora 21 byaje kongerwa bigera kuri 76, kugira ngo hakorwe vuba udukenewe. Mu Cyumweru kimwe hari hamaze gukorwa utugera kuri miliyoni 1.6.

Byari byitezwe ko hakorwa nibura uturenga miliyoni esheshatu, mu byumweru bibiri, ukwezi kuzajya gushira zimaze gukora miliyoni 12.

Ibyo byari byabazwe hagendwe ku gihe agapfukamunwa kambwarwa n’inshuro kameswa kakajugunywa, ku mubare w’abanyarwanda bagomba kukambara n’ibindi.

Nyamara ibihombo byagaragaye hamaze gukorwa miliyoni esheshatu, bivuze ngo nibura muri miliyoni 10 z’abaturarwanda byari biteganyijwe ko batwambara, haburaga utundi miliyoni enye.

Udupfukamunwa miliyoni 3.1 twabuze abaguzi, tugiye kugurirwa abatishoboye

 3,872 total views,  1 views today

22 Comments

Leave a Reply

Your email address will not be published. Required fields are marked *

Scroll Up