Saturday, September 19
Shadow

Leta Zunze Ubumwe za Amerika yongeye kugira umubare munini w’abishwe na Coronavirus

Share

Leta Zunze Ubumwe za Amerika yongeye kugira umubare munini w’abishwe na Coronavirus, nyuma y’aho kuri uyu wa Gatatu tariki 21 Mata 2020, abantu 2 804 bapfuye.

Imibare igaragaza ko abapfuye muri iki gihugu biyongereyeho abarenga 800, kuko tariki 20 Mata uyu mwaka, abari bapfuye bari 1 939.

Ibi byatumye imibare y’abamaze kwicwa n’iki cyorezo izamuka mu buryo bukomeye muri iki gihugu, kuko ubu bageze ku bantu 45 318 mu gihe n’abanduye bageze ku 818 744.

Nubwo Abanyamerika benshi bakomeje gupfa, hirya no hino muri iki gihugu abaturage bakomeje kugaragaza ko bifuza gusubira mu mirimo, ibintu bashyigikiwemo na Perezida Donald Trump.

Abamaze kwandura ku Isi nabo bakomeje kwiyongera mu buryo budasanzwe kuko abanduye bageze kuri 2 557 994 abamaze gupfa ni 177 688 mu gihe 695 355 bamaze gukira.

Leta ya New York ikomeje kugira abanduye n’abamaze gupfa benshi, kuko yonyine ifite abanduye 256 555 naho 19 693 bakaba bamaze gupfa.

Ibihugu bifite abanduye ndetse n’abapfuye benshi, ku mwanya wa mbere haracyari Leta Zunze Ubumwe za Amerika, Espagne iri ku mwanya wa kabiri aho ifite abantu 204 178 bamaze kwandura naho 21 282 bamaze gupfa, u Butaliyani bufite abanduye 183 957 mu gihe 24 648 bamaze gupfa.

Mu Bufaransa abantu 158 050 bamaze kwandura, abandi 20 796 bamaze gupfa.

U Budage bufite abanduye 148 453 mu gihe 5 086 bapfuye, u Bwongereza bufite abanduye 129 044 ariko abamaze gupfa ni 17 337.

Ku Mugabane wa Afurika, abantu 25 411 ubu bamaze kwandura Coronavirus, abamaze gupfa bageze ku 1 197.

Misiri iri imbere n’abamaze kwandura benshi kuko ari 3 490 mu gihe abamaze gupfa ari 264 , ikurikirwa na Afurika y’Epfo ifite abanduye 3 465 abapfuye ho bageze kuri 58.

Algeria niho hamaze gupfa abantu benshi muri Afurika kuko ari 392 mu gihe abamaze kwandura ari 2 811.

Muri Afurika y’Iburasirazuba, Kenya niyo ikomeje kugira abanduye benshi kuko ubu bageze kuri 296 mu gihe abamaze gupfa ari 14 , mu Rwanda hamaze kuboneka abantu banduye 150 ariko abamaze gukira bageze kuri 84, Uganda abanduye ni 61, muri Tanzania hamaze kuboneka abantu 254 hamaze gupfa 10, mu Burundi abanduye ari 11,umwe ariwe umaze gupfa naho Sudani y’Epfo ari bane banduye.

Abicwa na Coronavirus muri Amerika bakomeje kwiyongera mu buryo budasanzwe

 68,570 total views,  2 views today

4 Comments

Leave a Reply

Your email address will not be published. Required fields are marked *

Scroll Up