Ibyo wamenya kuri Raymond Chow witabye Imana, wamenyekanishije Bruce Lee na Jackie Chan

Kuva ku mwaduko w’udusobanuye, abenshi ntibazibagirwa umugeri, ingumi no kwitakuma kwa Bruce Lee cyangwa Jackie Chan, bakanyujijeho muri filime zo mu Bushinwa no ku Isi yose.

Aba bagabo bahinduye isura y’uruganda rwa sinema mu Bushinwa kuva mu 1970 kuzamura, batangira kwamamara no kwigwizaho abakunzi mu buryo bwihuse.

Muri filime wasangaga mu gukina kwabo bibanda cyane ku kwerekana ibimeze nk’ubufindo mu gutera amakofe n’imigeri mu buryo butari bumenyerewe cyane, bakoresheje ubumenyi bari baravomye mu mukino wa Wushu, Kungfu na Hapkido.

Byinshi mu bikorwa byatumye bamenyakana byarambitsweho ibiganza na Raymond Chow wabaye icyogere mu gutunganya filime i Hong Kong, aho aba bagabo bakurije impano yabo.

Uyu mugabo witabye Imana ku wa 2 Ugushyingo afite imyaka 91, yavukiye i Hong Kong mu 1927. Yize kaminuza muri St. John’s University yari iherereye Shanghai.

Mu 1949 yagarutse iwabo, akora nk’umunyamakuru muri Hong Kong Standard ndetse no kuri Radio Ijwi rya Amerika.

Yinjiye mu ruganda rwa sinema mu 1958 ubwo yiyungaga kuri studio ya Shaw Brothers yatunganyaga filime zitandukanye, yanagize uruhare rukomeye mu kumenyekanisha iz’ikinnyemo Kung-fu.

Yatangiye ashinzwe kwamamaza ibyakorerwagamo, nyuma Run Run Shaw wari nyirayo atangira kumwizera akabafasha mu kwandika filime biza kurangira abaye umwe mu bazitunganya.

Mu 1970 yaje kwiyomora kuri iyi studio ajya gushinga iye yise Golden Harvest.

Muri icyo gihe yaje kubenguka Bruce Lee wari umaze iminsi aca ibintu muri filimi y’uruhererekane y’abanyamerika yitwa ‘The Green Hornet’.

Bumvikana kumwishyura $15 000 no kuzagabana inyungu muri filime ebyiri studio ye ya Golden Harvest yashakaga gukora ndetse no kujya bamuvuga cyane muri izo filime.

Mu 1971 bakoranye iyitwa ‘The Big Boss’ yabaye filime y’akataraboneka ikishimirwa na benshi kubera uburyo bw’imirwanire mishya bwagaragaragamo ndetse ikanahesha aba bagabo ibihembo bitandukanye.

Iyi filime yakurikiwe n’izindi zakunzwe zirimo ‘The Sound of Music’, ‘First of Fury’ ndetse na ‘The Way of the Dragon’ ziri mu zatumye aba bagabo bakomeza kwigarurira uruganda rwa sinema.

Ku bw’amahirwe make mu 1973 Bruce Lee yaje kwitaba Imana, Jackie Chan abari ariwe usa nk’umusimbuye muri Golden Harvest.

Chan yatangiye yigana ibyo Bruce Lee yakoraga ariko aza kuzana udushya mu mirwanire ye akavanga no gusetsa.

Raymond Chow kandi yanazamuye Angelo Mao wabaye umugore wa mbere wamenyakanye muri filime z’imirwano, mu 1972.

Ahagana mu myaka yo mu 1980 yahise yinjira muri Hollwood muri Amerika ndetse Golden Harvest ye ikora filime yitwa ‘The Cannonball Run’ yakunzwe cyane, ashakiramo umwanya Jackie Chan ndetse na Michael Hui, ashaka kuzamura sinema y’i Hong Kong no kumenyekanisha abakinnyi baho.

Mu 1997 Golden Harvest yaje guhomba biturutse ku ihananuka ry’ubukungu ryabaye muri Asia muri icyo gihe ndetse aza gufata umwanzuro wo kuyigurisha.

Golden Harvest yakoze filimi yayo ya nyuma mu 2003, mu 2007 ayigurisha umuherwe w’umushinwa wanaje kuyihindurira izina ayita Orange Sky Golden Harvest.

Nubwo yitabye Imana, ibikorwa bye n’ubu biracyavugwa kubera izina yasize ahesheje uruganda rwa sinema mu Bushinwa.

Raymond Chow ari kumwe n’abakinnyi Bruce Lee na John Saxon ubwo hategurwaga filimi yiswe ‘Enter the Dragon, mu 1973

Raymond Chow yahawe igihembo cy’umuntu wabaye indashyikirwa mu buzima bwe bwose, mu 2011

Jackie Chan avanga imirwanire ye no gusetsa

Bruce Lee afatwa nk’umwe mu banyabigwi bubatse izina muri sinema

Leave a Reply

Your email address will not be published. Required fields are marked *

Scroll Up