Saturday, September 26
Shadow

Ingufu zisubira ni urwego ruzahanga imirimo mu Rwanda mu myaka 10 iri imbere

Share

Raporo y’Ikigo Mpuzamahanga cy’Abanyakoreya cyita ku bidukikije (Global Green Growth Institute), yagaragaje ko intego z’u Rwanda zo gushora imari mu ngufu zisubira, zishobora kuzahanga imirimo itaziguye ibarirwa mu 31,000 buri mwaka.

Iyi raporo yiswe ‘Isesengura ry’imirimo mu rwego rw’ingufu zisubira’, yagaragaje ko kugera ku ntego mu bijyanye n’ingufu zisubira, bishobora kuzahanga imirimo myinshi ariko bisaba ko nibura igihugu gishora miliyoni $645 mu mishinga y’ingufu zikomoka ku zuba no ku mazi.

Iyi nyigo yari igamije gukora isesengura ku mahirwe yo guhanga imirimo ari mu ngufu zisubira hashingiwe ku hazaza h’urwego rw’ingufu mu Rwanda, Mexique na Indonesia.

Igaragaza kandi ishoramari rikenewe kugira ngo intego zo gukoresha ingufu zisubira zigerweho nk’uko biri mu ngamba u Rwanda ruherutse gushyikiriza Umuryango w’Abibumbye zijyanye no guhangana n’imihindagurikire y’ibihe mu myaka 10 iri imbere, ni ukuvuga 2030.

Raporo ivuga ko “Inyongera ya Megawatt 171 zituruka ku ngufu zisubira zikenewe mu ntego ihari, izatanga imirimo itaziguye 31,000. Ishoramari ritaziguye mu ngufu zisubira muri iyi gahunda, rishobora kuzongera miliyoni $316 ku gaciro k’ubukungu bw’u Rwanda”.

Imirimo izahangwa, imyinshi ingana na 69%, izaturuka ahanini mu mishinga y’ingufu zituruka ku mazi n’amashanyarazi izubakwa. Raporo yerekana ko ibikorwa ndetse no kubungabunga imishinga bizahanga imirimo ingana na 22%, mu gihe ibindi bikorwa birimo; gukora kwayo, ibikoresho, gukwirakwiza ingufu n’ibindi bizahanga hagati ya 6% na 3% by’imirimo yose.

Inyigo yerekanye ko imirimo irenga 75% ishingiye ku ngufu zisubira zituruka ku zuba, izaba ari iy’ibijyanye na tekiniki n’indi mirimo itari iya kinyamwuga isaba ubumenyi buciriritse. Ni mu gihe imirimo iri munsi ya 25% ari yo izakenera ubumenyi buhambaye nk’abenjeniyeri n’abayobozi.

Raporo yerekana ko gushora imari mu ngufu zisubira bizahanga imirimo ariko bikanagira uruhare mu kuzamura ubukungu bw’igihugu no kugabanya ingaruka z’imihindagurikire y’ibihe.

Ikigo mpuzamahanga gishinzwe ingufu (IEA), gitangaza ko urwego rw’ingufu rugira mu kugabanya 42 ku ijana by’imyuka ihumanya ikirere.

U Rwanda rukeneye ingengo y’imari ingana na miliyari 11 z’amadolari kugira ngo izi ngamba zo guhashya imihindagurikire y’ibihe zishyirwe mu bikorwa. Ibikorwa bijyanye no guhashya imihindagurkire y’ibihe bizatwara Miliyari 5.7, mu gihe ibijyanye no guhangana n’ingaruka bizatwara Miliyali 5.3 z’amadolari.

U Rwanda kandi rurateganya gushora miliyoni $206 mu gukora inganda zitanga ingufu z’imirasire y’izuba zizatanga MW 68, mu gice cy’icyaro nibura mu 2030 mu gihe miliyoni $36 zizakoreshwa mu kubyaza imyanda ingufu.

Ruteganya kandi gushora miliyoni $285 mu gukoresha ingufu zikomoka ku mirasire y’izuba mu mishinga yo kuhira hagamijwe kongera umusaruro w’ubuhinzi. Izi ngufu zizasimbura mazutu n’ibindi bikomoka kuri peteroli byakoreshwaga.

Ingufu zisubira ni urwego ruzahanga imirimo mu Rwanda mu myaka 10 iri imbere

 2,063 total views,  1 views today

16 Comments

Leave a Reply

Your email address will not be published. Required fields are marked *

Scroll Up