U Rwanda rwahagaritse ibirego ku banya-Uganda 15 bari bafunzwe

Umunyamabanga wa Leta muri Minisiteri y’Ububanyi n’Amahanga, Olivier Nduhungirehe, yavuze ko u Rwanda ruheruka gufata icyemezo cyo gukura ibirego ku banya-Uganda 15, rusaba ko abaturage barwo bose bafungiwe muri Uganda binyuranyije n’amategeko barekurwa.

Kuri uyu wa Gatanu nibwo i Kigali hakoraniye inama ya gatatu ihuje komisiyo ihuriweho y’u Rwanda na Uganda, yitabiriwe n’ibihugu bya Angola na Repubulika Iharanira Demokarasi ya Congo nk’abahuza, hagamijwe gushakira umuti ibibazo bimaze iminsi hagati y’ibihugu byombi.

Minisitiri w’Ububanyi n’Amahanga wa Uganda, Sam Kutesa, yavuze ko bijyanye n’amasezerano ya Luanda aheruka gusinywa n’u Rwanda na Uganda, “mu buryo bwo gushaka gusubiza umubano ku murongo, Uganda yakuyeho ibirego ku banyarwanda icyenda bari bakurikiranweho gutunga intwaro binyuranyije n’amategeko.”

Ku wa 9 Mutarama 2020 nibwo abo bantu icyenda bashyikirijwe inzego z’u Rwanda, bagarurwa mu gihugu,

Kutesa yakomeje ati “Ndasaba u Rwanda kubikora gutyo narwo ku Banya-Uganda basaga 50 bafungiwe mu Rwanda.”

Gusa ubwo yari afashe ijambo, Amb Nduhungirehe yavuze ko uyu munsi hari abanya-Uganda icyenda barimo kurangiriza ibihano mu Rwanda, kandi bemerewe guhura n’intumwa z’icyo gihugu nk’uko biteganywa n’amategeko, kandi bari ku rutonde u Rwanda rwakwishimira gutanga.

Yakomeje ati “Mu bijyanye n’amasezerano ya Luanda, u Rwanda narwo rwahagaritse gukurikirana mu mategeko abanya-Uganda 15, bararekuwe.”

Yavuze ko u Rwanda rusaba ko Abanyarwanda muri Uganda nabo bafatwa gutyo, ndetse rugaragaza ibintu bitandukanye rusaba Guverinoma ya Uganda, harimo gufata abakorana n’imitwe ya RUD Urunana baheruka kugaba ibitero mu Kinigi, byahitanye abaturage 14, ubu bakaba bacungiwe umutekano n’inzego za Uganda.

Yagize ati “Icya mbere ni ugusenya ibikorwa bya RNC na RUD Urunana muri Uganda no gufata ndetse bakohereza mu Rwandaa ababigizemo uruhare, kugira ngo bagezwe imbere y’ubutabera mu Rwanda.”

Yavuze ko Uganda ikwiye guhagarika ibikorwa byose bigamije guhungabanya umutekano wa Repubulika y’u Rwanda no gukuraho impungenge zose zituma bibaho.

Yakomeje ati ”Icya gatatu ni uguhagarika pasiporo ya Uganda No A000199979 yahawe Charlotte Mukankusi na Guverinoma ya Uganda, uyu akaba asanzwe ari komiseri muri RNC ushinzwe dipolomasi, imufasha kujya muri Uganda mu bikorwa bya RNC.”

Ikindi ngo ni ugukurikirana abantu bakorana na RNC na RUD Urunana barimo Umunyamabanga wa Leta Philemon Mateke, Brig Gen Abel Kandiho uyobora CMI, Brig Gen Fred Karara, Col Sike Asiimwe, Major Fred Mushambo, Col Kaka Bagyenda n’abandi bayobozi bagira uruhare muri ibyo bikorwa.

Icya gatanu ni ukohereza mu Rwanda umubiri wa Samuel Mageza no gutanga ibisobanuro ku rupfu rwe, kimwe n’abandi banyarwanda babiri, Sendegeya Theogene na Rwembo Mucyo boherejwe mu bitaro bya Butabika bavanwe muri CMI, nyuma bakaza kuburirwa irengero.

Ikindi ni ukwemerera umunyarwandakazi Julienne Kayirere kongera guhura n’umwana we Joanna Imanirakiza wari umaze ukwezi kumwe, nyuma yo kubatandukanyiriza muri Uganda ubwo yafatwaga ku wa 29 Ugushyingo 2018 mu karere ka Mubende.

Nduhungirehe yakomeje ati “Ikindi ni ukurekura nta mananiza abanyarwanda bose bafungiwe muri Uganda mu buryo bunyuranyije n’amategeko.”

Yashimangiye ko inama zihoraho zitagera ku mwanzuro zidakwiriye, nyamara ngo nizo zagiye ziba kuva mu myaka itatu ushize, kandi igisubizo kiri hagati y’abayobozi b’ibihugu byombi.

Ibi biganiro byabereye kuri Minisiteri y’Ububanyi n’amahanga kuri uyu wa Gatanu

Umunyamabanga wa Leta muri Minisiteri y’Ububanyi n’amahanga, Nduhungirehe Olivier aramutsa abanyamakuru mbere y’inama na Uganda

Minisitiri Nduhungirehe, Ambasaderi w’u Rwanda muri Uganda, Frank Mugambage na Minisitiri w’Ubutegetsi bw’Igihugu, Prof Shyaka Anastase, bategereje intumwa za Uganda

Umunyamabanga wa Perezida Kagame, Col Patrick Karuretwa; Minisitiri w’Umutekano, Gen Patrick Nyamvumba; Minisitiri w’Ubutegetsi bw’igihugu, Prof Shyaka Anastase; Minisitiri w’Ububanyi n’amahanga wa Angola, Manuel Domingos Augusto n’Umunyamabanga wa Leta muri Minisiteri y’Ububanyi n’Amahanga, Olivier Nduhungirehe baganira

Abayobozi b’u Rwanda, Uganda, RDC na Angola bafashe ifoto y’urwibutso

Intumwa za Uganda mu biganiro n’u Rwanda

Minisitiri w’Ububanyi n’amahanga wa Angola, Manuel Domingos Augusto ageza ijambo ku bitabiriye inama

Minisitiri w’Intebe wungirije wa RDC akaba na Minisitiri w’Umutekano, Gilbert Kankonde

Minisitiri Kutesa yavuze ko Uganda izakora ibishoboka mu kuzahura umubano

20,186 total views, 1 views today

Leave a Reply

Your email address will not be published. Required fields are marked *

Scroll Up