Bisimwa yavuze ko abarwanyi ba M23 aribo bafite ubumenyi n’ubushobozi ku kibazo cy’umutekano muke kiri mu Burasirazuba bwa Congo

Share

Umutwe wa M23 mu 2013 wasinye amasezerano y’amahoro na Guverinoma ya Congo nyuma y’umwaka w’intambara. Icyo gihe mu byo bemeranyije harimo ko uwo mutwe uhagarika intambara ugahinduka ishyaka rya politiki, gucyura abarwanyi bawo, kubashyira mu gisirikare cya Leta n’ibindi.

Bertrand Bisimwa ntiyumva impamvu Leta ya Congo idashaka kwinjiza mu ngabo abahoze muri M23

Icyakora kimwe mu bikomeje guheza abo barwanyi mu mahanga, ni urutonde rwasohowe na Leta ya Joseph Kabila mu 2013, rugaragaza bamwe mu basirikare ba M23 bagera kuri 70 batemerewe gusubizwa mu gisirikare barimo abayobozi bayo bakuru.

Bisimwa yavuze ko abarwanyi ba M23 aribo bafite ubumenyi n’ubushobozi ku kibazo cy’umutekano muke kiri mu Burasirazuba bwa Congo, ariyo mpamvu bashaka gutanga umusanzu mu kugikemura nk’ingabo aho gusubizwa mu buzima busanzwe.

Ikiganiro kirambuye na Bisimwa

Mubona Tshisekedi azakora ibyo Kabila atakoze mu kubahiriza amasezerano mwagiranye?
Bisimwa: Guverinoma ya Kabila yari yarahisemo kwica amasezerano ihitamo kubahiriza gucyura abantu gusa, kutwemera nk’ishyaka rya politike n’imbabazi.

Ibyo Tshisekedi yavugaga yiyamamaza turacyategereje ko bitangira wenda yazakora ibitandukanye ariko ku birebana n’amasezerano ya Nairobi wagira ngo ni ubutegetsi bwa mbere bukiriho. Imikorere ni ya yindi ya Kabila ariko tuzagerageza kumvisha Félix Tshisekedi n’uko ubona asa n’utaratangira gufata ibintu mu biganza bye.

Kubera iki hacyuwe abarwanyi 70 bari muri Uganda mu gihe hari abandi bavugwaho kuba ku butaka bwayo nk’inyeshyamba?

Bisimwa: Leta ya Congo niyo yabimenya. Kuri twe ibyo ni ukuyobya uburari. Leta ya Kinshasa yagiye ihimba ibintu igashyiramo n’abaturanyi, kuki idashaka gukemura ibibazo byayo bwite ? Muri Congo ubu harabarirwa imitwe 129 yazahaje uburasirazuba yica abaturage ariko usanga Guverinoma ntacyo biyibwiye ahubwo ishishikajwe n’abarwanyi ba M23 badafite intwaro bari mu nkambi mu bihugu by’abaturanyi.

M23 yaba yiteguye kwinjira mu gihugu nk’ishyaka rya Politiki nkuko amasezerano ya Nairobi abiteganya ?

Bisimwa: M23 ni imwe. Dushyira umukono ku masezerano ya Nairobi, Leta yari yiyemeje gukemura ibibazo mu burasirazuba harimo n’umutekano ariko nyuma y’imyaka itandatu umutekano wakomeje kuba mubi birenga ingabo za Leta na Monusco.

Ni yo mpamvu tutavuze ngo tureke igisirikare burundu ahubwo tugahitamo kwinjira mu ngabo z’igihugu kugira ngo dutange ubunararibonye dufite mu gukemura icyo kibazo. Nitubyumvikanaho na Guverinoma ya Tshisekedi tuzabimenyesha abarwanyi bacu.

Abarwanyi ba M23 baba babona gute ubutegetsi bushya bwa Tshisekedi?

Bisimwa: Turifuza amahoro ku buryo burambye. Turashaka kubona mu Burasirazuba bwa Congo hari amahoro, ubwiyunge no kwiyubaka, abahatuye bakabona ubushobozi ku buryo hatazongera kubaho impunzi z’Abanye-Congo.

Hari abasirikare ba M23 binjiye mu gisirikare cya Congo, mwiteze ko bazafasha bene wabo bahungiye mu bihugu byo mu Karere gutaha?

Bisimwa: Icyemezo cyo kwinjira mu ngabo za Congo nk’uko nabivuze hejuru ni umutekano no guhuza uburasirazuba bw’igihugu kugira ngo habeho uburyo bw’imibereho myiza no gutahuka ku babyeyi bacu no ku mpunzi z’abanye-Congo ziba mu bihugu duturanye. Turashaka kurangiza ikibazo cy’impunzi z’abanye-Congo ku isi hose, Umunye-Congo agomba kumva ameze neza iwabo kuruta ahandi hose.

Bertrand Bisimwa ntiyumva impamvu Leta ya Congo idashaka kwinjiza mu ngabo abahoze muri M23

Share

Leave a Reply

Your email address will not be published. Required fields are marked *

Scroll Up