Sunday, July 5
Shadow

Kenya:Mu mpera za 2019 abangavu 379 573 barimo umwana w’imyaka icumi bari bamaze guterwa inda

Raporo nshya yashyizwe ahagaragara muri Kenya, yerekana ko kugeza mu mpera za 2019 abangavu 379 573 barimo umwana w’imyaka icumi bari bamaze guterwa inda, Guverinoma isaba inzego zose guhagurukira iki kibazo.

Raporo yatangajwe ku wa Gatatu igaragaza ko ikibabaje ari uko abangavu barenga 20 828 bo batewe inda bafite hagati y’imyaka 10 na 14.

Isesengura ry’iyi raporo rigaragaza ko nibura umwangavu umwe muri batanu bafite hagati y’imyaka 15 na 19, magingo aya atwite cyangwa yamaze kwibaruka, nk’uko Daily Nation yabitangaje.

Iyi mibare yakuwe mu ikoranabuhanga rikusanya imibare ijyanye n’ubuzima muri Kenya guhera mu mwaka wa 2011, ikusanywa n’Inama y’Igihugu Ishinzwe abaturage n’Iterambere, National Council on Population and Development.

Nubwo Guverinoma ikomeje gukoresha imbaraga nyinshi, raporo yerekanye ko abantu bakuru bakomeje gushora abana mu mibonano mpuzabitsina, bamwe bagatwariramo inda. Mu Ntara nka Narok, raporo yagaragaje ko abangavu babiri muri batanu, bamaze kwibaruka cyangwa se bitegura kubyara.

Umurwa Mukuru Nairobi utuwe n’abasaga miliyoni enye, uza imbere mu kugira umubare munini w’abana batewe inda, aho 2432 batwise bari munsi y’imyaka 14. Hakurikiraho Nakuru (1748), Kajiado (1523), Kericho (1006), Homa Bay (957) na Garissa (901).

Nairobi kandi ni nayo ifite benshi batwise bari mu cyiciro cyisumbuyeho kuko abangavu 24106 batewe inda bafite hagati y’imyaka 15 na 19.

Raporo ikomeza iti “Nibura abangavu 26 ku ijana bo mu miryango ikennye bafite ibyago byinshi byo gutwara inda, ugereranyije na 10% bo mu miryango ikize.”

Umuyobozi Mukuru ushinzwe Igenamigambi, Saitoti Torome, watangaje iyo raporo kuri uyu wa Gatatu, yavuze ko igihugu kiri mu mage.

Ati “Imibare ntabwo ibeshya, bityo niba ari ukuri, turi mu bihe by’amage.”

Torome yavuze ko mu batewe inda benshi banavuye mu ishuri, ubu urugamba ruhari ni ukubasubizamo, mu gihe abenshi babyanga kubera ipfunwe.

Kugeza ubu uburere butangwa n’ababyeyi no kuba hadatangwa ubumenyi ku bijyanye n’ubuzima bw’imyororokere, bikomeje gutungwa agatoki kuri ibi byago bikomeje kwibasira abangavu.

Kenya yugarijwe n’ikibazo cy’abana baterwa inda

 56,295 total views,  1 views today

Leave a Reply

Your email address will not be published. Required fields are marked *

Scroll Up