Umukozi w’Ibitaro bya Kaminuza i Huye ukekwaho kwica umusore wacuruzaga amakarita yo guhamagara yatawe muri yombi

Polisi y’u Rwanda yataye muri yombi umukozi w’Ibitaro bya Kaminuza i Huye, witwa Ntawuhiganayo Narcisse ukekwaho kwica umusore wacuruzaga amakarita yo guhamagara (Me2You) no kwiba amafaranga mu bubiko bw’Ibitaro agera kuri miliyoni 1,7Frw.

Ukurikiranyweho kwiba no kwica yari umukozi wa CHUB i Huye

Nyakwigendera yitwa IRIBONEYE FELEX, ni umusore uri mu kigero k’imyaka 28 y’amavuko wacuruzaga serivise z’itumanaho muri kiyosike, ku Bitaro bya Kaminuza CHUB. Uyu musore yarangije kwiga muri Kaminuza mu mwaka 2017.

Ntakirutimana Sylvain mugenzi w’uyu wishwe, yabwiye Umuseke ko ku wa Gatandatu w’iki Cyumweru gishize babonye  bwije batabonye mugenzi wabo, Iriboneye Felix, batangira kwibaza aho yaba ari, bajya kuri RIB kubaza niba imufite, basanga atariho ari.

Ntakirutimana avuga ko bagenzi be bacururizaga hariya hafi bari bamubwiye ko baherukaga kumubona yinjira kwa muganga agiye gutanga amakarita yo kwitabiraho ariko ngo ntibongeye kumubona asohoka.

Kuri uyu wa mbere tariki 11 Ugushyingo 2019, nibwo polisi yahamagaye Ntakirutimana bamubwira ngo ajye CHUB arebe niba umurambo babonye ari uwa mugenzi we ahageze asanga ni we.

Ati ”Twe twari twamubuze turashakisha kugeza ubwo jye nigiriye kuri Polisi kubaza niba baba bamufite bambwira ko nta we bafite, bampamagaye kuri uyu wa mbere, bambwira ngo nze ndebe umurambo w’umusore babonye niba ari uwa mugenzi wange, mpageze nsanga ni we bamwishe nabi bamunize ndetse nsanga uwamwishe yari yamuboshye amaboko.”

Ku murongo wa telephone, Umuvugizi w’urwego rw’Ubugenzacyaha, (RIB) Marie Michelle Umuhoza yatangaje ko bamaze guta muri yombi uyu Ntawuhiganayo ukekwaho ibi byaha akaba afungiye kuri Polisi i Huye.

Ati ”Amakuru y’uko yishe uyu mwana yatugezeho ubu turimo turakurikirana ngo turebe niba iki cyaha yaragikoze.”

RIB yari yatangaje kuri Twitter ko yataye muri yombi uyu Ntawuhiganayo akekwaho kwiba amafaranga agera kuri 1.700.000 mu bubiko bwa CHUB.

Nyuma byaje gukekwa ko ari na we waba wishe uyu musore kuko umurambo we wasanzwe mu biro by’uyu Ntawuhiganayo wakoreraga Ibitaro bya Kaminuza, CHUB.

Umuyobozi w’Ibitaro bya Kaminuza i Huye (CHUB), Dr. Sendegeya Augustin yabwiye Umuseke ko byinshi kuri ibi baza kubitangaza nyuma kuko bari gukorana n’inzego z’ubugenzacyaha.

Umuvugizi wa RIB Marie Michelle Umuhoza avuga bamaze gufata ukekwaho buriya bwicanyi

Leave a Reply

Your email address will not be published. Required fields are marked *

Scroll Up