Abatuye n’abakorera ishoramari mu Karere ka Kamonyi bavuga ko amashanyarazi yahinduye byinshi mu mibereho yabo

Abatuye n’abakorera ishoramari mu Karere ka Kamonyi bavuga ko amashanyarazi yahinduye byinshi mu mibereho yabo, ababaga mu kizima babona umucyo n’abashoramari biborohera kurikora.

Akarere ka Kamonyi kagezemo amashanyarazi bwa mbere mu 2010 ariko ubu ingo ziyafite zigera kuri 37.7% zirimo 24,7% zifite akomoka ku muyoboro mugari na 12.9% zicanye akomoka ku mirasire y’izuba.

Related image

Umuyobozi w’Ishami rya Sosiyete y’u Rwanda ishinzwe ingufu (REG) muri Kamonyi, Mukaseti Rosine, yavuze ko kuva mu 2017 kugera muri Gashyantare 2019 bacaniye ingo 5131, bituma abayafite bava kuri 23.04% uwo mwaka bagera kuri 37.7% uyu munsi.

Uyu muyobozi yavuze ko uyu mwaka bihaye intego yo gucanira abantu 2400, ariko mu mezi umunani ashize bacaniye izigera ku 1909.

Abaturage ntibakiba mu mwijima

Bamwe mu batuye n’abakorera muri aka Karere bahawe amashanyarazi babwiye IGIHE ko yabafashije muri byinshi birimo kubakura mu icuraburindi nk’uko Ruyenzi Vedaste wo mu Kagari ka Mukinga, Umurenge wa Nyamiyaga yabisobanuye.

Ati “Umuriro w’amashanyarazi ni iterambere, ubu ntitugicana mazutu cyangwa agatadowa. Ni byinshi wadutejemo imbere, kwa kundi twacanaga ibishishwa by’ibiti tumurika, ubu umuturage arakanda ku rukuta akabona iwe harabona, n’urushinge rutakaye yarubona.”

Bugingo Silas wo mu Mudugudu wa Mbayaya yagize ati “Umuriro w’amashanyarazi udufasha muri byinshi. Ubu tureba televiziyo, turumva amakuru, amatelefone turacaginga. Mbega ubu natwe twabaye abasirimu, ubu n’iyo washaka kujya hanze mu gicuku cyangwa bwakwiriyeho ugenda wumva nta kibazo cy’umutekano ufite.”

Amashanyarazi yongereye umusaruro

Umubaji ukorera mu gasanteri ka Mukunguri, Nayituriki Emmanuel yavuze ko mbere amashanyarazi ataraza yakoreshaga iranda, yagera aho awukenera akajya kuwushaka mu Karere ka Ruhango.

Ati “Amashanyarazi amfasha kenshi nkora ububaji kuko mbere sinabonaga uburyo noza imbaho nkoramo ibintu bitandukanye. Twarindaga kujya i Kinazi (mu Karere ka Ruhango) aho wabanje kugera (urugendo rw’amasaha abiri) none kuba waratwegereye twarabyishimye cyane.”

Nayituriki yavuze ko mbere yakoreshaga iranda n’urukero bikamutwara umwanya munini ariko umusaruro ukanga ukaba mucye.

Ati “kera umuntu yasatuzaga urukero. Washoboraga kwirirwa usatura nk’urubaho rumwe cyangwa ebyiri, umubyizi wose ukagendera kuri ibyo ariko aho umuriro waziye tukabona izi mashini byarakemutse, dukora byihuse izibonetse zose turasatura nta kibazo.”

Yavuze ko bagikoresha iranda n’urukero intebe imwe yamaraga icyumweru atarayirangiza ariko ubu akoresha imashini zicomekwa ku mashanyarazi, mu munsi umwe akora intebe zijya muri salon y’inzu.

Inganda zikomeye zirabyinira ku rukoma

Akarere ka Kamonyi ni kamwe mu duce tweza ku bwinshi imyumbati n’umuceri. Umuriro w’amashanyarazi wabafashije kubyongerera agaciro binyuze mu nganda zashinzwe nyuma y’uko uhagejejwe.

Umuyobozi w’Uruganda Nyamiyaga Akanoze Ltd, rutunganyiriza ifu y’imyumbati mu Murenge wa Nyamiyaga, Nyirasagamba Alice, yavuze ko uruganda rufite imashini isya imyumbati ikoresha amashanyarazi.

Ati “Imashini dufite ikoresha amashanyarazi, iyo atahaba ntabwo twari gukora ngo bikunde kuko twaranayizanye, dusaba umuriro kuko tutari tuwufite, twatangiye kuyikoresha ari uko bawuduhaye.”

Bitewe n’amasoko ahari, Nyamiyaga Akanoze Ltd rutunganya ifu y’imyumbati itari munsi ya toni 10 mu kwezi, zagemuwe n’abahinzi bibumbiye muri koperative zifite abanyamuryango basaga 100.

Yasobanuye ko uretse kumufasha kwiteza imbere, umuriro w’amashanyarazi wateje imbere uruganda rwe n’abaturage bahashora babona amafaranga abafasha kwivana mu bukene.

Ati “Ubu umuturage ntahangayika ashaka aho ajyana umusaruro we kandi hamwegereye ndetse akabona amafaranga igihe ayashakiye.”

Uru ruganda rutunganya ifu y’imyumbati ikunzwe ku isoko, rufite abakozi umunani bahawe akazi gahoraho n’abandi batanu bakora nyakabyizi.

Umuyobozi w’uruganda rwa Mukunguri, rutunganya umuceri n’ibicanwa mu bishishwa byawo, Niyongira Uzziel, yavuze ko amashanyarazi ari yo shingiro ry’umushinga w’uruganda.

Ati “Amashanyarazi niyo moteri y’ibyo dukora kuko dufite uruganda rutunganya umuceri, imashini zose zikoreshwa n’amashanyazi, tukagira n’urutunganya amakara batekesha narwo ruyakoresha. Ni ukuvuga ko iyo ataza kuba muri aka gace, ntitwari kuhashyira uyu mushinga.”

Yakomeje agira ati “N’abaturanyi bacu bahise baboneraho babasha gucana, gucuruza neza, gukora amasaha menshi. Niyo adufasha gukora ibikorwa dukora, izi mashini ni nyinshi zikoresha umuriro mwinshi tutazifite ntibyashoboka.”

Uru ruganda rutunganya toni 2,5 z’umuceri n’ibiro 500 by’amakara mu isaha. Rukorana n’abahinzi bibumbiye muri koperative eshatu, rukagira n’abakozi bahoraho 43 bose rukabafasha kwiteza imbere.

Umusaruro w’amata wongerewe agaciro

Umucungamutungo w’ikusanyirizo ry’amata rya Mbayaya ritunganya amata y’aborozi bo mu Murenge wa Mugina n’uwa Nyamiyaga , Utetiwabo Béatrice, yavuze ko amashanyarazi abafasha gukoresha ibyuma bifashisha bayongerera agaciro.

Yavuze ko ku munsi ikusanyirizo rikoresha kilowatt 13-15 z’umuriro nyamara moteri, bafite ikaba itakora idashyizwemo nibura litiro 60 za mazutu.

Ati “Ariko urumva gukoresha moteri biba bihenze kuko ikenera mazutu nyinshi. Iyo dufite kugira ngo ikore ijyamo nibura litiro 60.”

Iri kusanyirizo ritunganya Litiro 1000 mu kwezi, umworozi agurirwa litilo imwe kuri 200Frw nawe bikamufasha kwiteza imbere. Ikusanyirizo rifite abakozi bagera kuri batandatu bose bafite akazi gahoraho.

Umuyobozi w’ishami rya REG muri Kamonyi, Mukaseti avuga ko intego bafite ari iyo gukomeza kongera umubare w’abafite umuriro w’amashanyarazi bijyanye n’icyerekezo Leta ifite cy’uko buri rugo ruzaba rufite amashanyarazi bitarenze 2024.

Leave a Reply

Your email address will not be published. Required fields are marked *

Scroll Up