Perezida Abdelaziz Bouteflika wa Algérie yeguye

Share

Nyuma y’igitutu cy’abaturage bari bakomeje imyigaragambyo, Perezida Abdelaziz Bouteflika wa Algérie yeguye kuri uyu mwanya kuri uyu wa Kabiri, nk’uko ibiro ntaramakuru by’icyo gihugu byabitangaje.

Igitutu amaze iminsi ashyirwaho n’abaturage cyabanje gutuma yisubiraho ku mugambi wo kwiyamamaza muri manda ya gatanu ndetse yimurira igihe kitazwi amatora yagombaga kuba muri uku kwezi.

Bouteflika w’imyaka 82 wari umaze imyaka 20 ku butegetsi, amaze igihe atagaragara cyane mu ruhame kubera intege nke zituma agendera mu kagare, cyane kubera uburwayi bwamwibasiye mu 2013.

Muri Werurwe mu gucubya umujinya w’abaturage, Bouteflika yatangaje ko hashyirwaho guverinoma nshya izakurikirana ishyirwa mu bikorwa ry’impinduka zo kuvugurura Itegeko Nshinga, bituma Minisitiri w’Intebe, Ahmed Ouyahia, yegura.

Gusa ntibyacogoje ubusabe bw’abigaragambya basabaga ko Bouteflika ajyana n’abandi banyapolitiki barimo n’abahabwa amahirwe yo kumusimbura.

Mu kwezi gushize, Umugaba Mukuru w’Ingabo, Lt Gen Ahmed Gaed Salah, yasabye ko hatangazwa ko Bouteflika atagifite ubushobozi bwo gukomeza kuyobora igihugu.

Bouteflika yabaye perezida wa gatanu wayoboye Algérie kuva mu 1999. Yabaye Minisitiri w’Ububanyi n’Amahanga kuva mu 1963-1979, aza kuba perezida mu bihe bikomeye birimo n’igihe cy’intambara ya gisivili yibasiye iki gihugu mu 2002.

Perezida Bouteflika aheruka guhagarika kwiyamamariza manda ya gatanu, anasubika amatora

Share

Leave a Reply

Your email address will not be published. Required fields are marked *

Scroll Up