Tuesday, September 29
Shadow

Minisiteri y’Ubucuruzi n’Inganda (MINICOM) yahanishije amande ibigo by’ubucuruzi 24 kubera kuzamura ibiciro

Share

Minisiteri y’Ubucuruzi n’Inganda (MINICOM) yahanishije amande ibigo by’ubucuruzi 24 kubera kuzamura ibiciro, kutamanika ibiciro no kudatanga inyemezabwishyu, byose bikaba bimaze kwishyura amafaranga y’u Rwanda angana na miliyoni imwe n’ibihumbi 680.

Ku wa 16 Werurwe 2020 nibwo MINICOM yasohoye itangazo risobanura ko hari abacuruzi bamwe bitwaje ko igihugu kirimo guhangana na Coronavirus bakuriza ibiciro, ibihanangiriza ko bitemewe kandi ko uzabifatirwamo azahanwa.

Iryo tangazo ryavugaga ko “Raporo y’igenzura ryakozwe ku masoko atandukanye yo mu Mujyi wa Kigali n’intara zose z’igihugu, yagaragaje ko hari ibicuruzwa bimwe byazamuriwe ibiciro, bamwe mu bacuruzi bitwaje ko igihugu kiri mu bihe bidasanzwe byo guhangana n’icyorezo cya Coronavirus.”

Minicom yasabye abacuruzi kwirinda kuzamura ibiciro by’ibicuruzwa byaba ibikorerwa imbere mu gihugu cyangwa ibiva hanze yacyo, kumanika ibiciro by’ibicuruzwa ku buryo bigaragarira abaguzi.

Hari kandi kwirinda gutanga inyemezabwishyu zidahwanye n’amafaranga bakiriye, kwirinda gukoresha ibipimo bitujuje ubuziranenge cyangwa gutanga ibicuruzwa byarengeje igihe no kwirinda kubangamira abagenzuzi b’ubucuruzi igihe baje babagana.

Kuri uyu wa Kane, tariki 19 Werurwe 2020, Minicom n’izindi nzego bakoze igenzura rigamije kureba ko ibyo basabye byubahirizwa.

Ni igenzura ryakozwe ku masoko manini n’ahandi hakorerwa ubucuruzi mu Mujyi wa Kigali, aho byagaragaye ko hari abacuruzi bazamura ibiciro ku biribwa, abandi bagakoresha iminzani idafite ubuziranenge hakaba n’abatanga inyemezabwishyu zitajyanye n’ibyaguzwe.

Itangazo iyi minisiteri yashyize hanze nyuma y’iryo genzura ryashyizweho umukoni na Minisitiri Hakuziyaremye Soraya rigira riti “Kugeza ubu Minisiteri y’Ubucuruzi n’Inganda imaze guhanisha amande ibigo by’ubucuruzi 24 mu Mujyi wa Kigali. Bose hamwe bamaze kwishyura 1 680 000 Frw.”

Imbonerahamwe yerekana uko abacuruzi bahanwe yerekana ko abenshi bagera kuri 16 ari abo muri Nyarugenge bahaniwe kutamanika ibiciro, Kimironko muri Gasabo hahanwe bane nabo bazize kutamanika ibiciro, Kagugu naho muri Gasabo hahanwa umwe wazize kudatanga inyemezabuguzi mu gihe mu isoko rya Ziniya muri Kicukiro hahanwe babiri batari bamanitse ibiciro.

MINICOM yasabye abacuruzi kubahiriza amabwiriza n’amategeko kuko ibihano byateganyijwe kandi bikarishye. Inavuga ko ubugenzuzi nk’ubwo buzakomeza.

Uretse gucibwa amande ingingo ya 27 n’iya 29 y’itegeko No 35/91 ryo ku wa 5 Kanama 1991 rigenga imitunganyirize y’ubucuruzi bw’imbere mu gihugu , yerekena ko leta ishobora gutanga ihazabu y’inyongera, isaba uwagaragayeho uko kunyuranya n’amategeko kwishyura inyungu yungutse ku muguzi no guhagarika ibikorwa by’ubucuruzi byateye ayo makosa mu gihe cy’amezi atatu.

Indi nkuru wasoma: Bamwe mu bacuruzi bafatiwe ibihano kubera kuzamura ibiciro

Umunyamabanga Uhoraho muri Minisiteri y’Ubucuruzi n’Inganda (MINICOM), Michel Sebera, ari mu bayobozi bitabiriye igenzura ry’ibiciro mu masoko n’amaduko byo mu Mujyi wa Kigali

Igenzura ryakozwe ryitabiriwe n’abayobozi mu nzego zitandukanye

Abacuruzi bagaragaweho guhanika ibiciro bitwaje Coronavirus baciwe amande

Mu byo abacuruzi basabwe harimo no kumanika ibiciro by’ibicuruzwa byabo

Amwe mu makosa yatahuwe mu bacuruzi harimo no gukoresha iminzani itujuje ubuziranenge

 28,755 total views,  1 views today

Leave a Reply

Your email address will not be published. Required fields are marked *

Scroll Up