Thursday, July 2
Shadow

Polisi y’u Rwanda yatangaje ko harimo gukorwa iperereza ku bikorwa bitandukanye byavuzwe ku mpunzi ziri mu nkambi y’agateganyo ya Gashora,

Polisi y’u Rwanda yatangaje ko harimo gukorwa iperereza ku bikorwa bitandukanye byavuzwe ku mpunzi ziri mu nkambi y’agateganyo ya Gashora, birebana n’imyitwarire mibi ya bamwe mu bihe byo Kwibuka n’ibyo gukumira Coronavirus.

Iyi nkambi ya Gashora icumbikiye impunzi zavanwe muri Libya, zageze muri icyo gihugu zishaka kujya i Burayi ariko zibura uko zirenga Méditerranée, zisanga zitangiye gukorerwa icuruzwa ry’abantu no gutotezwa n’imitwe yitwara gisirikare.

Nubwo u Rwanda rwemeye kuzakira, benshi muri bo bakomoka mu bihugu byo mu ihembe rya Afurika bakomeje kugaragara ko indoto zabo ari ukujya i Burayi ndetse hari n’ababonye ibihugu bibakira, abandi baracyategereje.

Amakuru yo mu nkambi ya gashora yagiye hanze nyuma y’ubutumwa bwashyizwe kuri Twitter n’uwitwa Andrea Gagne, wavugaga ko “Impunzi zavanywe muri Libya zicumbikiwe mu nkambi ya Gashora mu Rwanda zifite ububabare bushya bukomeye, nyuma y’uko umupolisi ahohoteye umuhungu w’imyaka 16 wo muri Eritrea.”

Yavuze ko ku wa 13 Mata ahagana saa kumi n’ebyiri n’igice z’umugoroba, abana bane bato bagarutse mu nkambi, bajyanwa ku nyubako ya polisi bafungwa amasaha ane kugeza umupolisi uhayobora agarutse, yasinze.

Ngo yategetse umwe mu bana kuvanamo imyenda, yanze gukuramo ikabutura y’imbere amukubita inkoni, anavanamo imbunda arayimukangisha.

Yakomeje ati “Uyu musore w’imyaka 16 yashoboye gutoroka ndetse icyo gikorwa kimenyeshwa UNHCR n’abayobozi b’inzego z’ibanze. Uyu munsi (nyuma y’amasaha 24 icyo gikorwa kivuzwe) umugenzuzi yaje kubaza uwo mupolisi n’uwahohotewe, ariko nta yindi ntambwe yatewe ngo uwo mupolisi akurwe aho.”

“Uyu muyobozi aracyafite uburenganzira bwo kugera ku bari mu nkambi – harimo n’umwana muto bikekwa ko yahohoteye. Abari mu nkambi basanganwe ihungabana rikomeye ryatewe n’ihohoterwa bahuye naryo mu myaka bamaze muri Libya, mu maboko y’abacuruza abantu n’imitwe yitwara gisirikare.”

Ni mu gihe ngo kudahabwa ubufasha no kutamenyeshwa ibirimo gukorwa, byongera ihungabana basanganwe n’impungenge ku bari mu nkambi.

Polisi y’u Rwanda yahise isobanura uko byagenze, ivuga ko bitewe n’ingamba zashyizweho zo kuguma mu rugo mu gukumira icyorezo cya Covid-19, ubuyobozi bw’Inkambi y’agateganyo ya Gashora, UNHCR na American Refugee Committee, bemeje ko buri munsi hatangwa uruhushya rw’amasaha abiri ngo abari mu nkambi bajye guhaha.

Gusa ngo ku wa 14 Mata, batatu bavuye mu nkambi saa munani z’amanywa, batinda hanze bagaruka saa kumi n’ebyiri n’igice z’umugoroba. Ngo bashyizwe ahantu habugenewe hafi y’umuryango w’inkambi, biza kugaragara ko basinze.

Polisi yakomeje iti “Umupolisi uhayobora n’abandi bapolisi babiri bahisemo kubasaka nk’uko bigenda, ariko umwe ariruka yinjira mu icumbi. Mbere yaho ku wa 6 Mata, ubuyobozi bw’inkambi bwemeranyije n’abayibamo bose kudakoresha ibicurangisho by’umuziki mu cyumweru cyo Kwibuka Jenoside hagati ya tariki 7-13, kubera ko bisanzuraga bagatera urusaku, rukagera mu baturiye inkambi.”

“Ku wa 12 Mata ahagana saa kumi n’imwe z’umugoroba, Polisi yafashe ibikoresho by’umuziki nyuma y’uko abatuye inkambi bahitagamo kubikoresha barenze ku byari byemeranyijwe. Bijyanye no kutishima kwabo kubera ingamba zo kuguma mu rugo zababujije gusohoka mu nkambi uko bashaka, bahisemo gushaka uko bahimba inkuru y’ihohoterwa ryo ku mubiri no kugerageza irishingiye ku gitsina.”

Polisi yavuze ko ibyavuye mu iperereza ry’ibanze bigaragaza ko uwatanze ikirego yuririye muri ibyo ngo ashake guhunga kuba yahanirwa kurenga ku masaha yo kuba bari mu nkambi, azamura ibindi bibazo bijyanye n’ibiribwa bahabwa, serivisi z’ubuvuzi, ndetse n’abapolisi bari mu nkambi.

Yavuze ko ibyo bibazo byasobanuwe hari umuyobozi w’inkambi, Umuyobozi w’Akarere ka Bugesera aho iyi nkambi iherereye n’abahagarariye UNHCR, ndetse iperereza rirambuye ririmo gukorwa n’inzego zibishinzwe.

Kwakira izi mpunzi z’Abanyafurika ni icyemezo Perezida Kagame yafashe nyuma y’uko mu 2017 hagaragaye uburyo zateshwaga agaciro muri Libya bamwe bagacuruzwa nk’abacakara abandi bagakorerwa iyicarubozo.

Ku wa 10 Nzeri nibwo amasezerano yo kwakira impunzi 500 yashyizweho umukono ku cyicaro cy’Umuryango wa Afurika yunze Ubumwe (AU) i Addis Ababa hagati ya Guverinoma y’u Rwanda, AU n’Ishami ry’Umuryango w’Abibumbye ryita ku mpunzi, UNHCR.

Andrea Gagne@AndreaGagne

Refugees evacuated from Libya to the Gashora camp in Rwanda are facing a new, deep pain after a commander assaulted a 16-year-old Eritrean boy.
𝘞𝘢𝘳𝘯𝘪𝘯𝘨: 𝘛𝘩𝘦 𝘵𝘩𝘳𝘦𝘢𝘥 𝘣𝘦𝘭𝘰𝘸 𝘥𝘪𝘴𝘤𝘶𝘴𝘴𝘦𝘴 𝘱𝘩𝘺𝘴𝘪𝘤𝘢𝘭 𝘢𝘯𝘥 𝘢𝘵𝘵𝘦𝘮𝘱𝘵𝘦𝘥 𝘴𝘦𝘹𝘶𝘢𝘭 𝘢𝘴𝘴𝘢𝘶𝘭𝘵

View image on Twitter

Rwanda National Police@Rwandapolice

1/7
During the Covid-19 pandemic lockdown, Gashora Transit Camp Management, UNHCR and American Refugee committee agreed to daily permission of two hours for camp residents to go shopping.

30 people are talking about this

Inkambi icumbikiye impunzi zavuye muri Libya iri i Gashora mu Karere ka Bugesera

 40,298 total views,  2 views today

Leave a Reply

Your email address will not be published. Required fields are marked *

Scroll Up