Ubutaka bugizwe n’ibibanza bisaga miliyoni 1.5 bushobora kuzashyirwa ku rutonde rw’imitungo idafite beneyo

’Imikoreshereze y’Ubutaka mu Rwanda (RLMUA), cyatangaje ubutaka bugizwe n’ibibanza bisaga miliyoni 1.5 bushobora kuzashyirwa ku rutonde rw’imitungo idafite beneyo bityo ikandikwa kuri leta.

Kuva mu 2009, nibwo leta y’u Rwanda yatangije gahunda yo kubarura ubutaka, hagamijwe kugira ngo buri muturage ahabwe icyangombwa cy’umutungo w’ubutaka bwe. Ni gahunda yarangiye mu 2013, ariko hari benshi batarabaruza ubutaka bwabo.

ubutaka bugizwe n’ibibanza bisaga miliyoni 1.5 bushobora kuzashyirwa ku rutonde rw’imitungo idafite beneyo

Itangazo ry’ikigo RLMUA ryo ku wa 15 Ukwakira 2019, rivuga ko “Umuyobozi wacyo aramenyesha abantu bose ko bandikisha ubutaka bwabo mu gihe kitarenze amezi atatu.”

Bivugwa ko hari abantu bagiye batanga amakuru atuzuye n’abagiye batanga amakuru atariyo bityo ikoranabuhanga rikagaragaza ko amakuru yatanzwe adahuye n’asanzwe ari muri iryo koranabuhanga.

Bagiye basabwa gutanga ibimenyetso n’amakuru agaragaza neza ko ubwo butaka ari ubwabo ariko benshi ntabyo bakoze ku buryo kuri ubu 14% by’ubutaka bwose nta makuru ahagije abwerekeye ava kuri ba nyirabwo kandi butabaruye.

Imibare ya RLMUA, igaragaza ko kugeza ubu hamaze gutangwa ibyangombwa by’ubutaka bigera kuri miliyoni 11.5 [hagendewe kuri numero zahawe ubutaka], mu gihe hari ubundi bugizwe n’ibibanza bisaga miliyoni imwe n’igice byabuze ba nyirabyo.

Hari kandi n’ubundi bungana n’ibibanza ibihumbi 18, bwanditseho amakimbirane. Ni ukuvuga ngo hari abantu bashyize amakimbirane ku butaka bw’abandi mu gihe cy’ibarura rusange kugeza uyu munsi bakaba batarayakuzaho cyangwa ngo bagaragaze ko ibibazo bari bafitanye biri mu nkiko.

Umuyobozi Mukuru wa RLMUA, Mukamana Esperance, yavuze ko abatarandikisha ubutaka bahawe amezi atatu naho ababwandikishijeho amakimbirane bahabwa ukwezi kumwe batinda bakazafatirwa ibyemezo birimo kuba leta izabwiyandikishaho.

Yagize ati “Ubutaka ntabwo twabutwaye nta n’ikindi tugiye kubukoresha, ariko dushaka ko ubutaka bwose bugira aho bwanditse. Uzaza akagaragaza ko ubutaka ari ubwe akabutangira ibimenyetso icyo gihe tuzabumwandikaho, turagira ngo twirinde kugira amakuru atuzuye.”

RLMUA itangaza ko mu bibanza byabaruwe ibigera ku 331,110 byose ari ibya leta kandi n’ibi byabuze ba nyirabyo biteganywa kwandikwa kuri leta mu gihe cya vuba.

Guverinoma y’u Rwanda yashyizeho politiki y’igihugu y’ubutaka ndetse n’Itegeko Ngenga rigena imikoreshereze n’imicungire y’ubutaka mu Rwanda.

Iri tegeko riteganya ko ubutaka bw’Igihugu bubarirwa mu mutungo rusange w’imbaga y’Abanyarwanda bose; abakurambere, abariho, n’abazavuka.

Uretse uburenganzira abantu bemerewe, Leta niyo ifite ububasha bw’ikirenga bwo gucunga ubutaka bwose bw’Igihugu, ikaba ibikora ku nyungu ya bose kandi igamije amajyambere nyayo mu by’ubukungu no mu by’imibereho myiza hakurikijwe uburyo buteganywa n’amategeko.

Leave a Reply

Your email address will not be published. Required fields are marked *

Scroll Up