Umugabo wo mu Karere ka Rwamagana yasanzwe mu nzu iwe yimanitse

Umugabo witwa Sibomana Regis w’imyaka 28, wo mu Karere ka Rwamagana, mu Murenge wa Rubona mu Kagari ka Kabatasi mu Mudugudu wa Gitaraga, yasanzwe mu nzu iwe yimanitse mu kiziriko bigakekwa ko yiyahuye.

Ibi byagaragaye mu gitondo cyo kuri uyu wa Kane tariki ya 3 Ukwakira 2019 ahagana mu masa moya z’igitondo, ubwo umugore we wari umaze iminsi arwaje mukuru we mu bitaro yagarutse iwe agasanga harakinze akajya kurara mu baturanyi.

Mu gitondo yishe urugi ngo yinjire mu nzu agezemo asanga umugabo we amanitse mu mugozi ahita yitabaza abaturanyi n’ubuyobozi.

Umunyamabanga Nshingwabikorwa w’Umurenge wa Rubona, Byaruhanga John Bosco, yabwiye IGIHE ko bikekwa ko yanyoye inzoga nyinshi zikamutera kwiyahura.

Yagize ati “Bwakeye mu gitondo dusanga yimanitse mu mugozi twahise tumufata tumutwara kwa muganga ubu dutegereje igisubizo cy’abaganga ngo tumenye icyo yazize.”

Yakomeje avuga ko uyu mugabo yakundaga kunywa inzoga nyinshi agasinda bigakekwa ko ari zo zabimuteye.

Ati “Abaturanyi batubwiye ko nta muntu n’umwe bazi bari bafitanye ikibazo n’umugore we ngo ntacyo gusa twamenye amakuru ko yakundaga kunywa inzoga nyinshi agasinda bigakekwa ko arizo zamuteye kwiyahura. Iperereza riracyakomeje.”

Kuri ubu umurambo wa Sibomana wajyanywe mu bitaro urasuzumwa usubizwa mu rugo kugira ngo ushyingurwe.

Leave a Reply

Your email address will not be published. Required fields are marked *

Scroll Up