Ambasaderi w’u Budage mu Rwanda yirukanywe

Share

Ambasaderi w’u Budage mu Rwanda yirukanywe

Amakuru atangazwa n’Ikinya makuru cyo mu Budage “welt.de” agaragaza ko uwari uhagarariye u Budage mu Rwanda yasabwe kuva mu gihugu, kubw’ikosa ryafashwe nk’irikomeye mu mikorere ye.

Mu nkuru yacyo yiswe “DIPLOMATISHE SPANNUNGEN” bisobanuye intugunda muri dipolomasi (Tension diplomatique), WELT.DE ivuga ko  Dr Peter Woeste , Ambasaderi w’u Budage mu Rwanda yasubiye mu gihugu cye ku cyumweru, nyuma y’imyaka ibiri n’igice yari amaze akorera mu Rwanda.

Iki kinyamakuru kivuga ko amakuru cyabashije kugeraho ari ay’uko Ambasaderi Dr Woeste yakoresheje imvugo inenga bikomeye ubutegetsi bw’u Rwanda, abinyujije mu butumwa bwanditse bwa email ye bwite, bukaza kugera ku bayobozi b’u Rwanda ntibubashimishe. Ibi bikaba ari byo byabyukije umwuka mubi hagati y’u Rwanda n’u Budage.

Undi Ambasaderi w’u Budage wigeze kwirukanwa mu Rwanda ni Christian Clages wahawe amasaha 48 ngo abe yavuye mu Rwanda, kuwa 11 Ugushyingo 2008. Iki gihe byari byatewe no kuba u Budage bwari bwataye muri yombi Lt Col Rose Kabuye wari ushinzwe protocol ya Leta.


Ubwo Ambassador Dr Peter Woeste yakirwaga na Perezida Paul Kagame

Hanze y’u Rwanda, Ambasaderi w’u Budage uherutse kwirukanwa mu kwezi gushize ni Daniel Kriener wari uhagarariye igihugu cye muri Venezuella, wahawe amasaha 48 na Perezida Nicolas Maduro kuwa 07/03/2019, ashinjwa kubangamira inyungu za Venezuella mu by’umutekano.

Dr Peter Woeste wari Ambasaderi w’u Budage mu Rwanda, yari amaze kumvikana mu bihe binyuranye avuga Ikinyarwanda, iyo yabaga yasuye abaturage.

Hagati aho, u Budage bufite icyicaro mu Kanama Gashinzwe amahoro n’Umutekano ku Isi (UN Security Council) muri uyu mwaka wa 2019/2020.

U RWANDA RUVUGA KO ATIRUKANYWE KO AHUBWO HARI ICYO U BUDAGE BWASABWE

Mu kugerageza kumenya icyo Minisiteri ibifite mu nshingano ibivugaho, Minisitiri wungirije muri Minisiteri y’Ububanyi n’Amahanga y’u Rwanda, Ambassador Olivier Nduhungirehe yasubije BWIZA.Com dukesha iyi nkuru mu magambo magufi agira ati: “Ntabwo Ambasaderi w’u Budage yirukanywe mu Rwanda, ahubwo twasabye igihugu cye ko kimuhindura kubera amakosa yakoze”.

source:bwiza.com

Share

Leave a Reply

Your email address will not be published. Required fields are marked *

Scroll Up