Ibyishimo.Zimwe mu nyubako z’abikorera zikorerwamo ubucuruzi mu mujyi wa Huye

Share

Abaturage bo mu turere dutandukanye twoherejwemo ibyicaro by’ibigo bya Leta, barishimira icyo cyemezo cya Guverinoma y’u Rwanda bakavuga ko bacyitezeho iterambere ryabo n’iry’igihugu.

Ni nyuma y’uko Guverinoma yemeje iyimurwa ry’ibigo bimwe bya Leta byakoreraga mu Mujyi wa Kigali, bikajya mu mijyi ya kabiri n’uturere dutandukanye.

Mu mujyi wa Huye hoherejwe Ikigo gishinzwe Iterambere ry’ubuhinzi n’ubworozi (RAB), Inama y’Igihugu y’amashuri makuru na za Kaminuza (HEC) n’ishami ry’ubushakashatsi mu Kigo cy’Igihugu cy’Ubushakashatsi n’Iterambere mu byerekeye inganda (NIRDA).

I Huye kandi hashyizwe Inteko Nyarwanda y’ururimi n’umuco (RALC), Ikigo cya Leta gishinzwe guteza imbere Ubumenyingiro n’imyigishirize y’imyuga (WDA), Ikigo cy’Ingoro z’umurage w’u Rwanda n’ishami rya Kaminuza y’u Rwanda.

Bamwe mu bikorera bo mu Karere ka Huye bemeza ko umujyi wabo ugiye kongera kugarura isura wari umaze imyaka igera kuri itanu utakaje kubera iyimurwa ry’ibigo bikomeye.

Namana Séraphine umaze imyaka myinshi akorera mu Mujyi wa Huye avuga ko ku bwe yiteze impinduka nziza.

Ati “Kiriya cyemezo cya Guverinoma cyadushimishije cyane, twiteze kongera kubona iterambere kuko abatugana bazaba benshi. Njyewe ncuruza amata ariko muri iyi minsi abakiriya ni bakeya (…) nizeye ko baziyongera”

Munyengabe Théodomir we avuga ko yishimiye ko zimwe mu nyubako zari zarabaye amatongo zigiye kongera gukoreshwa.

Ati “Icyemezo kirashimishije kuko kizatuma rwa rujya n’uruza rwiyongera inyubako nyinshi zabaye amatongo zikoreshwe kandi turizera ko n’inama mpuzamahanga zimwe na zimwe zizajya zibera i Huye umujyi wongere gususuruka.”

Abikorera mu Mujyi wa Huye bavuga ko bagiye kongera imbaraga mu kunoza serivise batanga kugira ngo ayo mahirwe bayabyaze umusaruro.

Umuyobozi akaba n’uwatangije ikigo cy’ubukerarugendo bushingiye ku muco, amateka n’ubukerarugendo mu Karere ka Musanze, Theodore Nzabonimpa, avuga ko ubukungu by’umwihariko mu ishami ry’ubukerarugendo buziyongera

Yagize ati “Birazwi ko Akarere kacu ka Musanze ari ak’ubukerarugendo. Hari inama zajyaga zibera i Kigali abazijemo bakumva bavuga ibyiza bya Musanze ariko bakabura umwanya wo kuhagera, bizaborohera rero gutembera umujyi wacu wose bakareba ibyiza biwutatse. Birumvikana ko ubukungu bwacu buzazamuka.”

Turatsinze Straton wikorera mu Mujyi wa Musanze akaba anahagarariye urugaga rw’abikorera, avuga ko ibyo bigo bitanga icyizere gikomeye.

Ati “Bizazamura ubukungu bw’umujyi wacu ukomeze kujya imbere, birumvikana ko abakozi bazakora muri ibyo bigo bazacumbika hano uwubatse inzu yunguke kandi n’imisoro yiyongere (…) twatangiye umunyenga w’ubukungu by’umwihariko ku bikorera n’akarere kacu muri rusange”

I Musanze ho hashyizwe Komisiyo y’Igihugu y’Itorero (NIC), Komisiyo y’Ubumwe n’Ubwiyunge (NURC), Komisiyo y’Igihugu yo gusezerera Abasirikare no kubasubiza mu buzima busanzwe n’ishami rya Kaminuza y’u Rwanda i Busogo.

Mu mujyi wa Muhanga hoherejwe Ikigo cy’Igihugu cy’Amahugurwa mu by’Imicungire y’Abakozi n’Umutungo (RMI) n’Ikigo cy’igihugu gishinzwe gutera imbere Amakoperative (RCA).

Kimonyo Juvenal ucuruza mu Mujyi wa Muhanga avuga ko bishimye kandi bagiye gushyira imbaraga mu kwagura bikorwa no kurushaho kunoza serivise batanga.

Ati “Twiteguye kongera ibikorwa remezo nk’inyubako zigezweho kandi n’ubucuruzi tukayongera kuko tuzabona abantu benshi batugana baba abaje mu mahugurwa cyangwa gusaba serivise.”

Gashonga Jean Claude wo mu Mujyi wa Kibuye mu Karere ka Karongi avuga ko bagiye kubona abantu bashya bagana umujyi wabo kandi hari ibihakorerwa byinshi bazishimira.

Ati “Hano iwacu iterambere rigenda ritugeraho ariko ryari ku muvuduko muto. Dufite ikiyaga cya Kivu kitabyazwa umusaruro uko byifuzwa; birumvikana abikorera bafite umukoro wo kwagura ibikorwa no kunoza serivise batanga.”

I Karongi hashyirwa Ikigo cy’igihugu gishinzwe Igororamuco naho mu Karere ka Ngororero hashyirwa Ikigo gishinzwe amashyamba.

Kwimura bimwe mu bigo bya Leta byakoreraga i Kigali ni umwe mu myanzuro y’umwiherero wa 14 w’abayobozi, ugamije guteza imbere ibikorwa bizamura imijyi yunganira Kigali.

Zimwe mu nyubako z’abikorera zikorerwamo ubucuruzi mu mujyi wa Huye

Share

Leave a Reply

Your email address will not be published. Required fields are marked *

Scroll Up