Birashoboka ko Gen.Irategeka wari umuyobozi wa FLN yiciwe mu mutego FARDC yateze abarwanyi be

Biravugwa: Gen.Irategeka wari umuyobozi...

Amakuru atangazwa n’ibinyamakuru byo mu gihugu cya RDC aravuga ko Gen.Wilson Irategeka wari umuyobozi w’umutwe wa FLN utavuga rumwe n’u Rwanda yaguye mu mutego ingabo za FARDC zateze ingabo ze.

Gen.Wilson Irategeka wari umuyobozi w’uyu mutwe yari kumwe n’ingabo ze ubwo bategwaga umutego [ambush] na FARDC ibamishaho urusasu benshi bahasiga ubuzima.

FARDC ikomeje kwica abayobozi b’inyeshyamba zimaze igihe zihungabanya umutekano wa RDC aho bahereye kuri Gen.Mudacumura wayoboraga FDLR.

Ku wa 15 Mutarama 2020, nibwo abarwanyi barenga 100 ba FLN bafashwe na FARDC mu gace ka Shungwe nyuma yo kwatswaho umuriro n’ingabo za Congo, 20 muri bo bakicwa.

Aba basirikare bagejejwe mu Rwanda hamwe n’imiryango yabo bavuze ko bamwe muri bagenzi babo n’abayobozi basize ubuzima mu bitero bagabweho n’ingabo za RDC.

Amakuru avuga ko aba barwanyi ba FLN batezwe umutego bagiye ahitwa Shungwe hafi y’umugezi witwa Zokwe hanyuma bakerekeza ahitwa Kilembwe mu kwihuza na bagenzi babo bo mu birindiro biyobowe na Gen. Habimana Hamada I Lulima muri Fizi.

Aba basirikare ngo bari bafite umugambi wo kwihuza bagahita bagaba ibitero mu Rwanda ariko umugambi wabo wakomwe mu nkokora na FARDC yahise ibamishaho urusasu.

Gen. Ndagijimana Laurent wiyise Gen.Wilson Irategeka yavukiye mu karere ka Muhanga,aho yari mu ngabo za FDLR zasize zikoze jenoside mu Rwanda.

Mu barwanyi ba FLN baherutse kwicwa, harimo uwitwaga Brigadier General Shemeki Shaban uzwi nka Kagabo Patrick wari ushinzwe ingabo muri FLN.

Tariki ya 2 Ukuboza 2019, Col Muhawenimana Théogène uzwi nka ‘Festus’ yishwe aguye mu gico cy’Ingabo za RDC ahitwa Kalehe. Muhawenimana yari ashinzwe kurinda Icyicaro gikuru cya FLN. Urupfu rwe rwakurikiye urwa Gen Jean Pierre Gaseni wishwe ku wa 30 Ugushyingo 2019.

9,304 total views, 1 views today

Leave a Reply

Your email address will not be published. Required fields are marked *

Scroll Up