Nyabihu.Bihanangirijwe kutagurisha amata ngo bibagirwe ayo kunywa mu muryango

Imwe mu miryango yo mu Karere ka Nyabihu yahawe inka muri gahunda ya Girinka hagamijwe kurwanya imirire mibi mu muryango no kuzamura imibereho myiza yabo bihanangirijwe kutagurisha amata ngo bibagirwe ayo kunywa mu muryango

Mu ibarura ryakozwe mu Karere ka Nyabihu mu 2015 ryagaragaje ko ariko kaje ku mwanya wa mbere mu Gihugu mu kugira umubare munini w’abana bagwingiye aho kari kuri 59%.

Mu ibarura bikoreye bafatanyije n’abafatanyabikorwa babo mu kurwanya imirire mibi mu 2019 basanze bahagaze kuri 42% by’abana bagwingiye

Bamwe mu bahawe izi nka bavuga ko zabakuye habi kuko abana babo bari baraheze mu mirire mibi, ariko bakanagaragaza ko hakiri abakunda amafaranga aho umukamo bawumarira ku masoko bakibagirwa ayo kunywa.

Mukarusanganwa Olive yagize ati “ Mfite abana batatu umutware yansigiye, nkimara guhabwa inka, babiri muri bo bari bafite imirire mibi barayikize, nyuma umugabo amaze kwitaba Imana nahuye n’ubukene ntangira kugurisha amata sinsige ayo abana banywa, umwe arongera ararwara, ubu nakuyemo isomo rikomeye sinakongera kubikinisha.”

Umukozi Ushinzwe ibikorwa by’ umushinga Embrance ukorera muri ADRA Rwanda, Muvunyi Reuben avuga ko mu Mirenge ine batanzemo inka bagiye babonamo ibibazo nk’ibyo, bakaba barahagurukiye kubirwanya

Ygize ati “Hari aho twagiye tugenzura tugasanga bagurisha amata ntibibuke gusiga ayo abana banywa bigatuma imirire mibi hari aho ikigaragara, twasabye ubuyobozi bw’Akarere kubidufashamo iki kibazo tukagihagurukira”

Umuyobozi w’Akarere ka Nyabihu, Mukandayisenga Antoinette avuga ko ikibazo cy’abakigurisha amata ntibibuke gusigira abana bagihagurukiye bifashishije ubukangurambaga n’inyigisho zitandukanye

Yagize ati “Turimo gukora kuri ba bandi babona umukamo bakawumarira ku isoko bibagiwe ko bagomba gusiga ayo kunywa, n’ubwo nta mibare ifatika ihari ariko barahari ntabwo tuzabirebera turihanangiriza abakibikora kubireka uko baba bangana kose, ikindi turacyakomeza kwigisha binyuze, mu bukangurambaga tubibutsa ko batagomba kwirukira amafaranga kuruta ubuzima bw’umuryango wabo”.

Kuva mu 2017 mu Mirenge ya Bigogwe, Karago, Kintobo na Jenda hatanzwe inka 300 ku miryango yari ifite ibibazo by’abana bafite imirire mibi, igikorwa cyakozwe na ADRA Rwanda ku bufatanye n’Akarere ka Nyabihu, kugeza ubu hakaba hamaze kwiturwa inka 170.

Imwe mu miryango yo mu Karere ka Nyabihu yahawe inka muri gahunda ya Girinka hagamijwe kurwanya imirire mibi

Leave a Reply

Your email address will not be published. Required fields are marked *

Scroll Up