Imirimo ya nyuma yo kubaka ibitaro bya Nyarugenge irarimbanyije

Imirimo ya nyuma yo kubaka ibitaro bya Nyarugenge irarimbanyije, aho byitezwe ko Ugushyingo 2019 kuzasiga byuzuye ku buryo bizatangira gutanga serivisi ku barwayi muri Gashyantare 2020.

Ibi bitaro byatangiye kubakwa muri Gashyantare umwaka ushize ku nkunga yatanzwe n’Ubwami bw’u Bubiligi. Icyiciro cyabyo cya mbere cyatwaye miliyari zisaga esheshatu mu gihe ubariyemo n’icya kabiri bizaba bifite agaciro ka miliyari 12 Frw.

Ubu imirimo igeze ku kigero cya 90% ndetse mu minsi mike icyiciro cyabyo cya mbere kizaba kirangiye.

Umuyobozi w’Akarere ka Nyarugenge, Kayisime Nzaramba, yavuze ko ubu bamaze gutanga isoko ry’ibikoresho ku buryo mu Ukuboza bizaba byamaze kuboneka.

Ati “Ubu tugeze kuri 91% bivuze ko hasigaye 9%, twizera neza ko mu mpera za Ugushyingo tuzaba dusoje hanyuma hagasigara gushyiramo ibikoresho kandi n’ibikoresho amasoko twamaze kuyatanga nayo mu Ukuboza bizaba byamaze kuhagera.”

Yakomeje avuga ko bizera neza ko mu ntangiriro z’umwaka utaha wa 2020 ibi bitaro bizatangira gukora.

Ati “Turizera neza ko mu gutangira umwaka utaha nko muri Gashyantare ibikoresho byose bimaze kugeramo ibitaro byaba bitangiye gukora hatagize igihinduka kuko turabona ibintu byose birimo kugenda neza.”

Igice cya mbere cy’ibi bitaro cyubatswe kuri hegitari ebyiri n’ibice bibiri kizaba gifite ubushobozi bwo kwakira abarwayi 120.

Meya Nzaramba yavuze ko nyuma hazubakwa ikindi gice kizaba gifite ibitanda 180 kuko ibyo bice byose nibirangira ibitaro bizaba bifite ubushobozi bwo kugira ibitanda 300.

Byitezweho kuzaha serivisi abaturage batuye Akarere ka Nyarugenge bikaba n’akarusho kuri ako karere kuko nta bitaro kagiraga, aho wasangaga abaturage bako bivuriza ku bitaro by’icyitegererezo bya Kaminuza bya Kigali (CHUK).

Ibitaro bya Nyarugenge bigeze ku kigero cya 90%

src.igihe

Leave a Reply

Your email address will not be published. Required fields are marked *

Scroll Up