Abaharanira uburenganzira bwa muntu basabye leta y’u Burundi kurekura abanyeshuri bafunzwe

Share

Abaharanira uburenganzira bwa muntu basabye leta y’u Burundi kurekura abanyeshuri bafunzwe bashinjwa kwangiza ifoto ya Perezida Pierre Nkurunziza.

Yves Ishimwe, umwe mu bagize umuryango (Fenadeb) uharanira imibereho myiza y’abana, yavuze ko leta ya Nkurunziza igomba kurekura aba bana, niba hari n’ibihano bahanishwa bigakorwa hashingiwe ku mategeko n’amabwirizwa y’ibigo bigaho.

Hashizwe icyumweru abanyeshuri batatu b’abakobwa bari muri gereza ya Ngozi iherereye mu Majyaruguru y’u Burundi mu gihe hategerejwe iperereza ku byaha bashinjwa.

Batawe muri yombi bashinjwa kwangiza ifoto ya Nkurunziza iri mu bitabo by’ishuri.

Ubwo bagezwaga imbere y’umushinjacyaha wa leta mu Ntara ya Kirundo, umuhungu w’imyaka 13 yararekuwe kuko atari agejeje imyaka yo guhanwa n’amategeko, abandi bakobwa batandatu bari bajyanwe kuri sitasiyo ya Polisi baza kurekurwa ariko batatu bo baracyarimo, barimo umwe w’imyaka 15, 16 na 17.

Mu gihe baba bahamwe n’iki cyaha bashobora kumara imyaka itanu muri gereza nk’uko The East African yabitangaje.

Umuyobozi w’umuryango uharanira uburenganzira bwa muntu muri Afurika yo hagati, Lewis Mudge, yavuze ko ubutegetsi bwa Nkurunziza bwagombye guta muri yombi abakomeje gukora ibyaha bikomeye aho gufunga abana bo ku mashuri kubera gushushanya ku bitabo.

Ati “Mu gihe hari ibyaha by’indengakamere birimo gukorwa mu Burundi, ni akaga kubona abanyeshuri aribo baburanishwa kubera kwandika gusa.”

Si inshuro ya mbere abana bo mu mashuri batabwa muri yombi kuko no mu 2016 intasi z’ubutegetsi zafunze abanyeshuri umunani bashinjwa kwangiza ifoto ya Nkurunziza.

Bashinjwaga kwandika mu ifoto ye bamubwira ko ava ku butegetsi no kutayobora manda ya gatatu.

Muri uwo mwaka, Umuryango Uharanira uburenganzira bwa muntu watangaje ko abana batari bake birukanwe ku mashuri bashinjwa kwandika ku ifoto ya Nkurunziza.

Hagati aho Komisiyo ya Loni ku Burundi yavuze ko muri iki gihugu harimo kubera ibikorwa bihonyora uburenganzira bwa muntu, bigakorwa n’inzego z’umutekano ndetse n’urubyiruko rwo mu ishyaka rya Nkurunziza ruzwi nk’Imbonerakure.

Uyu muryango wavuze ko hashobora kubaho guhonyora uburenganzira bwa muntu na mbere y’amatora y’umukuru w’igihugu mu 2020, usaba ubufatanye na leta ngo ibi byose bikumirwe.

Ubutegetsi bwa Nkurunziza bwasabwe kurekura aba banyeshuri bari muri gereza

Share

Leave a Reply

Your email address will not be published. Required fields are marked *

Scroll Up