CMI muri Uganda yokejwe igitutu yemera ko ifite abanyarwanda bafunzwe

Nyuma yo gushyirwaho igitutu n’imiryango iharanira uburenganzira bwa muntu, biravugwa ko Urwego rw’Ubutasi rwa Uganda (CMI), rwakuye abanyarwanda 35 mu nzu z’ibanga rufungiramo abantu rukabohereza kuri sitasiyo za polisi zitandukanye.

Iki kikaba ari igihamya kinyomoza CMI yakunze guhakana ko nta munyarwanda ifungiye mu nzu zayo z’ibanga.

Inkuru y’ibi yatangajwe na “Spy Uganda” na “pressug.com”, imbuga ebyiri za Internet muri nyinshi zikorana n’urwego rw’ubutasi rwa Uganda mu icengezamatwara.

Spy Uganda yanditse iti “Abayobozi bakuru mu gisirikare kuri CMI i Mbuya kubera igitutu cy’abanyamategeko baharanira uburenganzira bwa muntu Eron Kiiza na Anthony Odur barekuye abanyarwanda 35 bari mu nzu z’ibanga zifungirwamo abantu nyuma boherezwa kuri sitasiyo za polisi zitandukanye hirya no hino mu gihugu”.

Nubwo bivugwa ko hari abanyarwanda bakuwe mu nzu z’ibanga bari bafungiwemo, ntiharatangazwa amazina yabo.

Umusesenguzi uri i Kampala utifuje ko amazina ye atangazwa yagize ati “Ibintu bigomba gufatwa ku rundi rwego niba inzego zikora icengezamatwara ubusanzwe ziterwa inkunga na CMI ari zo zihamya ko uru rwego rufite abanyarwanda muri kasho zarwo i Mbuya. Ibi byose bikaba binyomoza iby’ubuyobozi bwa Uganda budahwema kwigira abere no guhakana ko hari umunyarwanda uri mu nzu z’ibanga zifungirwamo”.

U Rwanda rwakomeje kugaragaza ko amagana y’abaturage barwo bakorerwa ibikorwa bya kinyamaswa muri Uganda. Inkuru z’ibitangazamakuru byaba ibyo mu gihugu no mu karere byagaragaje uko inzego z’umutekano zikura abanyarwanda no mu modoka muri Uganda zikabafunga. Icyo gihe ibirego bikaba ko binjiye mu gihugu mu buryo butemewe n’amategeko.

Kimwe n’ibindi birego, ubuyobozi ntibwigeze bwerekana ibimenyetso bibihamya cyangwa ngo bujyane mu nkiko abafashwe.

“Mu buryo ubwo ari bwo bwose, niba Uganda yarasinye amasezerano ya EAC ku korohereza urujya n’uruza, ni gute bata muri yombi abantu bishingikirije ko binjiye mu gihugu mu buryo butemewe n’amategeko? Ibi ni ibyibazwa na Richard Mugisha, uri i Kigali wunganira abanyarwanda bareze Uganda mu rukiko rw’Umuryango wa Afurika y’Iburasirazuba nyuma yo gutabwa muri yombi bidakurikije amategeko, gukorerwa iyicarubozo ndetse no kwamburwa imitungo yabo.

U Rwanda ntirwahwemye kugaragaza uko abaturage barwo batabwa muri yombi na Uganda bagashinjwa ibirego by’ibihimbano, ko ari intasi (ikintu kitaragaragarizwa ibimenyetso mu rukiko cyangwa ahandi hakoraniye abantu benshi), uko benshi bakorerwa iyicarubozo, bagatwarwa ahantu hatazwi mu nzu z’ibanga zifungirwamo abantu ntibemererwe kugira uwo bavugana.

Hari kandi n’abanyarwanda bajyaga muri Uganda ku mpamvu z’ubucuruzi cyangwa gusura inshuti n’abavandimwe bakisanga mu maboko ya CMI, ikorana n’abo mu mutwe w’iterabwoba wa RNC wa Kayumba Nyamwasa. Hibukwa cyane ikibazo cya Fidèle Gatsinzi mu Ukuboza 2017 wagiye i Kampala gusura umuhungu we kuri Mukono Christian University, urenze Kampala.

Gatsinzi watawe muri yombi tariki ya 9 Ukuboza 2017 n’abantu bambaye impuzankano ya gisirikare bakora mu rwego rushinzwe ubutasi rwa Uganda, CMI, yagarutse mu Rwanda atabasha kwigenza ahubwo atwawe mu igare ry’abafite ubumuga.

Mu buhamya bwe avuga ko yafashwe ari mu Mujyi rwagati i Kampala avuye muri hoteli yararagamo, umwe mu basirikare amubwira ko hari mwene wabo w’umunyarwanda umushaka witwa Rugema Kayumba.

Uyu Rugema ni mwishywa wa Kayumba Nyamwasa, wahunze igihugu akaba ari umwe mu bayobozi b’umutwe urwanya ubutegetetsi bw’u Rwanda, RNC.

Gatsinzi avuga uko abo bagabo bamufashe bakamujyana mu kigo cya gisirikare i Mbuya bakamukorera iyicarubozo. Bashakaga ko yemera ko ari intasi y’u Rwanda, ikintu atari afite icyo akiziho. Nyuma y’iminsi ibiri ntawe uzi aho ari akorerwa ibikorwa bya kinyamaswa, abakozi ba CMI baramujyanye bamujugunya ku mupaka wa Gatuna.

Ntiyabashaga kugenda. Yagenderaga mu kagare. Ntacyo bigeze bashinja Gatsinzi ndetse ntibigeze bita ku masezerano mpuzamahanga.

Abanyarwanda benshi bahuye n’aka kababaro. Rene Rutagungira afungiwe mu kigo cya gisirikare cya Makindye, ikindi gihamya cyo guhonyora uburenganzira bwe kuko ari umusivili. Kuva muri Kamena 2017, nta cyaha na kimwe bari bamuhamya mu byo bamushinja bagenda bahinduranya.

Mbere bavugaga ko ari intasi nyuma bavuga ko yakoraga ubutasi ndetse akaba no mu mugambi wo gushimuta impunzi z’abanyarwanda.

Uku guhinduranya imvugo ni ikimenyetso cy’uko ari ibirego by’ibihimbano.

Kuri ubu abanyamategeko Eron Kiiza na Anthony Odur bo mu kigo cy’abanyamategeko kiri i Kampala kizwi nka Kiiza and Mugisha Advocates, basabye abayobozi b’igisirikare kurekura Rutagungira.

Mu cyumweru gishize Kiiza yabwiye itangazamakuru ati “Nta cyaha na kimwe bigeze bazana ngo bamushinje, ntabwo kandi binubahirije amategeko kumugumana muri kasho za gisirikare”.

Abanyamategeko bahagarariye abanyarwanda barenga 100 bose bafashwe mu buryo butemewe n’amategeko, banenze cyane ibikorwa bibabaza umubiri abakiliya babo bakorewe bari mu maboko ya CMI.

Kiiza yavuze ko ‘Bake mu bakiriya bacu bagize amahirwe yo kurekurwa berekanye ibimenyetso by’iyicarubozo bakorewe ku mibiri yabo”.

Ubu imbuga za CMI zirimo gutangaza inkuru z’uburyo CMI yarekuye abanyarwanda b’inzirakarengane 35 (nta n’umwe wigeze agira icyo ashinjwa).

Abakurikiranira hafi iki kibazo bagaragaza uburyo uku ari ukurekurwa kwa kabiri kubayeho nyuma y’abandi banyarwanda 32 barekuwe na Uganda mu kwezi gushize tariki 12 Nzeri.

Nubwo byose babihakana, birangira gihamya ibaturutseho ubwabo. None aba bantu babakuye hehe?

Itangazo ryahawe abahagarariye ibihugu byabo i Kampala, kuwa 17 Gicurasi 2017, Minisitiri w’Ububanyi n’Amahanga wa Uganda, Sam Kutesa, yagize ati “U Rwanda rushinja itabwa muri yombi, iyicarubozo no guhoza ku nkeke abanyarwanda muri Uganda. Ibi ni ibinyoma byambaye ubusa.” Yakomeje avuga ko abo banyarwanda bahura n’ibibazo ari abishe amategeko.

“Uganda yitega ko abanyarwanda bayisura nk’uko abandi bashyitsi baza bakubahiriza amategeko. Buri wese utubahirije amategeko azahanwa nk’uko abiteganya”. Uku niko Kutesa yavuze ariko nta munyarwanda n’umwe wari waburanishwa n’urukiko cyangwa ngo ahamywe ibyaha ku kintu runaka.

Ubu inkuru ya Spy Uganda na Pressug.com irashimangira cyane uko abayobozi ba Uganda batavugisha ukuri.

Nk’uko abasesenguzi babivuga, kurekura abagera kuri 35 ni ukugaragaza ibikorwa bya CMI binyuranyije n’amategeko.

Mu ntangiriro za Werurwe uyu mwaka, abayobozi b’u Rwanda basabye abanyarwanda kutajya muri Uganda kubera impamvu z’umutekano wabo uri mu kaga.

U Rwanda ruvuga ko impamvu ari ifatwa ry’abanyarwanda ridakurikije amategeko, gufungwa bitemewe ndetse no kubafungira ahatazwi batavugana n’abantu ndetse na Ambasade ntiyemererwe kubasura.

Hari abanyarwanda benshi batanze ubuhamya bw’uburyo bamaze igihe bafungiwe ku cyicaro gikuru cya CMI kiri i Mbuya

Leave a Reply

Your email address will not be published. Required fields are marked *

Scroll Up