Tanzania Yaguze udukingirizo 30M mu rwego rwo guhangana n’ibura ryatwo.

Inzego z’ubuzima mu gihugu cya Tanzania zaguze udukingirizo miliyoni 30 mu rwego rwo guhangana n’ikibazo cy’ibura ryatwo mu gihugu.

BBC yanditse ko igurwa ry’utu dukingirizo ryaturutse ku kuba igiciro cyatwo kigenda kizamuka, bigaterwa na none nuko ingano y’utwo guverinoma itanga hirya no hino yagabanutse.

Ibi byatumye amahoteli n’utubari mu mujyi wa Dar es Salaam batagitanga udukingirizo tw’ubuntu ku bakiriya babo nk’uko bari basanzwe babigenza.

Umwe mu bakora muri hoteli yabwiye BBC ko hari amaduka asigaye agurisha udukingirizo 3000 by’amashilingi ya Tanzania, 5000 na 10, 000 ibiciro bigatandukana bitewe n’imiterere yatwo.

Yagize ati “Amaduka amwe n’amwe asigaye agurisha udukiningiro ibihumbi 3000 by’amashilingi ya Tanzania, 5,000 n’10,000 ibiciro bigatandukanywa n’imiterere yatwo. Abakiriya bagomba kwigurira udukingirizo kuko tutagishoboye kutubahera ubuntu.”

Minisitiri w’Ubuzima wungirije muri Tanzania, Dr. Faustine Ndugulile yatangaje ko ubu udukingirizo twabonetse, yongeraho ko ibura ryatwo ryari ryaturutse ku mikorere y’ibigo byari bishinzwe kudutanga.

Ati “Twatumije udukingirizo miliyoni 30. Icyari cyahindutse n’uburyo twatangwagamo. Hari ibigo byari bishinzwe gutanga udukingirizo ariko ubu ibintu byarahindutse, hari ibindi bigo ubu twahaye izo nshingano.”

Imibare yo mu 2018 igaragaza ko abagera 1,600,000 muri Tanzania banduye agakoko ka Sida. 78% bazi uko bahagaze naho 71% muri bo akaba aribo bari ku miti igabanya ubukana.

Leave a Reply

Your email address will not be published. Required fields are marked *

Scroll Up