Nicolas Pépé w’imyaka 24 yatanzweho akayabo ka milliyoni 72 z’amapawundi

Share

Arsenal yemeje ko yamaze gusinyisha rutahizamu w’Umunya-Côte d’Ivoire, Nicolas Pépé mu gihe cy’imyaka itanu, aho yatanzweho akayabo ka miliyoni £72 aba umukinnyi wa mbere uhenze mu mateka y’iyi kipe yo mu cyiciro cya mbere mu Bwongereza.

Arsenal yabonye uyu mukinnyi ihigitse amakipe arimo Napoli yo mu Butaliyani yari yamaze kwemera amafaranga Lille yasabaga, ariko Nicolas Pépé n’umuhagarariye bayibwira ko yifuza gukina mu Bwongereza.

Nicolas Pépé w’imyaka 24, wakiniraga Lille yo mu Bufaransa, yakoze isuzuma ry’ubuzima ku wa Kabiri ndetse yasinye amasezerano y’imyaka itanu.

Kuva ageze muri Lille mu 2017 avuye muri Angers yari yaragezemo mu 2013, Nicolas Pépé yayitsindiye ibitego 35 mu mikino 74 yari amaze kuyikinira.

Mu mwaka ushize w’imikino, yatsinze ibitego 23 mu mikino 41 yakiniyemo iyi kipe, aho muri shampiyona yarushwaga na Kylian Mbappé gusa.

Umutoza wa Arsenal, Unai Emery, yashimagije uyu mukinnyi, avuga ko azabafasha gutsinda ibitego byinshi.

Ati ”Nicolas ni umukinnyi uri ku rwego rwo hejuru kandi ni umukinnyi wo ku mpande ufite impano. Yifujwe n’amakipe menshi akomeye mu Burayi. Twifuzaga gusinyisha umukinnyi ukomeye wo ku mpande muri iri soko ry’igura ry’abakinnyi kandi nishimiye ko aje, azadufasha kubona ibitego byinshi.”

Nicolas Pépé Pepe uca ku ruhande rw’iburyo asatira cyangwa se agakina nka rutahizamu iyo ikipe ikoresheje uburyo bwa 4-4-2, akinisha ukuguru kw’imoso ndetse yahawe nimero 19 muri Arsenal.

Arsenal izishyura uyu mukinnyi mu byiciro, aho ku ikubitiro izatanga miliyoni £20, andi miliyoni £52 izayatanga nyuma.

Nicolas Pépé abaye umukinnyi wa kane mushya Arsenal iguze muri iyi mpeshyi nyuma ya Gabriel Martinelli wakiniraga Ituano yo muri Brésil, itizwa Dani Ceballos na Real Madrid mu gihe kandi yaguze na myugariro William Saliba wavuye muri Saint-Etienne kuri miliyoni £27.

Uretse kuba umukinnyi wa mbere uhenze mu mateka ya Arsenal, Nicolas Pépé yabaye uwa gatatu uhenze mu mateka ya Premier League n’uwa mbere uhenze mu basohotse muri Ligue 1 y’u Bufaransa.

Arsenal yamamaza ubukerarugendo bw’u Rwanda ikomeje kwifuza kandi abandi bakinnyi barimo Kieran Tierney wa Celtic kuri miliyoni £25.

Nicolas Pépé yerekanywe nk’umukinnyi mushya wa Arsenal

Nicolas Pépé yaciye agahigo ko kuba umukinnyi uhenze Arsenal

Uyu rutahizamu w’Umunya-Côte d’Ivoire yahawe nimero 19 muri iyi kipe yamamaza ubukerarugendo bw’u Rwanda binyuze muri “Visit Rwanda”

Share

Leave a Reply

Your email address will not be published. Required fields are marked *

Scroll Up