RDB.Ntacyahungabanya serevise z’ubukerarugendo

Ikigo cy’Igihugu cy’iterambere (RDB), kiramenyesha abantu bose ko serivisi z’ubukerarugendo zikomeje gukora nk’uko bisanzwe muri Pariki y’Igihugu y’Ibirunga no mu zindi pariki ndetse n’ahantu nyaburanga mu Rwanda.

Ni nyuma y’uko abagizi ba nabi bateye bitwaje intwaro gakondo n’imbunda mu Murenge wa Kinigi mu Karere ka Musanze mu ijoro ryo ku wa Gatanu rishyira kuri uyu wa Gatandatu, tariki ya 5 Ukwakira 2019.

Polisi y’Igihugu yatangaje ko aba bagizi ba nabi bishe abaturage umunani barimo batandatu bicishijwe intwaro gakondo n’abandi babiri barashwe amasasu, banakomeretsa abandi 18 bajyanywe mu bitaro aho bari kwitabwaho n’abaganga.

Inzego z’umutekano zahise zijya gutabara no guhumuriza abaturage n’imiryango y’abagizweho bagizweho ingaruka n’iki gitero. Abagizi ba nabi bakekwaho kugaba igitero bakomeje gushakishwa.

RDB yashimangiye ko inzego z’umutekano zabikurikiraniye hafi kandi ibintu byasubiye ku murongo bityo abasura Pariki y’Ibirunga bakomeje gutekana.

RDB kandi yongeyeho ko abashyitsi ibihumbi amagana bamaze gusura Pariki y’Igihugu y’ibirunga mu myaka yose 20 kandi nta kibazo barahura na cyo.

Ati “Umudendezo n’umutekano ni ikirango cy’ubukerarugendo bw’u Rwanda kandi bizakomeza kuba iby’ibanze kuri twe”.

RDB igaragaza ko mu 2017 u Rwanda rwinjije miliyoni $438 zivuye mu bukerarugendo, intego ya Guverinoma ni uko mu 2024 inyungu ruvana mu bukerarugendo izagera kuri miliyoni $800.

Mu 2018, Pariki y’Igihugu y’Ibirunga abasuye ingagi ni 15,132 byatumye yinjiza amadolari ya Amerika Miliyoni zisaga 19 z’amadolari, ugeraranyije n’umwaka wa 2017 biyongereye ku kigero cya 25%.

Ingagi zo mu birunga zikundwa cyane na ba mukerarugendo

Leave a Reply

Your email address will not be published. Required fields are marked *

Scroll Up