Hatagize igikorwa twari kuzapfusha benshi,twakoze ibishoboka ngo turengere ubuzima bw’Abanyarwanda

Mu mpera z’icyumweru gishize ubuyobozi bw’Umujyi wa Kigali, bwatangiye gahunda yo gukuraho inyubako z’abatuye mu manegeka uhereye ku bo mu bishanga kugira ngo hirindwe ko bahitanwa n’ibiza.

Ni gahunda yahereye mu bishanga by’ahitwa ku Mulindi, Bannyahe, Muhima no mu Rwampara mu Murenge wa Nyarugenge.

Bamwe mu baturage bakuriweho ibikorwa babwiye IGIHE ko batiyumvisha uburyo ubuyobozi buri kubasenyera inzu bukanabimura ku ngufu mu gihe bwari bwabahaye integuza y’iminsi 15.

Bavuga ko bahangayikishijwe n’ubuzima bwabo kuko batazi aho bagomba kwerekeza bo n’imiryango yabo.

Mu kiganiro cyahuje Minisiteri zitandukanye n’itangazamakuru kuri uyu wa Gatatu, hagaragajwe ko imvano yo kwimura abari mu manegeka bahungishijwe ibiza biturutse ku mvura bikomeje guhitana abantu bahatuye, aho mu karere u Rwanda ruherereyemo ibipimo byerekanaga ko izagwa nyinshi kandi ikagira ingaruka.

Imibare yerekana ko mu mezi atatu ashize mu karere u Rwanda ruherereyemo ka Afurika y’Iburasirazuba, ibiza byahitanye abarenga 280, ndetse umwaka ushize mu Rwanda honyine hakaba harapfuye abarenga 250.

Minisitiri w’Ibikorwa by’Ubutabazi, Germaine Kamayirese, akavuga ko ‘imwe mu ngamba zafashwe ari ugukura abaturage mu manegeka, mu bishanga no mu nzira z’amazi yabatwara ubuzima’.

Ati “Ni igikorwa cyiza cyo kurengera ubuzima bw’abantu kuko kuba umuturage umwe yapfa ni igihombo gikomeye ku gihugu.”

Minisitiri w’Ibikorwa remezo, Amb. Gatete Claver, yongeyeho ko umwaka ushize uretse kuba ibiza byarahitanye ubuzima bw’abantu benshi byanangije ibikorwa remezo birimo imihanda, intindo, iteza inkangu ndetse isenya za ruhurura.

Yakomoje ku cyemezo cyo kwimura abaturage bari mu manegeka mu Mujyi wa Kigali, avuga ko ibarura ryerekana ko ibikorwa 7222 birimo inzu zirenga 5200 zo kubamo kandi ziri mu mazi ku buryo iyo hatagira igikorwa yari kubarengera.

Ati “Hatagize igikorwa twari kuzapfusha Abanyarwanda benshi, niyo mpamvu twakoze ibishoboka ngo turengere ubuzima bw’Abanyarwanda.”

Isesengura ryakozwe n’inzego z’ibanze mu gutegura igikorwa cyo kwimura abatuye mu manegeka, ryerekanye ko abari mu manegeka akabije ari nabo bakuwemo bagera hafi ku 6000.

Kugeza ubu abasaga 4000 bakaba bagenzi babo barabakiriye mu miryango, abasaga 1500 bakaba barafashijwe n’inzego za leta kubona uko bakodesha hanyuma imiryango isaga 300 mu gihugu hose babaye bacumbikishirijwe mu mashuri.

Abimurwa nta byangombwa bafite

Minisitiri Shyaka avuga ko abimurwa hafi ya bose nko mu mujyi ntabwo babaga bafite ibyangombwa byo kubaka, icyangombwa cy’umutungo w’inzu, barubatse mu manegeka, ahantu batagomba kubaka.

Ati “Ushatse wavuga ko ijana ku ijana ntabwo bari batuye mu buryo bwemewe n’amategeko. Ni ukuvuga n’ibyo dukora ntabwo ari ukwica amande, ntabwo ari ukwica icyiru, ni ugutabara Abanyarwanda bari batuye mu buryo butari bwo, bitujemo badafite ibyangombwa, batemerewe bakigabiza ibishanga. Nubwo barenze ku mategeko ntabwo bibambura ubunyarwanda n’inshingano zo kubatabara, niyo mpamvu twakoze mu isanduku ya leta tukavanamo amafaranga.”

Minisitiri Shyaka yongeraho ko kuba abimurwa bahabwa ibihumbi 30 Frw ku wakodeshaga naho nyiri nzu agahabwa ibihumbi 90 Frw, atari ingurane ahubwo ari ubutabazi kugira ubuzima bugire uko bukomeza.

Mu Mujyi wa Kigali arenga miliyoni 40 Frw, amaze guhabwa abo inyubako zabo zo mu manegeka zakuweho kugira ngo bagire aho bikinga.

Abantu batarenga 10 nibo bari bafite ibyangombwa byuzuye, aho bamaze kugirana amasezerano n’Umujyi wa Kigali, bakabarirwa imitungo yabo kugira ngo bazahabwe ingurane.

Igikorwa nticyatunguranye

Umuyobozi w’Umujyi wa Kigali, Pudence Rubingisa, ahamya ko icyemezo cyo gukuraho ibikorwa biri mu manegeka kitatunguranye kuko hatanzwe amatangazo y’integuza ndetse hashyirwa ibimenyetso bya ‘Towa’ ku nyubako ariko ba nyirazo barinangira.

Mu Mujyi wa Kigali iyi gahunda ijya gutangira hari ibikorwa biri mu bishanga 7222, ibyinshi muri byo birenze 70% ni inzu zari zituyemo abantu. Hafi inzu 2600 nta cyangombwa na kimwe zari zifite.

Igikorwa gitangira hari hamaze kuvamo ingo zitageze ku 100 ni ukuvuga zitarenze 2% y’izagombaga kuvamo, uyu munsi hamaze kuvamo 2495. Ni igikorwa gikomeza kuko hagomba kuvamo n’inganda zirimo, amagaraje n’ibiraro.

Rubingisa avuga ko abasenyewe ‘badafite amikoro basanzwe n’ubundi bari muri gahunda ya guverinoma yo kubakirwa bazaherwaho’.

Ati “Abari mu bishanga bujuje ibisabwa byo kubakirwa na leta ubwo aho bari bakodesherezwa bazahaguma kugeza igihe inzu zabo bubakiwe muri iyo gahunda zibonekeye.”

Guverinoma ivuga ko yari ifite gahunda yo kubakira abatishoboye bagera ku 12 000 ariko kubera iyi gahunda yo gukura abantu mu manegeka bazagera ku 15 000 cyangwa 16 000.

Umuburo ku bubaka mu kajagari n’abigabiza ibishanga

Guverinoma yemera ko yacitswe hakagira abayica mu rihumye bakubaka mu kajagari.

Minisitiri Shyaka yavuze ko mu nzego z’ibanze bemeranyijwe ko aho bazajya basanga bubatse mu kajagari inzu zizajya zisenywa ndetse n’abarebereye bakabibazwa.

Ati “Kuva ubu ikintu cyitwa kubaka mu kajagari aho bizajya bibera…inzu zizajya zisenywa ariko n’abayobozi bakurikiranwe.”

Minisitiri Shyaka yakomeje avuga ko ababa barigabije cyangwa bashaka kwigabiza ibishanga basubira inyuma hakiri kare.

Ati “Ntabwo tuzongera gutegereza ko haza imvura ngo dutunganye ibishanga tubuze abantu kubyubakamo. N’ababa barabyigabije basubire inyuma tutarajya mu mitsi.”

Yakomeje avuga ko ruswa irangwa mu myubakire no kubaka mu kajagari bagiye kuyigabaho ibitero ‘ntawe uzaduca mu myanya y’intoki’.

Minisitiri Shyaka yaburiye abigabije ibishanga ko basubira inyuma

Minisitiri Gatete yavuze ko ibiza byagize ingaruka zikomeye no ku bikorwa remezo

Minisitiri Kamayirese yavuze ko ibipimo byerekanye ko imvura ari nyinshi mu karere u Rwanda ruherereyemo bityo ari ngombwa gufata ingamba

Meya w’Umujyi wa Kigali Rubingisa Pudence yavuze ko nta muturage watunguwe no gukurwa mu manegeka

Guverineri w’Intara y’Amajyepfo Gasana Emmanuel yitabiriye iki kiganiro avuga ko nabo bafite ingamba zikomeye zo guhangana n’ibiza

Guverineri w’Intara y’Amajyaruguru Gatabazi Jean Marie Vianney yavuze ko miliyari zirenga 30 Frw zizakoreshwa mu guhangana n’amazi aturuka mu birunga

Guverineri w’Intara y’Uburengerazuba Munyantwari Alphonse yavuze ko hari abaturage bimuwe muri Rubavu kubera ibiza kandi ari igikorwa gikomeza

21,381 total views, 1 views today

Leave a Reply

Your email address will not be published. Required fields are marked *

Scroll Up