Umujyi wa Kigali.Rubingisa Pudence, yavuze bimwe mu byo azibandaho muri manda ye y’imyaka itanu.

Nyuma yo gutorerwa kuba Umuyobozi mushya w’Umujyi wa Kigali, Rubingisa Pudence, yavuze bimwe mu byo azibandaho muri manda ye y’imyaka itanu.

Rubingisa watorewe kuyobora Umujyi wa Kigali asimbuye Rwakazina Marie Chantal wagizwe Ambasaderi w’u Rwanda mu Busuwisi.

Rubingisa nyuma yo kurahirira izi nshingano nshya yavuze ko azakomereza aho abamubanjirije bagejeje ariko akarushaho kwita ku kunoza uburyo bwo gutwara abantu no gukomeza gushimangira gahunda zo kubaka umujyi utangiza ibidukikije.

Ati “Umusanzu nshaka gutanga ni ugukomeza gahunda yo kubaka umujyi utangiza ibidukikije kandi ufite uburyo bw’imyidagaduro kuri buri byiciro by’abantu bawutuye.”

Yongeyeho ko azita ku kunoza gahunda yo gutwara abantu mu modoka rusange.

Ati “Gutwara abantu mu buryo rusange biracyari ikintu cyo kwitabwaho, Umujyi wa Kigali utuwe n’abantu benshi kandi gahunda inoze yo gutwara abantu ni ingenzi mu buzima bwa buri munsi.”

Bimwe mu bindi uyu muyobozi mushya yavuze ko azitaho ni isuku, umutekano, guteza imbere ubukerarugendo bugamije kugira Kigali agace k’ubukerarugendo mu karere ndetse no kunoza uburyo bw’imiturire hakurikizwa igishushanyo mbonera gishya cy’Umujyi wa Kigali.

Rubingisa Pudence yatorewe kuyobora Umujyi wa Kigali muri manda y’imyaka itanu, aho yungirijwe na Dr Nsabimana Erneste ushinzwe Imiturire n’Ibikorwa remezo na Umutoni Gatsinzi Nadine ushinzwe imibereho myiza n’ubukungu.

Ayoboye Umujyi wa Kigali nyuma ya Rwakazina Marie Chantal uheruka kugirwa Ambasaderi mu Busuwisi. Abandi bawuyoboye barimo Mutsindashyaka Théoneste (2001-2006), Kirabo Aissa Kacyira (2006-2011), Ndayisaba Fidèle(2011- 2016), Mukaruliza Monique (2016-2017) na Nyamurinda Pascal (2017-2018).

Rubingisa afite impamyabumenyi y’icyiciro cya gatatu cya Kaminuza mu bijyanye n’imari ndetse yagiye akora mu zindi nzego n’ibigo bya leta nko muri Minisiteri y’Imari n’Igenamigambi, muri Kaminuza y’u Rwanda aho yakoze igihe cy’imyaka ine nk’Umuyobozi Mukuru wungirije ushinzwe ubukungu, ubu yakoraga mu kigo cyigenga cyitwa Intare Investments.

Leave a Reply

Your email address will not be published. Required fields are marked *

Scroll Up