Abasaga 2000 bataye ishuri mu karere ka musanze 2019

Umubare w’abana bakomeje guta ishuri mu mashuri abanza n’ayisumbuye, ukomeje kwiyongera mu Karere ka Musanze, aho abasaga 2000 batasubiye kwiga mu 2019.

Bimwe mu bituma aba bana bata ishuri birimo gukora ubucuruzi buciriritse burimo ubw΄ibisheke n΄indi mirimo ivunanye.

Bamwe muri abo bana bataye ishuri baganiriye na IGIHE, bavuga ko kuba bakomoka mu miryango ikennye, ari kimwe mu bituma batabona ibisabwa byose ku ishuri, bigatuma barivamo.

Bankundiye Yvonne yagize ati “Navuye mu ishuri mu mwaka ushize nigaga mu wa kabiri wisumbuye, mfite mama gusa kandi nawe ni umukene afite n΄ubumuga bw’ukuguru, ibi byatumye mva mu ishuri njya gucuruza ibisheke kugira ngo mbone ibitunga umuryango n΄ibyo nkenera mu buzima bwa buri munsi”.

Avuga ko nagira amahirwe azabasha gufasha barumuna be bakiga, gusa ngo na we abonye amahirwe yo gukomeza yakwiga ariko afite imibereho myiza.

Uwamahirwe Gaudence na we ati “Navuye mu ishuri ntangira gukora akazi ko mu rugo mfite imyaka 12, nigaga mu mwaka wa mbere wisumbuye. Sinabashaga kubona ibikoresho by΄ishuri birimo inkweto, amakaye, umwenda w΄ishuri wasaza simbone undi kubera ubukene”.

Avuga ko ubu bukene bwamuciye intege ahitamo kuva mu ishuri ngo ajye gushakisha ubuzima, binyuze mu gukora imirimo igoye.

Bamwe mu babyeyi b΄aba bana ntibemeranya nabo kuko ngo hari n΄abata ishuri kubera kunanirana bakajya mu mijyi gushaka akazi.

Nyirafaranga Domitille yagize ati ” Hari abana batunaniye bigize intakoreka, wamukoza iby΄ishuri ati ifaranga niryo nshaka, ubu mfite umuhungu warangije mu wa gatandatu ubanza ahita ajya mu byo gucukura umucanga, sinamukoza ibyo kwiga dore ko atanataha mu rugo, ntabwo ubukene ari bwo gusa butuma abana batiga, harimo n’ababa barananiranye”.

Umukozi ushinzwe uburezi mu Karere ka Musanze, Munyamahoro Alexis, avuga ko nta mpamvu n’imwe yatuma abana bata ishuri, ari yo mpamvu bakomeje gukora ibishoboka byose ngo bagaruke kwiga.

Yagize ati “Gusubiza abana mu ishuri ni inshingano yacu, mbere yo kubagarura turabanza tukabamenya, tukamenya impamvu ituma bava mu ishuri, tukaganira nabo ndetse n΄ababyeyi babo tukabumvisha inshingano zabo zihesha uburenganzira umwana bwo kwiga”.

“Gusa ntaho ndagera ngo numve ko kuva mu ishuri biterwa n΄ubukene kuko bubaye bwo twareba uko tubigenza ibyo bikoresho abura bimwe tukabimuha ariko akiga ubu nta mpamvu n’imwe yatuma umwana atiga cyane ko ari ubuntu”.

Akarere ka Musanze gafite amashuri abanza n΄ayisumbuye 119, aho Raporo yo mu mwaka wa 2018 yakozwe n΄Ikigo cy΄Igihugu gishinzwe uburezi (REB), yagaragaje ko Akarere ka Musanze kaza mu myanya itanu ya mbere mu kugira abana benshi bata ishuri, mu gihe mu Ntara y΄Amajyaruguru, aka karere gahereyemo abana bataye ishuri basaga ibihumbi 17 mu 2018.

Bamwe mu bana bata ishuri bakajya mu bucuruzi burimo n’ubw’ibisheke

Leave a Reply

Your email address will not be published. Required fields are marked *

Scroll Up