Thursday, July 9
Shadow
Share

Ku wa 17 Ukuboza 2019 nibwo Safi Madiba na The Mane batandukanye Safi ashinja iyi nzu ireberera abahanzi kuba itarakurikije amasezerano yari afitanye nayo.

Umwuka mubi hagati ya Safi Madiba na The Mane watangiye gututumba ubwo uyu muhanzi yashyiraga hanze indirimbo “Ntimunywa” yakoranye na Dj Marnaud. Iyi ndirimbo igaragaramo ikirango cy’indi kompanyi ikora ibijyanye na muzika yitwa “Nukuri Music”.

Ntibyatinze, ku wa 31 Ukuboza 2019 Jay Polly nawe yahise atangaza ko yavuye muri The Mane Music Label icyo gihe Jay Polly abinyujije ku rukuta rwe rwa Instagram yemeje ko atandukanye na The Mane kubera kutubahiriza ibikubiye mu masezerano bagiranye bajya gukorana. Ikintu gikomeye yashinjaga The Mane ni uko bamukoreraga amashusho y’indirimbo mabi.

Kuri iki Cyumweru umuyobozi mukuru wa The Mane ndetse n’Umujyanama muri iyi nzu ifasha abahanzi bagiranye ikiganiro n’itangazamakuru batangaza byinshi bitari bizwi ku cyatumye aba bahanzi basezera.

Safi Madiba yikumiriye gusanga umugore we muri Canada

Bad Rama ati “Ntimunywa ntabwo aricyo kibazo dufitanye na Safi, iyo ubirebye neza usanga intandaro yo gusesa amasezerano ari amakosa menshi yari afite. Asohora iriya ndirimbo yise ‘Ntimunywa’ niyo yabaye imbarutso gusa yari ageze naho kuvanga kompanyi n’iyindi.”

Safi Madiba mu bintu yashinjije The Mane, harimo kutubahiriza amasezerano arimo kuba baragombaga kujya bamukorera indirimbo esheshatu zirimo ebyiri z’inyamahanga.

Bad Rama mu gusubiza yavuze ko Safi ameze nk’aho yirengagije ibyari byanditswe

Ati “Gukorera umuhanzi nibura indirimbo esheshatu mu gihe cy’umwaka ebyiri zikaba ari inyamahanga. Gusa umubare ukajya uganirwaho bitewe n’uko isoko rihagaze.”

“Niba umuntu waramwereye indirimbo esheshatu akazibona, uwa kabiri ntazibone ntabwo haba harabayeho kubangamirwa ahubwo harabayeho ko we yumvaga ko akazi kari gukorwa. Iyo abangamirwa yari kwandika ibaruwa agasezera.”

Avuga ko ariko igisekeje Safi atigeze yandika asaba guhura n’ubuyobozi bwa The Mane, ibintu bigaragaza ko ariwe wari uri mu makosa. Ikindi ngo n’uko The Mane ifite ibikoresho byose yaba ibikora amajwi cyangwa amashusho y’indirimbo, ku buryo nta kibazo cyari kubaho cyo gutunganya indirimbo.

Ikindi kuba uyu muhanzi (Safi Madiba) aherutse gutangaza ko yandikishije indirimbo zirimo izo The Mane ifiteho uburenganzira, ntacyo bivuze kuko yafashwe nk’uwiyitiriye ibihangano by’abandi.

Ku cyo kuba Safi Madiba yaratangaje kimwe mu byatumye atandukana na The Mane Music Label hari harimo kuba yaragombaga kumenyeshwa niba hari umuhanzi winjiye muri The Mane.

Bad Rama ati “Ariya masezerano ibirimo ni ibitekerezo bye n’uwitwa JD Kwizera bakoranye kera banabanje gukorana muri The Mane. Nibo bayanditse. Hari harimo n’ingingo ivuga iti Safi namara amezi atatu atari mu kazi icyo gihe azahita yishyuzwa ibimaze kumutakazwaho kuko bishobora gukekwa ko yasanze umugore we muri Canada.”

Bad Rama yavuze ko yari kwiga ingingo zirenze, iyo ajya kwiga uburyo agiye gukorana na Safi Madiba ariko we akaba yarabifashe nk’ubuvandimwe. Gusa, akemeza ko yamuhombeye kuko urebye amafaranga yamutakajweho n’ayo yatanzweho bidahuye.

Ubwo Safi yasinyaga amasezerano muri The Mane Music Label

Bad Rama yitumiye mu bukwe bwa Safi

Muri iki kiganiro Bad Rama yavuze ko yicuza bikomeye kuba yarakoranye na Safi Madiba, gusa na none ngo yabikoze atazi ko azakora ubukwe kuko yabumenye habura iminsi ibiri ngo bube.

Ati “Safi Madiba ava muri Urban Boyz sinabimenye kandi yari inshuti yanjye dusangira buri munsi, twakoranaga bya hafi. Natangiye kumugiraho ikibazo ubwo namenyaga ko azarongora habura iminsi, naritumiye. Nari ndi iwanjye ku kirwa mu Ruhengeri, turi kuganira numva batangiye gupanga iby’ubukwe. Icyo gihe nahise mpamagara Teta Sandra nti nkorera imyenda.”

Safi yishe amasezerano Bad Rama yagiranye na Urban Boyz

Bad Rama ati “Safi yaje kundeba ngo dukorane ambwira ko adashaka ikintu kizongera kumuhuza na bagenzi be. Urban Boyz twarakoranye cyane ninjye wabakoreye indirimbo bakoreye muri Uganda yitwa ‘Nipe’.”

Yavuze ko Safi yamwumvishije ko atari ku rwego rwa Urban Boyz ku buryo afite ubushobozi bwo kuba yakwikorana indirimbo cyangwa na we (Bad Rama) akaba yamufasha.

Ikindi kintu gikomeye kirimo ingaruka zo kubeshya ni ukuba Safi Madiba yarabangamirwaga n’uko Bad Rama yajyaga mu rugo rwa Nizzo cyangwa se Humble Jizzo.

Ati “Ingaruka zo kubeshya, Safi yatangiye kugira ikibazo ubwo najyaga njya gusura abo babanaga muri Urban Boyz. Safi agaca ku ruhande akajya kubwira Nsanzamahoro Dennis cyangwa se Rwasa (wamenyekanye cyane muri filime witabye Imana umwaka ushize) ko bitamushimisha kuko ari abanzi be. Icyo gihe ahubwo nahise mberurira ko namaze gupanga umushinga wo kumuhuza na Urban Boyz, ari nayo masezerano mwabonye dusinya.”

“Icyo gihe nashakaga ko Urban Boyz na Safi bakorana akazi, ni umushinga wantwaye $ 3 000. Ni amasezerano ahari ari mu bintu bimwe ndega Safi Madiba n’umubano ugatangira kuba ikibazo. Nararebye mbona aba bantu bakoranye yaba indirimbo cyangwa ibitaramo bishobora kubyara ikintu cyiza ariko byose Safi arabyica.”

Bad Rama yavuze ko igihe yasinyaga aya masezerano na Urban Boyz, Safi yahise amukorera Block ahantu ku buryo Rwasa ariwe wongeye gutuma bahura Safi akavuga ko bitakunda ko akorana na Urban Boyz.

Ati “Napanze umushinga na Urban Boyz, irangiye n’amasezerano yabaye Safi Madiba ifoto ya mbere igisohoka ahita ankumira (Block). Mbajije Queen Cha ambwira ko atazi aho ari. Murumuna wanjye niwe wambwiye ati Safi yanyandikiye ambwira ko amasezerano wasinye na Urban Boyz arangije The Mane. Nagiye kwa Rwasa kuko niwe watwungaga kuko niwe wagiraga uruhare mu kongera kwiyunga kwacu. Ndamubwira nti duhuze, arabikora umusore arampakanira ko batakorana.”

Uretse iby’akazi, ngo Safi icyo gihe yabwiye Bad Rama ko bafitanye amakimbiranye yihariye ku buryo adashaka kuzongera guhura n’umwe muri bo.

Jay Polly yakoze amakosa akomeye arimo no gukorera amafaranga y’intica ntikize

Bad Rama avuga ko ikintu cya mbere cyatumye Jay Polly asezererwa ari imyitwarire mibi yagiye agaragaza irimo ubusinzi no gukorera amafaranga y’intica ntikize kandi akayakorera atamenyesheje umukoresha we (Bad Rama).

Bad Rama ati “Aristide yaje muri The Mane kugira ngo akureho ikibazo cy’imyitwarire mibi. Imwe mu yo Jay Polly yagiye agaragaza harimo kuba uyu muraperi yaracuruzaga ku giti cye akica izina rya The Mane n’irye. Hari aho byageze turamubwira tuti tubabarire ugende ukorere ibyo bihumbi 20 cyangwa 30 ariko ureke kutwicira izina.”

Uyu muraperi ngo yagiye asiba ibitaramo kandi The Mane yishyuwe bikabicira akazi, ikindi ni uko ngo yagiye agaragaza ubusinzi bukabije bigatuma yica akazi.

Bad Rama ati “Jay Polly twagiye tugirana ibibazo by’ubusinzi bigatuma yica akazi n’izina kandi ibihamya birahari. Umunsi wa mbere ava muri gereza yarasinze n’amashusho arahari. Ninjye wagiye kumwiterurira, kuko baravuga ngo nyir’umupfu niwe uterura ahanuka.”

Bad Rama ngo hari aho yageze akajya ahamagarwa n’abantu bumvikanye na Jay Polly ko ataramira mu kabari kabo isaha zagera bakamubura.

Ati “Byageze ahantu kuryana binanira nkabona umugabo wa Nyabugogo arampamagaye ambwira ko yari kuririmba mu gitaramo mu kabari ke ariko bakaba bamubuze, nkamubwira ko atakambajije iby’icyo gitaramo kuko bavugana ntari mpari.”

Ngo hari igihe The Mane yigeze gupanga igitaramo cya Jay Polly abizi ko agomba kuza kukiririmbamo, undi akigira kuririmbira 45 000 Frw i Musanze.

Uyu muhanzi ngo kubera ibi bitaramo yagiye akora kandi mu masezerano bikaba byaravugaga ko umuhanzi ukoze igitaramo ku giti cye bikamenyekana acibwa amafaranga akubye inshuro eshatu ayo yishyuwe. Yasezeye muri The Mane Music Label arimo umwenda wa 1 800 000 Frw.

Jay Polly yahawe ibaruwa yo kumwihanangiriza nyuma y’amezi atatu ahita asezera.

Ikindi uyu muhanzi yasezeye hashize iminsi mike agurijwe ibihumbi 400 Frw, nyuma yo kubura ubwishyu bw’ubukode.

Ati “Jay Polly yarampamagaye nk’umubyeyi we ndamufasha, yampamagaye ndi muri Amerika ambwira ko yabuze ubwishyu bwa 400 000 Frw, niba ari amadeni yabonye amaze kuba menshi hashize iminsi ahita asezera.”

Ku cyo kuba uyu muhanzi yaravuze ko yasezeye kubera gukorerwa amashusho y’indirimbo mabi, The Mane ivuga ko bamukoreraga indirimbo zijyanye n’uko yari asigaye yitwara kuko batari kumushoraho amafaranga arenga miliyoni 200 kandi bazi ko asigaye akorera ibihumbi 20 Frw.

Icy’amadeni Jay Polly yashinjije The Mane, Bad Rama ho avuga ko atari byo habe na gato.

Ikintu kinini cyakuye Jay Polly muri The Mane harimo n’ubusinzi

Iby’itoneshwa rya Queen Cha na Marina

Muri iki kiganiro n’itangazamakuru Bad Rama yabajijwe ikibazo cyagiye kivugwa kenshi ko atonesha Marina na Queen Cha mu gusubiza avuga ko byose biterwa n’imyitwarire y’aba bahanzi.

Ati “Rimwe na rimwe mujye mumenya gutandukanya ubushobozi umuntu afite no gutoneshwa. Icyo nshaka kuvuga ni iki Marina na Queen Cha bafite ubushobozi buruta ubwa bariya bahungu. Kugaragara nk’abatoneshwa byarikoraga kubera ishyaka ryabo kurusha Jay Polly na Safi.”

Yakomeje avuga nka Queen Cha ariwe ujya kwishakira abanyamakuru ngo akore akazi ndetse na Marina akaba agira ishyaka ryo kumenya uko Bad Rama yaramutse.

Bad Rama ati “Marina ni wa muhanzi ushobora kubyuka ambaza uko meze. Ntabwo wari kuzabona Jay Polly afite ikiganiro kuri Radiyo cyangwa Televiziyo ngo ubone aje wenyine, uzi impamvu ni ukutizera ikinyabupfura cye. Queen Cha niwe witwara kuri Radiyo na Televiziyo kuko ni wa muhanzi ubwira gahunda uko zimeze akazikurikiza. Ibyo hari abandi bahanzi mfite batabinkorera.”

Uyu mugabo yavuze ko Safi yakoze indirimbo zihenze z’abahanzi bo hanze y’u Rwanda, mu gihe indirimbo za Queen Cha na Marina bakoreye mu Rwanda bo ubwabo n’izo bakoranye n’abahanzi bo zakunzwe kurusha iza Safi, arangije ati “Umuntu akugaburira ntabwo wamukunda?”.

Yavuze ko imyitwarire ya Safi Madiba yayiha 50 % naho iya Jay Polly akayiha 35 %. Safi yavuye muri The Mane mu masezerano y’imyaka itatu yari afitemo asigajemo umwe naho Jay Polly yari asigaye ibiri muri itatu yari ahafite.

Dennis Nsanzamahoro wari inshuti cyane ya Safi niwe wamuturishaga igihe cyose yajyaga agirana ikibazo na Bad Rama

 131,530 total views,  2 views today

Leave a Reply

Your email address will not be published. Required fields are marked *

Scroll Up