Saturday, September 26
Shadow

Gisagara: Yatawe muri yombi akurikiranyweho icyaha cyo kwica umugore we amutemye

Share

Umugabo wo mu Murenge wa Muganza mu Karere ka Gisagara yatawe muri yombi n’Urwego rw’Igihugu rw’Ubugenzacyaha, RIB, akurikiranyweho icyaha cyo kwica umugore we amutemye.

Icyo cyaha uwo mugabo witwa Nkurabanga Laurent akekwaho cyabaye ku mugoroba wo kuri uyu wa Gatutu ariko yafashwe mu gitondo cyo kuri uyu wa Kane.

Amakuru aturuka mu Murenge wa Muganza avuga ko uwo mugabo yasabye umugore we witwa Ntabuzaza Domitria amafaranga 200 yo kunywera ayamwimye ahita amutemaijosi n’akaboko.

Umunyamabanga Nshingwabikorwa w’agateganyo w’Umurenge wa Muganza, Nkunda Alexis, yabwiye IGIHE ko amakuru y’ibanze bamenye ari uko bapfuye amafaranga 200.

Ati “Ejo nimugoroba umugore avuye mu murima guhinga yahuye n’umugabo we, umugabo yamusabye amafaranga 200 yo kunywera inzoga undi arayamwima, yahise amukubita inkoni yari afite aranamutema. Yamutemye ku kaboko n’ijosi.”

Akimara kumutema ntabwo yahise apfa ahubwo yahungiye mu rugo rw’umuturanyi aba ariho agwa.

Nkurabanga Laurent w’imyaka 48 n’umugore we Ntabuzaza Domitria w’imyaka 55 bari bamaze imyaka igera ku 10 babana mu buryo butemewe n’amategeko ariko ntabwo bigeze babyarana umwana.

Bamwe mu baturanyi babo bavuga ko bari babanye neza, batagirana amakimbirane ariko mu minsi ishize bigeze gukimbirana bapfa ko umugabo yagurishije imbuto zabo zihinze mu gishanga cy’Akanyaru ariko akabeshya umugore ko atazigurishije kuko yabuze umuguzi.

Nyuma umugore ngo yaje kumenya ko yazigurishije akabimuhisha bituma bakimbirana ariko baza kwiyunga birarangira.

Umunyamabanga Nshingwabikorwa w’agateganyo w’Umurenge wa Muganza, Nkunda Alexis, yasabye abaturage kwirinda amakimbirane no gukemura ibibazo bafitanye binyuze mu biganiro birinda ibyaha bishobora kuvamo n’urupfu.

Yibukije ko abafite amakimbirane bajya biyambaza imiryango cyangwa ubuyobozi bukabafasha kuyakemura.

Umurambo wa nyakwigendera wajyanywe ku bitaro bya Kibilizi gusuzumwa naho Nkurabanga Laurent ukekwaho kumwica afungiye kuri sitasiyo ya RIB ya Muganza.

 9,418 total views,  1 views today

4 Comments

Leave a Reply

Your email address will not be published. Required fields are marked *

Scroll Up