Nyarugenge.Abantu bane bapfuye bagwiriwe n’ikirombe mu Murenge wa Mageragere

Share

Abantu bane bapfuye bagwiriwe n’ikirombe mu Murenge wa Mageragere mu Karere ka Nyarugenge aho bacukuraga amabuye y’agaciro yo mu bwoko bwa gasegereti, abandi babiri barakomereka.

Iyi mpanuka yabaye mu gitondo cyo ku wa 15 Mata 2019 ahagana saa tanu n’igice z’amanywa. Icyo kirombe kimaze amezi atandatu gihawe uburenganzira bwo gucukurwamo.

Umuyobozi ushinzwe Ubugenzuzi bw’Ubucukuzi bw’Amabuye y’Agaciro na Kariyeri mu Kigo cy’Igihugu gishinzwe Mine, Peteroli na Gaz (RMB), Kanyangira John, yabwiye IGIHE ko hatangiye iperereza ryo kumenya icyateye iyo mpanuka.

Yagize ati “Abantu batandatu bari mu kazi bisanzwe binjiye mu kirombe, amabuye aza kubagwira. Babiri bavuyemo bakomeretse buhoro ariko abandi bane bapfuye.’’

“Nyuma y’impanuka turi kwifashisha Urwego rw’Igihugu rw’Ubugenzacyaha ngo harebwe intandaro yayo. Iyo bisanzwe hari uburangare sosiyete ifite isoko yabigizemo, itari yagerageje kurinda abakozi, nyirayo akurikiranwa n’amategeko.’’

U Rwanda rwongereye imbaraga mu kurengera ubuzima n’umutekano w’abakora mu bucukuzi bw’amabuye y’agaciro, hagamijwe ko uru rwego rubyara inyungu ariko n’abarukoramo bakitabwaho bikwiye.

RMB yashyizeho itegeko rigenga ubucukuzi bw’amabuye y’agaciro na kariyeri ryo mu 2018, risaba abakora uyu mwuga kugira ibikoresho by’ubwirinzi nk’ingofero zabigenewe, uturindantoki n’ibindi.

Ubu muri buri karere k’igihugu hari abakozi ba RMB bashinzwe kugenzura ibikorwa by’ubucukuzi buri munsi. Kuva mu mezi atandatu bari mu mahugurwa agamije kubongerera ubumenyi.

Itegeko rigenga ubucukuzi bw’amabuye y’agaciro na kariyeri, ryasohotse ku wa 13 Kanama 2018, rigena ko umuntu wese ukora amakosa arimo kudaha abakozi ubwishingizi, ahanishwa guhagarikirwa uruhushya by’agateganyo.

Ingingo ya 55 iteganya ko umuntu udakurikiza ibipimo ngenderwaho mu gushakashaka, mu gucukura, mu gutunganya cyangwa mu gucuruza amabuye y’agaciro cyangwa kariyeri, iyo byateje ibikomere n’uburwayi ku muntu cyangwa byangije ibidukikije, ahanishwa igifungo kitari munsi y’amezi atandatu ariko kitarenze umwaka umwe n’ihazabu ya miliyoni imwe ariko atarenze miliyoni eshatu.

Iyo byateje ubumuga cyangwa indwara idakira ku muntu, ahanishwa igifungo kitari munsi y’umwaka umwe ariko kitarenze imyaka itatu n’ihazabu itari munsi ya miliyoni 3 Frw ariko itarenze miliyoni 5 Frw.

Iyo byateje urupfu ku muntu, iyo abihamijwe n’urukiko, ahanishwa igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda atari munsi ya miliyoni eshanu ariko atarenze miliyoni 10 Frw.

Iki kirombe cyagwiriye abantu batandatu, bane bitaba Imana

Hakomeje kurebwa impamvu yateye iyi mpanuka

Share

Leave a Reply

Your email address will not be published. Required fields are marked *

Scroll Up