Abantu 25 bararegwa gukorana n’imitwe y’iterabwoba mu guhungabanya umutekano w’u Rwanda bagejejwe imbere y’Urukiko

Share

Abantu 25 baregwa gukorana n’imitwe y’iterabwoba mu guhungabanya umutekano w’u Rwanda, bagejejwe imbere y’Urukiko rwa gisirikare ruri i Nyamirambo mu Mujyi wa Kigali.

Ni itsinda ryiganjemo urubyiruko ryageze imbere y’urukiko ku nshuro ya mbere nyuma yo gutabwa muri yombi. Ahagana saa tanu n’igice nibwo bageze mu rukiko, bacunzwe n’Umutwe w’Ingabo z’u Rwanda ushinzwe imyitwarire, Military Police.

Abaregwa uko ari 25 barangajwe imbere na (Rtd) Major Habib Mudathiru wari umuyobozi ushinzwe ibikorwa n’imyitozo mu gisirikare cya P5, cyubakiye ku mashyaka atanu ari yo Amahoro People’s Congress, Forces Démocratiques Unifieés – Inkingi (FDU-Inkingi); People’s Defence Pact-Imanzi (PDP-Imanzi), Rwanda National Congress (RNC) na PS Imberakuri. Bose ngo bakuriwe na Kayumba Nyamwasa.

Mudathiru yagenderaga ku mbago, ndetse ukuguru kumwe kwari gufunzwe n’ibyuma kubera amasasu yarashwe n’ingabo za RDC ubwo yafatwaga, ku buryo no mu cyumba cy’urukiko yari yahawe intebe iriho umusego akurambikaho.

Abafashwe bose bakuwe mu mashyamba ya Congo nyuma y’igico gikomeye batezwe n’ingabo z’icyo gihugu, FARDC, aho mu iburanisha abenshi bahurizaga ku kuvuga ko bashyikirijwe u Rwanda ku wa 18 Kamena 2019.

UKO IBURANISHA RYAGENZE :

Inteko iburanisha kuri uyu wa Gatatu yari ikuriwe n’umucamanza Lt Col Charles Madudu, wavuze ko abakurikiranweho uko ari 25 baregwa ibyaha bine; Kwinjira mu mutwe w’ingabo utemewe; Kugambirira kugirira nabi ubutegetsi buriho; Kugirana umubano na Leta y’amahanga bigiriwe gushoza intambara no Kurema umutwe w’abagizi ba nabi.

Yabanje kureba ko imyirondoro y’abaregwa yuzuye, maze Mudathiru ari nawe urimo gufatwa nk’uyoboye iri tsinda avuga ko yavutse mu 1966. Yabajijwe n’umucamanza aho atuye, arasubiza ati ’mu ivuriro” kubera ko arimo kuvurwa nyuma yo kurasirwa muri RDC, nyuma aza kuvuga ko atuye i Kanombe.

Mu baregwa kandi harimo Nsanzimana Patrick uvuka mu Karere ka Nyaruguru; Katwere Joseph wavutse mu 2001 wo muri Uganda; Habyarimana Joseph wavutse mu 1979 mu Karere ka Gisagara; Ngendakumana Vedaste wavukiye mu Karere ka Gisagara mu 1987 na Minani Jean wavutse mu 1982 akaba Umurundi.

Harimo kandi Rugamba Hagenimana Viateur wavukiye mu Karere ka Gicumbi mu 1992, Mbarushimana Ildephonse wavutse mu 1997 i Rubavu; Nsabimana Jean Marie wavutse mu 1991 akaba Umurundi; Nsengiyumva Janvier wavutse mu 1977 na we ni Umurundi na Kurugendo Issa wavutse mu 1989 akaba Umunyarwanda.

Habanabakize Innocent yavukiye mu Karere ka Gisagara mu 1993; Rusigariye Ildephonse wo muri Gisagara yavutse mu 1996; Desideriyo Fred ni Umunya-Uganda wavutse 1996 naho Gashumba André w’i Nyagatare wavutse mu 1966.

Harimo Ndikumana Issa wavutse mu 1978 akaba uw’i Gisagara; Ngiruwera Schadrack wo mu Karere ka Gakenke wavutse mu 1996; Ndirahira Jean de Dieu ni Umurundi wavutse mu 1987; Habarurema Jackson wo mu Karere ka Nyagatare yavutse mu 1994 naho Iribanje Lambert wo muri Malawi yavutse mu 1996.

Nyuma yo gutanga imyirondoro yuzuye, umucamanza yatanze ikiruhuko cy’iminota 30, ngo iburanisha risubukurwe hahabwa umwanya Ubushinjacyaha.

Imikorere y’ibyaha abaregwa bakekwaho

Nyuma y’ikiruhuko Umucamanza Lt Col Charles Madudu yabajije abaregwa niba biteguye kuburana. Rtd Maj Habib Mudathiru yahise amanika ukuboko, avuga ko kubera umwanya atabashije kubona umwunganira mu mategeko, umucamanza amusubiza ko kuwuhabwa akabona umwunganira ari uburenganzira ahabwa n’itegeko. Abajijwe niba yaburana yahise avuga ati “Naburana.”

Umushinjacyaha Major Dennis Ruyonza yateruye agaragaza uruhare rwa buri umwe muri ibi byaha, ahereye kuri Mudathiru yahoze muri RDF, akaza gusezererwa.

Mu 2013 ngo yerekeje muri Uganda, ari naho yaje guhamagarirwa na Maj Robert Higiro akamuha ubutumwa bwa Kayuba Nyamwasa, ko bafite umutwe wa politiki wa RNC, ariko bashaka no gukora igisirikare cyawo, bityo we n’abandi basezerewe mu ngabo, bakwishyira hamwe.

Umushinjacyaha yabanje kwibutsa Kayumba uwo ari we, nk’umugabo wahoze muri RDF agatoroka ubutabera ubu aba muri Afurika y’Epfo. Mu 2011 inkiko za gisirikare zamukatiye adahari, gufungwa imyaka 24 ananyagwa amapeti ya gisirikare, amaze guhamwa no gupfobya Jenoside, iterabwoba no guhonyora uburenganzira bw’ikiremwamuntu.

Muri Afurika y’Epfo ngo Kayumba na Maj Robert Higiro bashinze Rwanda National Congress (RNC), igamije kugirira nabi ubutegetsi bw’u Rwanda, ari nayo mpamvu barimo bashinga ishami rya gisirikare. Kayumba ngo ubu ni nawe ukuriye umutwe witwara gisirikare urwanya ubutegetsi bw’u Rwanda, wa P5.

Umushinjacyaha yavuze ko Rtd Major Habib amaze guhura na Higiro, yamugiriye inama yo gushaka umunyarwanda uzwi i Kampala nka Rasta, akamufasha kubona ibyangombwa by’impunzi, ko ari bwo yabona umutekano i Kampala. Ngo yarabibonye ndetse ahita ajyanwa mu nkambi ya Arua.

Nyuma ngo Higiro yahaye Habib ubutumwa bwa Kayumba, bumubwira ko “RNC nk’ishyaka, dufite uwo mutwe ariko dushaka no kubaka igisirikare kandi twabonye ibirindiro muri DRC.”

Yamuhuje na Capt Bagumya Apollo na Frank Ntwari (muramu wa Kayumba), nyuma ngo uwitwa Sunday Charles ajya kureba Habib anajyanye Sibo Charles wahoze ari Capt muri RDF, amubwira ko bamukuye muri gereza, bamwita Colonel wari umaze imyaka itandatu afungiwe muri Polisi ya Uganda, ahitwa Kireka.

Aho ngo bahanogereje umugambi wo kujya mu mashyamba ya Congo, maze ku wa 20 Nyakanga 2017 Sibo Charles na Habib batoroka inkambi bagera Mbarara, bafashwa n’urwego rw’iperereza rw’igisirikare cya Uganda, CMI ngo bagere i Burundi banyuze muri Tanzania.

Bafashijwe na Capt Johnson wo muri CMI, wabashyize mu modoka afite n’imbunda, bagera ku mupaka wa Tanzania banyuze Kikagati. Banafashijwe na Mateka, umuhungu wa General Major Mateka wo muri Uganda

Ku mupaka ngo Johnson yabashakiye inyandiko mpimbano zabagejeje i Burundi. Ku mupaka w’u Burundi ngo ngo bakiriwe n’abakuriye inzego z’iperereza mu gisirikare cy’icyo gihugu, barimo Colonel Ignace Sibonama ushinzwe iperereza rya gisirikare (Chief J2) na Major Bertin ushinzwe iperereza ryo hanze.

Ngo bagiye bacungiwe umutekano kuva ku mupaka wa Tanzania cyangwa bava i Bujumbura, bagera muri RDC, bikorwa n‘abitwa Maso, Soldat Cyuma, Renzaho na Kimweshi bo mu Burundi.

Ngo babagejeje i Bujumbura babaha icumbi muri Hotel Transit, ari naho hacumbikirwaga abantu benshi bajya muri RNC. Nyuma ngo Kayumba yahamagaye Sibo Charles na Major Habib kuri Skype, ababwira ko mu mwanya babonana n’abayobozi ba Gisirikare mu Burundi, ati “muvugane bikeya kuko ibyinshi twarabirangije.”

Ngo yababwiye ko bahabwa imbunda n’amasasu, inzira yo gucishamo amakurutu y’Abanyarwanda bari i Burundi n’inzira yo kunyuzamo abarwayi igihe badashoboye kuvurirwa mu nkambi yabo.

Ni nako bagenze kuko bahuye na Colonel Ignace Sibomana, Major Bertin na Colonel Nyamusaraba, Umunyamulenge uyobora umutwe witwara gisirikare wa Ngomino. Mu kiganiro bagiranye ngo bemeranyije ko P5 igizwe ahanini n’abanyarwanda, izajya ikora imyitozo yitwikiriye Ngomino ya Col Namusaraba, mu gihe bazaba babaye benshi bakazabona kujya mu nkambi yabo.

Nyuma y’icyumweru kimwe iyo nama ibaye, ngo Colonel Sibomana na Maj Bertin bahaye imodoka n’uburinzi igikundi cya Major Habib n’amakurutu bari kumwe, babageza kuri Tanganyika, bambukira mu bwato bagera muri RDC. Bagezeyo basanga baje kwakira n’abandi basanzweyo.

Mu gushyira mu bikorwa ibyo bemerewe, bagenda ngo bahawe SMG 13, LMG 3, MMG 1 n’ibikarito bine by’amasasu ya SMG na sheni eshatu z’amasasu ya NMG.

Umushinjacyaha yavuze ko nyuma yo gushinga P5, Kayumba yaje kugira Colonel Nyamusaraba umuyobozi w’ibikorwa byose, yungirizwa na Sibo Charles, Habib Mudathiru ashingwa ibikorwa n’imyitozo, Semahurungure ashingwa iperereza na politiki, Richard ashingwa ubutegetsi n’bikoresho, uwitwa Olivier ashingwa imari.

Imvano y’ifatwa ry’aba barwanyi

Nyuma ngo Kayumba yahamagaye Habib kuri telefoni ikoresha icyogajuru, amusaba ko batekereza uko bahindura aho bakorera, ngo bave muri Kivu y’Amajyepfo bajye ku mupaka wa Uganda kuko babonaga u Burundi butaha inkunga bihagije, ariko ngo kuri Uganda babonaga inkunga ishobora kuba nyinshi n’abarwanyi babo bakajya babona uko bambuka byoroshye.

Umushinjacyaha yavuze ko muri uwo mugambi, bakoresheje $12000 USD yoherejwe na Ben Rutabana kuri Western Union i Bujumbura, Richard ajya kuyabikuza. Ku wa 19 Mata ngo nibwo bimutse, bageze Kalehe bahura n’umutwe wa MRCD iyoborwa na Gen Irategeka, bababwira ko ngo bo batangiye akazi muri Nyungwe.

Bamaze kuruhuka ngo bakomeje urugendo “rutabahiriye na gatoya,” kuko bageze muri Gatoyi i Masisi, bahuye n’ibico byinshi bya FARDC, bararaswa, bamwe barafatwa abandi bishyikiriza Monusco.

Umushinjacyaha yavuze ko abashoboye kurokoka bagiye bamanika amaboko ku matariki atandukanye, kugeza ubwo Leta ya Repubulika Iharanira Demokarasi ya Congo yabashyikirije u Rwanda.

Kuki abasivile bajyanwe mu rukiko rwa gisirikare?

Umushinjacyaha Major Ruyonza yavuze ko abaregwa bashyikirijwe urukiko rwa Gisirikare hashingiwe ku isobekerana n’urundi rubanza ruregwamo Pte Muhire Dieudonne na bagenzi be, urwo rubanza rukaba ruri mu rukiko rukuru rwa Gisirikare, baregwa ibyaha bimwe kandi byakorewe mu gihe kimwe, kandi itegeko ryemera ko dosiye zishobora guhuzwa kugira ngo hatangwe ubutabera bunoze.

Umushinjacyaha yavuze ko mu baregwa harimo Abanyarwanda, Abarundi n’Abanya-Uganda, abanyamahanga bakaba bagejejwe imbere y’urukiko rwo mu Rwanda kuko itegeko riteganya ibyaha n’ibihano u Rwanda rufite, rivuga ko icyaha kibangamiye inyungu z’u Rwanda gikorewe hanze y’ifasi y’igihugu cy’u Rwanda, ari icyaha gikomeye, cy’ubugome, kibangamiye u Rwanda cyangwa abanyarwanda, ugikoze ashobora gukurikiranwa nk’aho icyaha cyabereye ku butaka bw’u Rwanda.

Ibyo ngo byakozwe nk’uko u Rwanda rusaba ko abantu bafatiwe muri Uganda nabo banyuzwa imbere y’ubutabera, n’ubwo icyo cyifuzo cyemerwa gake.

Umushinjacyaha yavuze ko kuba benshi bemera ko bagiye muri RDC muri P5, ari impamvu ikomeye ituma ibyaha baregwa bikekwa ko babikoze. Yavuze ko no kuba mu baregwa hari abavuga ko bagiye bashutswe ko bagiye guhabwa akazi, kuba barabanzaga gusobanurirwa icyo bagiye gukora ntihagire utoroka, bigaragaza ko bemeye umugambi bari bagejejweho.

Ibihugu by’abaturanyi byatunzwe agatoki mu guhungabanya u Rwanda

Umushinjacyaha yagaragaje uburyo inzego za gisirikare za Uganda zafashije abaregwa mu gushakisha ibyangombwa bigizwemo uruhare na Major Johnson, kugeza ubwo bajyanwe mu nkambi ya Arua guhishwayo bigizwemo uruhare na Leta.

Ibyo ngo bikanagaragazwa no kuba mu baregwa harimo Abanya-Uganda batatu; Lubwana Suleiman, Katwere Joseph na Desideriyo Fred.

Leta y’u Burundi nayo ngo ibifitemo uruhare rukomeye kuko harimo umuyobozi mukuru w’iperereza rya gisirikare wakoranye n’abajya muri P5, kandi u Burundi bwagize uruhare mu kubaha ibikoresho nk’intwaro, kubacumbikira no kubafasha gushaka abarwanyi n’inzira ibageza muri RDC.

U Burundi kandi bufite abantu bane muri 25 baregwa, barimo Ndirahira Jean de Dieu, Nsengiyumva Janvier, Minani Jean na Nsabimana Jean Marie Vianney.

Byongeye, mu baregwa uko ari 25, abantu 14 bafashwe bavuze ko binjijwe muri P5 banyuze mu Burundi, umunani baturutse muri Uganda, babiri muri Kenya n’umwe muri Malawi.

Umushinjacyaha amaze gusobanura imiterere y’ibyaha, umucamanza Lt Col Charles Madudu yasubitse iburanisha, yanzura ko rizasubukurwa kuri uyu wa Kane saa tatu, hahabwa umwanya abaregwa ngo bisobanure ku byavuzwe n’Ubushinjacyaha.

Urukiko rwa Gisirikare nirwo rwatangiye kuburanisha aba bagabo

Urwego rushinzwe imyitwarire mu Gisirikare cy’u Rwanda , Military Police, nirwo rwazanye aba bantu ku rukiko

Imodoka yazanye iri tsinda ubwo yinjiraga mu ifasi y’urukiko

Rtd Maj Habib Mudathiru uheruka gufatirwa muri RDC yageze mu rukiko yicumbye imbago

Abenshi bigaragara ko bakiri urubyiruko rw’imyaka mike

Bose uko ari 25 bashinjwa gukorana n’umutwe w’iterabwoba wa RNC

Rtd Maj Habib Mudathiru niwe ufatwa nk’uyoboye iri tsinda

src.igihe.com

Share

Leave a Reply

Your email address will not be published. Required fields are marked *

Scroll Up