Dasso ishobora kwongera guhabwa amapeti

Minisiteri y’ubutegetsi bw’Igihugu (Minaloc) yavuze kuri gahunda imaze igihe kitari gito itegurwa yo kujya iha urwego rw’umutekano rwa DASSO, amapeti n’umusaruro bizatanga.

Ni nyuma y’aho abantu batandukanye bari bakomeje kwibaza icyadindije iyi gahunda yo guha amapeti ba DASSO.

Ni mu gihe abaturage batandukanye baba bavuga ko batajya babasha gutandukanya abayobozi bakuru ba DASSO kugira ngo bamenye n’uwo bagezaho ikibazo cyabo igihe bahohotewe n’abakorera uru rwego.

Mu gihugu hose hari DASSO 2996 abagore bakaba ari 20% kuko abari muri uru rwego ari 470.

Akarere ka Nyarugenge niko gafite DASSO nyinshi kuko izigakoreramo ari 185 mu gihe Akarere ka Gisagara ariko gafite aba DASSO bake bagera kuri 42 gusa.

Umuyobozi Mukuru Ushinzwe Imikorere n’Imiyoborere y’Inzego z’Ibanze muri Minaloc, Gakire Bob, yavuze ko gahunda yo guha DASSO amapeti irimo gutegurwa ndetse yemezwa n’Iteka rya Perezida wa Repuburika.

Yagize ati “Turimo gutegura iteka rya Perezida riyashyiraho kuko bigomba kwemezwa n’iteka rya Perezida kandi ririmo gutegurwa ntabwo ryari ryarangira.”

Gakire yakomeje avuga ko bateganya ko mu kwezi kwa Gatandatu k’umwaka utaha wa 2020 bishobora kuba byararangije.

Ati “Ibyo ari byo byose nubwo bigenda binyura mu nzira ndende ngira ngo urabizi ko binyura no mu nama y’abaminisitiri, mu rwego rwacu turateganya ko bitarenza mu kwa Gatandatu byemejwe.”

Avuga kandi ko DASSO nizihabwa amapeti hari byinshi bizakemuuka nk’imicungire yabo no kubazwa ibyo bakora no kumenya inshingano zabo ndetse bizanafasha abaturage gutandukanya abayobozi b’urwo rwego kubera ko muri iki gihe bose baba basa.

Yongeyeho ko abajya muri uru rwego rwa DASSO bahabwa amasezerano y’imyaka itanu kandi urengeje imyaka 50 agasezererwa.

Umu-DASSO ukorera mu Karere ka Nyarugenge wanze ko amazina ye atangazwa, yemeza ko nihashyirwaho amapeti bizatuma abakora uyu mwuga bubahana.

Ati “Bizakemura byinshi, icya mbere ni uko hagati yacu bizatuma twubahana kuko ku myambaro yacu tuba dusa ntushobora kumenya urambye mu kazi n’ukagiyemo vuba.”

Yongeyeho ko bizanatanga indi sura nziza mu kubaka uru rwego rwa DASSO.

Kuva uru rwego rwatangira gukora muri 2014 aba-DASSO 69 nibo bamaze kuva mu uru rwego barimo ababa bagiye mu kandi kazi n’abasezererwa kubera imyitwarire mibi.

Ubwo DASSO bo mu Karere ka Gasabo bambikwaga amapeti

718 total views, 1 views today

Leave a Reply

Your email address will not be published. Required fields are marked *

Scroll Up