Abanyeshuri b’abahanga bazahitamo ‘Inderabarezi’ bashyiriweho buruse z’ubuntu muri kaminuza

Minisiteri y’Uburezi yorohereje abanyeshuri batsinze neza mu cyiciro rusange bazahitamo uburezi kuzajya bafashwa kwiga kaminuza ku buntu, mu rwego rwo kuzamura ireme ry’uburezi bijyanye n’icyerekezo cy’u Rwanda cyo kubaka ubukungu bushingiye ku bumenyi.

Mu kuzamura ireme ry’uburezi, Mineduc yashyizeho ingamba z’ingenzi zatangajwe mu Nama y’Abaminisitiri Idasanzwe yayobowe na Perezida Paul Kagame ku wa 28 Mutarama 2019; zirimo izishingiye ku myigire n’imyigishirize, izo guteza imbere umwuga w’ubwarimu n’izizamura imibereho ya mwarimu.

Ubusanzwe Mineduc yahaga imbaraga amasomo ya Siyansi, Ikoranabuhanga, Engineering n’Imibare (STEM) ndetse abanyeshuri babonye amanota meza ni yo bahitagamo gukomezamo muri Kaminuza ku ikubitiro.

Kuri ubu mu kunoza ireme ry’uburezi nk’ingamba iri mu zigamije kuzamura ubukungu, amasomo nderabarezi (TTC) muri Kaminuza n’amashuri makuru na yo yashyizwe imbere mu yo Leta izajya iha buruse n’amafaranga atunga umunyeshuri bitishyurwa.

Umunyamabanga wa Leta muri Minisiteri y’Uburezi, ushinzwe Amashuri Abanza n’Ayisumbye, Dr. Munyakazi Isaac, yavuze ko abiga amashuri nderabarezi bazahabwa umwihariko mu kwiga kaminuza.

Yagize ati “Uburezi ntibukwiye kwigwamo na buri wese, kaminuza zibwigisha zigiye gukurikiranwa tumenye ko yaba kaminuza ya leta, izigenga, ugiyemo agomba kuvamo ari wa wundi twifuza kandi ufite ubumenyi dukeneye.’’

Yakomeje avuga ko “TTC zizahabwa umwihariko ndetse abanyeshuri bazizemo ni bo tuzibandaho, tukabaha buruse nk’uburyo bwo kugera ku ireme ry’uburezi twifuza.’’

Yavuze ko uburezi bukwiye kubahwa kuko ireme ry’uburezi ritashobokra mwarimu yarengejwe ingohe.

Ati “Uburezi ni umwuga utarafatwaga nk’uwiyubashye ndetse na sosiyete ntiyahaga umwarimu agaciro kandi ikazi. Leta y’u Rwanda irasaba kongera gusubiza mwarimu muri wa mwanya w’icyubahiro. Ibikorwa ni ukugira ngo urerera igihugu abikore yishimye kandi yumva ko yubashywe. Umwarimu wateguwe neza, abikora ashimishwa nuko umunyuze mu maboko avuyemo umugabo, yumva ari ishimwe rikomeye.’’

Mwarimu ni we pfundo rya gahunda zose zigamije kuzamura ireme ry’uburezi ndetse aza ku isonga mu kuzishyira mu bikorwa.

Umuyobozi w’Ikigo cy’Igihugu gishinzwe Uburezi (REB), Dr Ndayambaje Irénée, yavuze ko mu biganiro byabahuje na kaminuza ku wa 25 Mata 2019 barebye ku buryo bwo kwita no ku bakandida bigenga binjira mu burezi.

Yavuze ko “Umwarimu wigishijwe neza, wigisha ibyo asobanukiwe neza ni we mwarimu ukwiye, dushaka mu burezi bwacu.’’

Mu kiganiro cyanyuze kuri RBA ku wa 28 Mata 2019, Mineduc yavuze ko nta munyeshuri izahatira guhitamo uburezi kuko kutabuhitamo byabaye amateka ndetse abantu bagenda basobanukirwa n’agaciro kabwo.

Biteganyijwe ko mu cyumweru gitaha, Mineduc izatangira ibiganiro bigamije gusobanurira abanyeshuri inyungu ziri mu mahitamo bakora mu gihe batoranya amasomo bifuza kwiga n’impamvu yabyo.

Amashuri ya TTC n’ay’imyuga n’ubumenyingiro (TVET) ubusanzwe yagenerwaga abanyeshuri babonye amanota yo hasi.

Mu ngamba Mineduc yafashe mu kubungabunga ireme ry’uburezi harimo kongerera amashuri nderabarezi ubushobozi bushingiye ku bikorwaremezo n’ibikoresho bigezweho no kugabanya umubare w’abanyeshuri mu ishuri kugira ngo mwarimu abafashe kwiga bihagije; guha TTC abakozi n’abarimu bazobereye umwuga wo kwigisha; kuvugurura integanyanyigisho ya TTC; guha ubushobozi amashuri y’imenyerezamwuga wo kwigisha burimo ibikorwaremezo, ibikoresho bya ngombwa bihagije n’abarimu babishoboye.

Umunyamabanga wa Leta muri Minisiteri y’Uburezi, ushinzwe Amashuri Abanza n’Ayisumbye, Dr. Munyakazi Isaac

Yanakuyeho inzitizi zose zatuma umunyeshuri atiga neza, cyane cyane izishingiye ku mikoro, umunyeshuri wiga muri TTC azajya yishyura 50% by’amafaranga y’ishuri andi 50% atangwe na Mineduc.

Mu guteza imbere umwuga w’ubwarimu, uzajya arangiza muri TTC, akigisha imyaka itatu mu mashuri abanza azajya yemererwa, igihe abishatse, buruse n’amafaranga amutunga bitishyurwa yo gukomeza mu Cyiciro cya Kabiri cya Kaminuza.

Ibi bizanajyana no kuba uzajya arangiza muri Kaminuza mu Ishami ry’Uburezi akigisha imyaka itanu mu mashuri yisumbuye, azajya yemererwa buruse yo gukomeza mu Cyiciro cya Gatatu cya Kaminuza mu burezi.

Umunyamabanga wa Leta muri Minisiteri y’Uburezi, ushinzwe Amashuri abanza n’Ayisumbye, Dr. Munyakazi Isaac, yavuze ko gahunda ya Leta y’u Rwanda ari uguteza imbere umwuga wa mwarimu biri no mu cyerekezo cyo kubaka ubukungu bushingiye ku bumenyi

Leave a Reply

Your email address will not be published. Required fields are marked *

Scroll Up