Nyarugenge-Gitega: Harasiwe umuntu ucyekwaho ubujura bwa telefoni arapfa

Share

Mu mudugudu wa Rugano mu Kagari ka Kora mu Murenge wa Gitega, harasiwe umuntu ucyekwaho ubujura bwa telefoni arapfa. Byabaye saa sita z’ijoro ryo kuri uyu wa 28 Mata 2019, umusore uri mu kigero cy’imyaka 22 y’amavuko yashikuzaga umugabo wagendaga n’amaguru telefoni yo mu bwoko bwa Tecno.

Umunyamabanga Nshingwabikorwa w’Umurenge wa Gitega, Mutuyimana Gabriel, yabwiye Itangazamakuru ko uyu ukekwaho ubujura yari agiye gutera icyuma uwo yashikuje telefoni.

Ati “Inzego zishinzwe umutekano zamubonye amaze kumushikuza telefoni agiye kumutera icyuma niko guhita araswa arapfa.”

Uyu muyobozi yakomeje avuga ko uwarashwe nta byangombwa bimuranga yarafite, uwo yashikuje telefoni nawe ngo yahise yirukanka.

Yakomeje yizeza abatuye n’abagenda mu Murenge wa Gitega ko nta kibazo cy’ubujura gihari, ngo kuko inzego zishinzwe umutekano zikora amasaha 24/24 kandi n’abaturage bafite umuco mwiza wo gutangira amakuru ku gihe.

Iyi telefoni hamwe n’icyuma bivugwa ko uyu mujura yari afite byajyanywe kuri station ya Polisi Nyarugenge.

source:igihe

Share

Leave a Reply

Your email address will not be published. Required fields are marked *

Scroll Up