Inzego z’umutekano zamutwaye umwana w’ukwezi 1 hashize umwaka ataramuca iryera

Mu mpera z’ukwezi gushize, Kayirere Julienne, yirukanywe ku butaka bwa Uganda, ajugunywa ku mupaka w’u Rwanda nyuma yo gukorerwa iyicarubozo n’abayobozi bo muri icyo gihugu.

Inkuru ibabaje cyane ariko ni uko ubwo yari muri gereza, umwana we w’ukwezi kumwe yatwawe n’inzego zishinzwe umutekano za Uganda. Kuva icyo gihe ntiyongeye kubona umwana we ukundi, ubu umwaka urashize.

Kayirere Julienne ukomoka mu Karere ka Ruhango, ku wa 5 Kanama 2017 nibwo yagiye muri Uganda agiye gushaka akazi, aho yagezeyo agatangira ubucuruzi bw’imyenda yakoreraga mu gace ka Mubende.

Muri icyo gihe, yari amaze ukwezi abyaye umwana w’umukobwa, amujyana muri Uganda. Yagezeyo, umunsi umwe aza gufatwa arafungwa ashinjwa kutagira ibyangombwa.

Umwana we, Joanna Imanirakiza, yonsaga yamunyazwe ku wa 12 Ugushyingo 2018, ubwo yari afungiye mu gace ka Kasambya.

Polisi ya Uganda yahise itangaza ko umwana yajyanywe mu kigo cy’imfubyi kizwi nka Glory Land Children’s Home kiri i Mubende ngo yitabweho.

Nyuma y’ibyumweru bibiri, ku wa 28 Ugushyingo. Kayirere yakatiwe gufungwa ukwezi kumwe, ashinjwa ibyaha bihuriweho by’Abanyarwanda batabwa muri yombi muri Uganda, aho bafungirwa binyuranye n’amategeko.

Yafungiwe muri Gereza ya Kaweri mu Karere ka Mubende. Nyuma yo gusoza igifungo cye, yararekuwe ahita asubira aho yafungiwe mbere asaba umwana we.

Akihagera yabwiwe ko umwana we yitabye Imana agwa mu kantu cyane.

Yagize ati “Umucamanza yarandekuye ariko ngiye gufata indangamuntu yanjye na telefoni n’umwana wanjye, polisi yongera kumfata.’’

“Nabasabye kumpa umwana wanjye ariko barangay. Najugunywe ku mupaka nta mwana mfite.’’

Abayobozi ba Uganda bahaye Kayirere icyemezo kigaragaza ko umwana we yitabye Imana. Izo nyandiko ariko ziriho raporo yakozwe na muganga ku rupfu rwe ifite umwirondoro yaba amazina n’imyaka bitandukanye.

Kayirere yakomeje guhatiriza kubaza irengero ry’umwana we ariko Polisi Uganda imukangisha ko imwica.

Mu gihe umwana wa Kayirere yitwa Joanna Imanirakiza, amazina ari kuri izo nyandiko agaragaza ko izina ari irya Rebecca Birungi, umwana w’amezi ane w’undi mubyeyi.

Kayirere aracyafite icyizere ko umwana we agihumeka umwuka w’abazima ndetse yasanze abayobozi b’u Rwanda asaba ubufasha bwo gukorerwa ubuvugizi.

The New Times yanditse ko Minisitiri w’Ubutabera, Johnston Busingye, yandikiye mugenzi we wa Uganda, William Byaruhanga, amusaba gukora iperereza ryimbitse ngo afashe Kayirere kongera kubona umwana we.

Ibaruwa Busingye yandikiye Byaruhanga irimo ibimenyetso bigaragaza uko uwo mwana yoherejwe mu kigo ndetse na raporo yacuzwe kuri urwo rupfu.

Kuva mu myaka ibiri ishize, Abanyarwanda bakorera ubucuruzi muri Uganda batangiye gutabwa muri yombi binyuranyije n’amategeko, bamwe bagakorerwa iyicarubozo ryabasigiye ubumuga.

Kayirere Julienne yitabaje ubuyobozi bw’u Rwanda asaba gukorerwa ubuvugizi ngo ahabwe ubutabera ku mwana we yaburiye muri Uganda ubwo yari afunze

Leave a Reply

Your email address will not be published. Required fields are marked *

Scroll Up