Abakirisitu bo mu Rwanda bamenye ituro rizashyigikira gahunda y’u Rwanda yo kurandura Hepatite C.

Abakirisitu bo mu Rwanda bamenyereye gutanga amaturo arimo ayo gushima Imana, ay’umutima ukunze, gufasha abakene, gushyigikira inyubako n’icya cumi. Uru rutonde rugiye kwiyongeraho ituro rizashyigikira gahunda y’u Rwanda yo kurandura Hepatite C.

Indwara y’umwijima yo mu bwoko bwa C [Hepatite C] yibasira benshi ku Isi. Ubushakashatsi bwo mu 2018 bwagaragaje ko Abanyarwanda 4% bayirwaye ndetse raporo y’Ishami rya Loni ryita ku buzima yagaragaje ko abarenga miliyoni 71 bayirwaye.

Mu guhangana nayo u Rwanda rwatangiye urugendo rwo kuyirandura burundu mu bukangurambaga bw’imyaka itanu (2019-2024).

Igikorwa cyo gutangira urwo rugamba cyiswe ‘Rwanda Cares’ cyabereye muri Kigali Convention Center, ku wa 31 Nyakanga 2019.

U Rwanda rwifuza kugabanya umubare w’abarwaye Hepatite C ukava kuri 4% ukagera kuri 1,2% ndetse 90% by’abayirwaye bari hejuru y’imyaka 15 bakavurwa .

Iki gikorwa cyagenewe miliyoni $43.5 kizagerwaho bigizwemo uruhare n’inzego za Leta, abikorera n’abanyamadini.

Umuyobozi w’Ihuriro ry’Amadini n’Amatorero mu Rwanda (RIC), Musenyeri Philippe Rukamba, yavuze ko hakozwe inama nyinshi ziga ku kurwanya Hepatite C no kurebera hamwe icyakorwa mu kuyirandura.

Ati “Hateganywa kwemeza ibihe bihuriweho n’abandi bafatanyabikorwa byo gukora ubukangurambaga mu gihugu cyose. Ibyo bikorwa bizabera mu nsengero, amateraniro, amashuri, ibitangazamakuru n’ahandi hose abantu bahurira ngo bumve neza imiterere ya Hepatite C n’uburyo bwo kuyitsinda.’’

Mu Rwanda imiryango ishingiye ku myemerere itanga serivisi zijyanye n’ubuvuzi ku kigero cya 40%.

Ibigo nderabuzima n’ibitaro bifitwe n’iyo miryango byasabwe gukora ubukangurambaga no gushyira mu ngengo y’imari yabyo ibikorwa byo gupima no kuvura abarwaye Hepatite C.

Yakomeje ati ‘‘Tuzashyiraho mu madini n’amatorero na Kiliziya Gatolika iminsi y’ituro ryo gushyigikira urugamba rwo kurwanya Hepatite C. Turizera ko bizamanuka bikagera no mu miryango remezo aho tuzahurira n’Abanyarwanda bose.’’

Umuyobozi w’Ihuriro ry’Amadini n’Amatorero mu Rwanda (RIC), Musenyeri Philippe Rukamba, yijeje ko hagiye gukorwa ubuvugizi mu bukangurambaga bwo kurandura Hepatite C mu Rwanda

Umuyobozi w’Itorero Foursquare Rwanda, Dr. Bishop Fidèle Masengo, yabwiye IGIHE ko ubusabe bahawe bukeneye kwihutishwa cyane ndetse buri torero rizagena ishyirwa mu bikorwa ryabwo.

Yagize ati “Bariya bantu barwaye ni abakirisitu, abavandimwe n’abaturanyi bacu. Kumva ikibazo bafite no kugira icyo twagikoraho ni inshingano zacu. Itorero ni irifasha abababaye n’abafite impamvu zikomeye zo gufashwa zumvikana.’’

Yavuze ko ikigiye gukorwa ari uko amatorero n’amadini ari mu ihuriro azashyiraho uburyo bwo kubishyira mu bikorwa.

Bishop Masengo yakomeje ati “Dushobora guhera kuri buri torero rigafasha abayoboke baryo kwipimisha, babisoza rigatangira ubundi buryo.’’

Avuga ku bwihutirwe bwo kurandura Hepatite C yashimangiye ko “Ujya kogera uwe ntiyambura, birumvikana ko igikorwa cyihutirwa. Umuntu urwaye uko azahara kumuvura biragorana. Ubu twumva tugiye gutangira kubishyira mu bikorwa.’’

Mu Itorero Foursquare Rwanda ngo yiteguye kuganira n’inzego zo mu rusengero kuri icyo gikorwa.

Ati “Birihutirwa ko tubiganiraho, nibaza ko bitarenga mu byumweru bibiri ngo tube twatangije uburyo tubikoramo.’’

Mu mafaranga akenewe muri iyi gahunda ku ikubitiro abacuruzi bahuriye muri PSF biyemeje kuzatanga miliyoni $5 mu guhashya Hepatite C.

U Rwanda rwabaye urwa mbere rwabonye umuti wa Hepatite C ku kiguzi gito kurusha ibindi bihugu ku Isi. Igiciro cyavuye ku $86 000 mu 2012, ubu kigeze kuri $60, aho umuntu avurwa agakira; kwipimisha byavuye ku $30 bigera kuri 1$.

Muri gahunda yo kurandura Hepatite C abantu 230 000 bayanduye bazakorerwa ibizamini byerekana ingano ya virusi mu maraso, mu gihe abarenga 110 000 bazavurwa.

Kugeza ubu Abanyarwanda barenga miliyoni basuzumwe Hepatite C; muri bo 15 000 baravuwe barakira.

Umuyobozi wa Foursquare Church Rwanda, Dr. Bishop Fidèle Masengo, yavuze ko mu byumweru bibiri itorero abereye umushumba rizaba ryafashe icyerekezo cy’uburyo umusanzu waryo uzatangwamo

Igikorwa cyo gutangiza ubukangurambaga bwo kurandura Hepatite C cyabereye muri Kigali Convention Center

-

Leave a Reply

Your email address will not be published. Required fields are marked *

Scroll Up