Amasezerano y’ibigo bitatu bitwara abantu mu buryo rusange i Kigali agiye kongerwaho amezi atandatu

Share

Umujyi wa Kigali n’abandi bafatanyabikorwa bawo barimo kwiga uko amasezerano y’ibigo bitatu bitanga serivisi zo gutwara abantu mu buryo rusange muri uyu mujyi yakongerwaho andi mezi atandatu.

Mu kiganiro yagiranye na The New Times, Umuyobozi Mukuru w’Agateganyo ushinzwe imyubakire, ibikorwaremezo n’ubwikorezi mu Mujyi wa Kigali, Rwunguko Jean d’Amour, yemeje ko barimo kwiga uko igihe cy’amasezerano y’abatwara abantu mu buryo rusange cyakongerwa.

Ati “Turacyari mu biganiro n’Urwego Ngenzuramikorere (RURA), n’abandi bafatanyabikorwa bireba ngo turebere hamwe uko amasezerano y’ibigo bitatu bitwara abantu mu buryo rusange yakongerwaho amezi atandatu”.

Ibigo bitwara abantu mu buryo rusange mu Mujyi wa Kigali ni; Kigali Bus Services (KBS), Royal Express na Rwanda Federation of Transport Cooperative (RFTC). Ibi nibyo byatsindiye isoko bwa mbere ry’imyaka itanu ryatanzwe muri Kanama 2013, aho buri kimwe cyahawe imihanda yihariye yo gukoreramo.

Eng. Rwunguko avuga ko bongereye igihe cy’amasezerano kugira ngo haboneke igihe cyo kugendera ku byagaragajwe n’inyigo y’umwaka wose ijyanye n’amavugurura y’imihanda, mu gutanga amasezerano mashya.

Igihe cy’amezi atandatu kizafasha mu gutanga amasezerano mashya hagendewe ku byagaragajwe n’inyigo ndetse kinafashe mu bijyanye n’inzira yo gutanga amasoko.

Inyigo yakozwe mu mavugurura y’imihanda yatangijwe mu 2018 ngo igaragaze imbogamizi n’ibisubizo byakoreshwa cyane cyane mu bibazo byo kubona imodoka mu buryo bworoshye, imihanda mishya n’ibindi.

Umuyobozi ushinzwe ibikorwa muri RFTC, Bishop Kihangire, avuga ko igihe cy’amasezerano gikwiye kongerwa kikava ku myaka itanu kikagera nibura kuri 15 cyangwa 20.

Avuga ko ibi byaborohereza mu kugura imodoka, bikongera umubare wazo kandi bikagira ingaruka nziza mu gutuma abagenzi bazibona.

Ati “Impuzamashyirahamwe ntabwo ifite igishoro gihagije cyo kugura imodoka nshya, ibi byatwongerera imbaraga zo gushaka inguzanyo kandi inyinshi muri zo zifata igihe cyo kuzishyura kirenze imyaka itanu”.

Ku kijyanye n’imirongo miremire y’abategereje imodoka, Kihangire avuga ko ikibazo atari imodoka nke ahubwo ari imihanda idahagije y’ibyerekezo zagenewe bigatuma igihe imodoka yagombaga gukoresha cyiyongera bigateza imirongo.

Avuga ko ubuyobozi bukwiye kureba iki kibazo cyo gusangira imihanda mito n’izindi modoka mu masaha y’abagenzi benshi kuko bituma serivisi itihuta ku batwara abantu mu buryo rusange.

Kihangire avuga ko mu kugerageza gukemura iki kibazo bazanye imodoka nini zitwara abantu 70 ngo zisimbure izitwara 30.

Amasezerano y’ibigo bitatu bitwara abantu mu buryo rusange i Kigali agiye kongerwaho amezi atandatu

Share

Leave a Reply

Your email address will not be published. Required fields are marked *

Scroll Up