Monday, March 30
Shadow

PAM ryatanze impuruza ku bagera kuri miliyoni 45 bugarijwe n’inzara muri Afurika y’Amajyepfo.

Ishami ry’Umuryango w’abibumbye ryita ku biribwa, PAM ryatanze impuruza nyuma y’uko ribaruye abantu bagera kuri miliyoni 45 bugarijwe n’inzara muri Afurika y’Amajyepfo.

PAM ivuga ko ahanini iyo nzara yatewe n’amapfa, imyuzure n’ihungabana ry’ubukungu byibasiye ibihugu byo mu Majyepfo ya Afurika.

Umuyobozi wa PAM muri Afurika y’Amajyepfo, Lola Castro yavuze ko iki kibazo cy’inzara ari ubwa mbere kigeze kuri urwo rwego.

Yagize ati “Iki kibazo cy’inzara kiri ku rwego tutigeze tubona mbere kandi ibimenyetso birerekana ko bizarushaho kuba bibi.”

PAM yavuze ko muri miliyoni 489 z’amadolari ikeneye ngo ihangane n’icyo kibazo, imaze kubona miliyoni 205 z’amadolari gusa. Ibyo biri gutuma benshi mu baturage bo muri Afurika y’Amajyepfo batabona amafunguro ahagije , abana bava mu ishuri abandi bagurisha duke bari basigaranye ngo babeho.

Uyu muryango uvuga ko kubera kwiyongera k’ubushyuhe muri icyo gice cya Afurika, byatumye ibihe by’ihinga bihinduka ku bahinzi b’amaramuko biganje muri ako gace, ku buryo mu myaka itanu ishize, nibura igihembwe kimwe ari cyo cyagenze uko bisanzwe.

Castro yavuze ko nibatabona amafaranga akenewe ngo bahashye iyo nzara, nta yandi mahitamo uretse gufasha abo bashoboye.

Ibihugu PAM igaragaza ko byibasiwe n’inzara harimo Eswatini, Lesotho, Madagascar, Malawi, Mozambique, Namibia, Zambia na Zimbabwe.

Loni igaragaza ko kimwe cya kabiri cya miliyoni 15 zituye Zimbabwe bafite ikibazo cy’ibura ry’ibiribwa cyababayeho karande.

Inyamaswa nazo ntizorohewe n’iyo nzara kuko imibare igaragaza ko nibura inzovu 200 muri Zimbabwe zapfuye mu mezi atatu ya nyuma ya 2019.

Abaturage 20 % muri Lesotho na 10 % muri Namibia nabo bafite ikibazo cy’inzara.

Mu Ukwakira umwaka ushize, Croix Rouge muri Zambia yatangaje ko amapfa yasize abaturage bagera kuri miliyoni 2.3 bashonje kubera ubuke bw’ibiribwa.

Ubusanzwe Zambia yafatwaga nk’ikigega cy’ibiribwa muri Afurika y’Amajyepfo ariko imaze igihe yibasiwe n’amapfa yanatumye urugomero rukuru rwa Kariba amazi yarwo agabanyuka cyane kandi ariho haturukaga amashanyarazi akoreshwa mu gihugu.

PAM ivuga ko abana n’abagore ari bo bari kugerwaho cyane n’ingaruka z’amapfa n’inzara.

Inzobere zigaragaza ko mu mezi ari imbere, amapfa azakomeza muri icyo gice cya Afurika, bivuze ko abazagerwaho n’inzara bashobora kwiyongera.

PAM yatangaje ko abagera kuri miliyoni 45 muri Afurika y’Amajyepfo bugarijwe n’inzara

41,099 total views, 2 views today

Leave a Reply

Your email address will not be published. Required fields are marked *

Scroll Up